ഡോക്ടറുടെ ഫോണില് വിഡിയോ കോളില് എത്തിയത് അര്ധനഗ്നയായ സ്ത്രീ... വിഡിയോ കോള് റെക്കോര്ഡ് ചെയ്ത് പ്രചരിപ്പിക്കുമെന്ന് ഭീഷണിപ്പെടുത്തി ഡോക്ടറില് നിന്നും തട്ടിയെടുത്തത് ഒന്പതു ലക്ഷം രൂപ
ഡോക്ടറുടെ ഫോണില് വിഡിയോ കോളില് എത്തിയത് അര്ധനഗ്നയായ സ്ത്രീ. വിഡിയോ കോള് റെക്കോര്ഡ് ചെയ്ത് പ്രചരിപ്പിക്കുമെന്ന് ഭീഷണിപ്പെടുത്തി ഡോക്ടറില് നിന്നും തട്ടിയെടുത്തത് ഒന്പതു ലക്ഷം രൂപ.ഡല്ഹി സ്വദേശിയായ എഴുപത്തിയൊന്നുകാരനായ ഡോക്ടര്ക്കാണ് അര്ധരാത്രിയില് ഒരു വിഡിയോ കോള്വന്നത്. അടിയന്തര ആവശ്യത്തിനായി ഏതെങ്കിലും രോഗികള് വിളിക്കുന്നതാകുമെന്ന് കരുതി കോള് എടുത്ത ഡോക്ടര്ക്കു മുന്നില് മറുതലയ്ക്കല് പ്രത്യക്ഷപ്പെട്ടത് അര്ധനഗ്നയായ സ്ത്രീയാണ്. പിന്നാലെ വിഡിയോ കോള് റെക്കോര്ഡ് ചെയ്ത് പ്രചരിപ്പിക്കുമെന്ന് പറഞ്ഞ് ഭീഷണിപ്പെടുത്തി ഡോക്ടറില് നിന്നും തട്ടിയെടുത്തത് ഒന്പതു ലക്ഷം രൂപ.
ഒന്പതു ലക്ഷം രൂപ നല്കിക്കഴിഞ്ഞിട്ടും വീണ്ടും പണം ആവശ്യപ്പെട്ടുള്ള നിരന്തരഭീഷണിയില് ഗതികെട്ട ഡോക്ടര് ഒടുവില് പൊലീസില് പരാതി നല്കി. വിശദമായ അന്വേഷണത്തിനുശേഷം രാജസ്ഥാന് സ്വദേശികളായ രണ്ടു സഹോദരങ്ങള് പൊലീസിന്റെ പിടിയിലായി. രാജസ്ഥാനിലെ ഡീഗ് ജില്ലയിലെ മേവാത്ത് സ്വദേശിയായ അബ്ദുള് റഹ്മാന് (39), സഹോദരന് ആമിര് ഖാന് (26) എന്നിവരെയാണ് വ്യാഴാഴ്ച അറസ്റ്റ് ചെയ്ത്. ഇവരെ അഞ്ച് ദിവസത്തേക്ക് പൊലീസ് കസ്റ്റഡിയില് വിട്ടു. വിഡിയോ കോള് ചെയ്യാനും ഭീഷണി കോള് ചെയ്യാനും ഉള്പ്പെടെ ഉപയോഗിച്ച ഏഴ് ഫോണുകളും സിം കാര്ഡുകളും ഇവരില്നിന്നു കണ്ടെടുത്തു.
ഡോക്ടറെ കൂടാതെ ഇരുപത്തിയഞ്ചോളം പേര് തട്ടിപ്പിന് ഇരയായിട്ടുണ്ടെന്ന് ഡപ്യൂട്ടി പൊലീസ് കമ്മിഷണര് അപൂര്വ ഗുപ്ത പറഞ്ഞു. ഡല്ഹിയില് നിന്നുള്ള നാല് പേര്ക്ക് പുറമെ, ബിഹാര്, ഗുജറാത്ത്, ഉത്തര്പ്രദേശ്, ഹരിയാന, മഹാരാഷ്ട്ര, മധ്യപ്രദേശ്, രാജസ്ഥാന് എന്നിവിടങ്ങളില് നിന്നുള്ളവരാണ് മറ്റുള്ളവര്. തട്ടിയെടുത്ത പണം ഹരിയാന, പഞ്ചാബ്, മഹാരാഷ്ട്ര എന്നിവിടങ്ങളിലെ വിവിധ ബാങ്ക് അക്കൗണ്ടുകളിലേക്കാണ് മാറ്റിയിരിക്കുന്നത്. ഡിജിറ്റലായാണ് അക്കൗണ്ടുകള് തുറന്നിരിക്കുന്നതെന്നും പണം വീണ്ടെടുക്കാനുള്ള നടപടികള് ആരംഭിച്ചതായും ഡപ്യൂട്ടി പൊലീസ് കമ്മിഷണര് അറിയിച്ചു.
https://www.facebook.com/Malayalivartha
