കാല്‍ വഴുതി കിണറ്റില്‍ വീണ മകനെ രക്ഷിക്കാന്‍ ശ്രമിക്കുന്നതിനിടെ അമ്മയും കിണറ്റില്‍ വീണു മരിച്ചു. തമിഴ്‌നാട്ടില്‍ ചെങ്കല്‍പ്പേട്ട് കൂവത്തൂര്‍ സ്വദേശികളായ വിമല റാണി (35), മകന്‍ പ്രവീണ്‍ (15) എന്നിവരാണ് കിണറ്റില്‍ വീണ് മരിച്ചത്. വിമല തുണി കഴുകുന്നതിനിടെ പ്രവീണ്‍ കാല്‍ വഴുതി കിണറ്റില്‍ വീഴുകയായിരുന്നു. സംഭവം കണ്ടയുടനെ മകനെ രക്ഷിക്കാനായി വിമല കിണറ്റിലേക്ക് എടുത്ത് ചാടി. പിന്നാലെയാണ് രണ്ട് പേരും കിണറ്റില്‍ മുങ്ങി മരിച്ചത്.

അലക്കുന്നതിനായി കിണറിനടുത്തേക്ക് പോയ രണ്ട് പേരെയും കാണാതായതോടെ ബന്ധുക്കള്‍ തിരച്ചില്‍ നടത്തിയിരുന്നു. വിമല തുണി കഴുകുമ്പോള്‍ മകന്‍ കിണറിനോട് ചേര്‍ന്ന് ഇരിക്കുന്നത് കണ്ടുവെന്ന് അയല്‍ക്കാര്‍ പറയുന്നു. പിന്നീട് അലക്കാനെത്തിയവരാണ് കിണറില്‍ സാരി പൊങ്ങിക്കിടക്കുന്നത് കണ്ടത്. തുടര്‍ന്ന് നടത്തിയ പരിശോധനയിലാണ് മൃതദേഹങ്ങള്‍ കണ്ടെത്തിയത്.

തുണി അലക്കുന്നതിനിടെ കാല്‍ വഴുതി വീണ മകനെ രക്ഷിക്കാന്‍ ശ്രമിക്കുന്നതിനിടെ വിമലയും മരിച്ചെന്നാണ് നിഗമനം. ഫയര്‍ഫോഴ്‌സും പൊലീസുമെത്തി ഇരുവരുടേയും മൃതദേഹം പുറത്തെടുത്തു. മൃതദേഹങ്ങള്‍ ആശുപത്രിയിലേക്ക് മാറ്റി. പോസ്റ്റ് മോര്‍ട്ടത്തിന് ശേഷം മൃതദേഹം വീട്ടുകാര്‍ക്ക് വിട്ടുനല്‍കും.