പന്ത്രണ്ടുകാരന്റെ അവസരോചിതമായ ഇടപെടലില്‍ പുള്ളിപ്പുലി കുടുങ്ങി. അത്തരമൊരു സാഹചര്യത്തില്‍ ഒരു 12വയസ്സുകാരന്‍ ചെയ്ത കാര്യമാണ് ഇപ്പോള്‍ സമൂഹമാദ്ധ്യമങ്ങളില്‍ വൈറലായിക്കൊണ്ടിരിക്കുന്നത്. ഭാഗ്യം കൊണ്ട് രക്ഷപ്പെട്ടുവെന്ന് പറയുന്നതിലും നല്ലത് തന്റെ മനസാന്നിദ്ധ്യം കൊണ്ട് ആ 12 വയസ്സുള്ള ആണ്‍കുട്ടി രക്ഷപ്പെട്ടുവെന്ന് പറയുന്നതാണ്. മഹാരാഷ്ട്രയിലെ മലേഗോണില്‍ നടന്ന സംഭവത്തില്‍ മോഹിത് അഹര്‍ എന്ന ആണ്‍കുട്ടിയാണ് രക്ഷപ്പെട്ടത്. ഇതിന്റെ സിസിടിവി ദൃശ്യങ്ങളാണ് വൈറലാകുന്നത്.

വിവാഹ ചടങ്ങുകള്‍ നടക്കുന്ന ഹാളിലെ മുറിയിലായി ഒരു ടേബിളിന് മുകളിലിരുന്ന് മൊബൈല്‍ ഫോണില്‍ കളിക്കുകയായിരുന്നു മോഹിത് അഹര്‍. തുറന്നു കിടന്നിരുന്ന വാതിലിലൂടെ അകത്തേക്ക് പുള്ളിപുലി കയറി വന്നു. സാധാരണ ബഹളം വെക്കാനാണ് ഏവരും ശ്രമിക്കുകയെങ്കിലും മോഹിത് ശബ്ദമുണ്ടാക്കാതെ പുള്ളിപുലി നടന്നു നീങ്ങിയതിന് തൊട്ടു പിന്നാലെ ഹാളിന് പുറത്തിറങ്ങി വാതില്‍ പുറത്തുനിന്ന് പൂട്ടി.

ഇതോടെ പുള്ളിപുലി ഹാളിനകത്തായി. ബഹളം വച്ച് ആളെ കൂട്ടിയതാടെ പ്രദേശവാസികള്‍ എത്തി. തുടര്‍ന്ന് വനം വകുപ്പും പൊലീസും എത്തി പുള്ളിപുലിയെ പിടികൂടി. അഞ്ച് വയസ് പ്രായമുള്ള പുള്ളിപ്പുലിയാണിതെന്നും കുട്ടിയുടെ സമയോചിത ഇടപെടലിനെ അഭിനന്ദിക്കുന്നതായും മലേഗോണ്‍ വനം വകുപ്പ് അധികൃതര്‍ പറഞ്ഞു.