പൗരത്വ ഭേദഗതി നിയമം നിലവില് വന്നു... പാര്ലമെന്റ് പാസാക്കിയ പൗരത്വഭേദഗതി നിയമത്തിന്റെ ചട്ടങ്ങള് കേന്ദ്ര സര്ക്കാര് വിജ്ഞാപനം ചെയ്തതോടെയാണ് നിയമം പ്രാബല്യത്തിലായത്
പൗരത്വ ഭേദഗതി നിയമം നിലവില് വന്നു. ചട്ടങ്ങളില് ഔദ്യോഗിക വിജ്ഞാപനം പുറത്തിറങ്ങി. കേന്ദ്ര ആഭ്യന്തര മന്ത്രാലയമാണ് വിജ്ഞാപനം പുറത്തിറക്കിയത്. 2019ല് പാര്ലമെന്റ് പാസാക്കിയ സിഎഎ, ഇന്ത്യയിലുടനീളം തീവ്രമായ ചര്ച്ചകള്ക്കും വ്യാപക പ്രതിഷേധങ്ങള്ക്കും വഴിയൊരുക്കിയിരുന്നു. ലോക്സഭാ തിരഞ്ഞെടുപ്പിന് മുമ്പ് ഇത് സംബന്ധിച്ച ചട്ടങ്ങള് പുറപ്പെടുവിച്ച് സിഎഎ നടപ്പാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ കഴിഞ്ഞ മാസം പറഞ്ഞിരുന്നു.
പാര്ലമെന്റ് പാസാക്കിയ പൗരത്വഭേദഗതി നിയമത്തിന്റെ ചട്ടങ്ങള് കേന്ദ്ര സര്ക്കാര് വിജ്ഞാപനം ചെയ്തതോടെയാണ് നിയമം പ്രാബല്യത്തിലായത്. ബിജെപിയുടെ 2019 പ്രകടനപത്രികയിലെ അവിഭാജ്യ ഘടകമായിരുന്നു ഇത്. അയല് രാജ്യങ്ങളില് പീഡിപ്പിക്കപ്പെടുന്നവര്ക്ക് ഇന്ത്യയില് പൗരത്വം ലഭിക്കുന്നതിന് ഇത് വഴിയൊരുക്കും എന്നാണ് കേന്ദ്രം ചൂണ്ടിക്കാണിക്കുന്നത്.
അയല് രാജ്യങ്ങളായ പാകിസ്ഥാന്, അഫ്ഗാനിസ്ഥാന്, ബംഗ്ലാദേശ് എന്നീ രാജ്യങ്ങളില്നിന്നുള്ള ഹിന്ദു, ക്രിസ്ത്യന്, സിഖ്, ബുദ്ധ, ജൈന, പാഴ്സി മതക്കാര്ക്കാണ് പൗരത്വ നിയമപ്രകാരം ഇന്ത്യന് പൗരത്വം ലഭിക്കുക. മതിയായ രേഖകളില്ലാത്തവര്ക്ക് ദീര്ഘകാല വിസ നല്കുന്നതിന് ജില്ലാ ഭരണകൂടങ്ങള്ക്ക് അധികാരമുണ്ടാവുമെന്നും വിവിധ റിപ്പോര്ട്ടുകള് സൂചിപ്പിച്ചിരുന്നു. 2019 ഡിസംബര് 11നാണ് പാര്ലമെന്റ് പൗരത്വനിയമം പാസാക്കിയത്.
https://www.facebook.com/Malayalivartha
