ഇന്ത്യയിലെ ആദ്യ അണ്ടര് വാട്ടര് മെട്രോ പ്രധാനമന്ത്രി നരേന്ദ്രമോദി നാളെ രാജ്യത്തിന് സമര്പ്പിക്കും...
ഇന്ത്യയിലെ ആദ്യ അണ്ടര് വാട്ടര് മെട്രോ പ്രധാനമന്ത്രി നരേന്ദ്രമോദി നാളെ ഉദ്ഘാടനം ചെയ്യും. കൊല്ക്കത്തിയുടെ ഇരട്ട നഗരങ്ങളായ ഹൗറയെയും സാള്ട്ട് ലേക്കിനേയുമാണ് പാത ബന്ധിപ്പിക്കുന്നത്. രാജ്യത്തെ ആദ്യ അണ്ടര് വാട്ടര് മെട്രോ യാഥാര്ത്ഥ്യമാകുന്നതോടെ ചരിത്ര നിമിഷത്തിനാണ് രാജ്യം സാക്ഷ്യം വഹിക്കാന് പോകുന്നത്. മെട്രോയുടെ ഹൗറ മൈതാന് -എസ്പ്ലാനോഡ് സെക്ഷനാണ് പ്രധാനമന്ത്രി ഉദ്ഘാടനം ചെയ്യുന്നത്. ആകെ 16.6 കിലോമീറ്റര് ദൂരം വരുന്ന പദ്ധതിയിലെ മെട്രോ ടണല് നിര്മ്മിച്ചിരിക്കുന്നത് ഹൂഗ്ലി നദിയിലാണ്.
ഹൂഗ്ലി നദിയുടെ കിഴക്കും പടിഞ്ഞാറുമായാണ് ഹൗറയും സാള്ട്ട് ലേക്ക് നഗരവും സ്ഥിതി ചെയ്യുന്നത്. അണ്ടര് ഗ്രൗണ്ടിലുള്ള മൂന്നെണ്ണമടക്കം ആറ് സ്റ്റേഷനുകളാണ് പാതയിലുണ്ടാകുക. ഹൗറ മൈതാന്, ഹൗറ സ്റ്റേഷന് കോംപ്ലക്സ്, ബിബിഡി ബാഗ് (മഹാകരണ്) എന്നിവയാണ് ഈസ്റ്റ് -വെസ്റ്റ് മെട്രോയുടെ ഗ്രീന് ലൈനിലെ മൂന്നു സ്റ്റേഷനുകള്.
മണിക്കൂറില് 80 കിലോമീറ്റര് വേഗത്തിലാണ് മെട്രോ ഓടുക. നിരവധി വിശിഷ്ട വ്യക്തികളും ഉദ്യോഗസ്ഥരും പങ്കെടുക്കുന്ന ചടങ്ങില് പൊതുജനങ്ങള്ക്ക് അണ്ടര്വാട്ടര് മെട്രോ അനുഭവിക്കാന് അവസരം ലഭിക്കും. കൊല്ക്കത്ത മെട്രോ റെയില് കോര്പറേഷന് ലിമിറ്റഡാണ് (കെഎംആര്സിഎല്) പദ്ധതി നടപ്പാക്കുന്നത്. നിലവില് കൊല്ക്കത്ത മെട്രോക്ക് മൂന്നു ലൈനുകളാണുള്ളത്. ദക്ഷിണേശ്വര് മുതല് കവി സുഭാഷ്, സാള്ട്ട് ലേക്ക് സെക്ടര് അഞ്ച് മുതല് സീല്ദാ, ജോക മുതല് താര്തല എന്നിങ്ങനെയാണ് ഈ ലൈനുകള്. മറ്റു മൂന്നു ലൈനുകള് നിര്മാണത്തിലാണുള്ളത്.
മെട്രോ പാതയുടെ ഭാഗമായ ഹൗറ മെട്രോ സ്റ്റേഷന് ഇന്ത്യയിലെ ഏറ്റവും ആഴത്തിലുള്ള മെട്രോ സ്റ്റേഷനാണ്. ഇന്ത്യയില് ആദ്യമായി മെട്രോ പ്രവര്ത്തിച്ചു തുടങ്ങിയ നഗരം എന്ന പേരിനൊപ്പം ആദ്യമായി അണ്ടര് വാട്ടര് മെട്രോ നിലവില്വന്ന നഗരമായും ഇനി കൊല്ക്കത്ത അറിയപ്പെടും. അത്യാധുനിക സാങ്കേതികവിദ്യയുടെ നേട്ടമെന്ന നിലയില് മാത്രമല്ല നഗരത്തിലെ തിരക്കേറിയ രണ്ട് മേഖലകളെ തമ്മില് ബന്ധിപ്പിക്കുന്നു എന്നതിനാലും ഏറെ പ്രാധാന്യമര്ഹിക്കുന്ന തുരങ്കപാതയാണിത്. പൊതുഗതാഗതശൃംഖല കൂടുതല് സൗകര്യപ്രദമാകുന്നുവെന്നതും ഈ പാതയുടെ നേട്ടമാണ്.
ഹൗറ മൈദാന് മെട്രോ മുതല് എക്സ്പ്ലനേഡ് വരെ നീളുന്നതാണ് അണ്ടര്വാട്ടര് മെട്രോപാത. ഈസ്റ്റ്-വെസ്റ്റ് മെട്രോയുടെ ഭാഗമാണ് ഈ തുരങ്കപാത. 16.5 കിലോമീറ്ററാണ് പാതയുടെ ദൈര്ഘ്യം. പാതയുടെ 10.8 കിലോമീറ്റര് ജലത്തിനടിയിലും 5.75 കിലോമീറ്റര് പ്രത്യേക പാലം ഉപയോഗിച്ച് ഉയര്ത്തിയ നിലയിലുമാണ് നിര്മിച്ചിരിക്കുന്നത്.
https://www.facebook.com/Malayalivartha
