പൊതുതിരഞ്ഞെടുപ്പിന് മുന്നോടിയായി പൗരത്വ (ഭേദഗതി) നിയമം നടപ്പാക്കിയതിന് പിന്നാലെ കേന്ദ്ര സര്‍ക്കാരിനെതിരെ തമിഴ് നടനും തമിഴക വെട്രി കഴകം (ടിവികെ) നേതാവുമായ വിജയ് രംഗത്ത്. ഈ നിയമത്തിലൂടെ കേന്ദ്രം ജനങ്ങളെ ഭിന്നിപ്പിക്കാന്‍ ശ്രമിക്കുകയാണെന്നും തമിഴ്‌നാട്ടില്‍ സിഐഎ നടപ്പാക്കാന്‍ അനുവദിക്കില്ലെന്നും താരം വ്യക്തമാക്കി. സമൂഹത്തെ ഭിന്നിപ്പിക്കാനും അന്തരീക്ഷത്തെ ധ്രുവീകരിക്കാനും ബി.ജെ.പി. ശ്രമിക്കുന്നുവെന്ന് ആരോപിച്ച് വിജയ്ക്ക് പുറമേ, മറ്റ് പ്രതിപക്ഷ നേതാക്കളും പൗരത്വ (ഭേദഗതി) നിയമത്തെ മുന്‍നിര്‍ത്തി കേന്ദ്രത്തെ വിമര്‍ശിച്ചു .ബിജെപിയുടെ ഭിന്നിപ്പുണ്ടാക്കുന്ന അജണ്ടയാണിതെന്ന് തമിഴ്നാട് മുഖ്യമന്ത്രി എം.കെ. സ്റ്റാലിന്‍ പറഞ്ഞു, ജനങ്ങള്‍ ബിജെപി ഉചിതമായ പാഠം പഠിപ്പിക്കുമെന്നും അദ്ദേഹം കൂട്ടിച്ചേര്‍ത്തു.

2014 ഡിസംബര്‍ 31-ന് മുമ്പ് ഇന്ത്യയിലെത്തിയ പാകിസ്ഥാന്‍, ബംഗ്ലാദേശ്, അഫ്ഗാനിസ്ഥാന്‍ എന്നിവിടങ്ങളില്‍ നിന്നുള്ള രേഖകളില്ലാത്ത മുസ്ലീം ഇതര കുടിയേറ്റക്കാര്‍ക്ക് പൗരത്വം വേഗത്തില്‍ ലഭ്യമാക്കുന്നതിനുള്ള വിവാദ നിയമം പാര്‍ലമെന്റ് പാസാക്കി നാല് വര്‍ഷത്തിന് ശേഷം നിയമങ്ങള്‍ വിജ്ഞാപനം ചെയ്തുകൊണ്ട് കേന്ദ്രം CAA നടപ്പിലാക്കി . എക്സില്‍ പുറത്തിറക്കിയ പ്രസ്താവനയില്‍, സിഎഎ നടപ്പിലാക്കുന്നത് അംഗീകരിക്കാനാവില്ലെന്ന് വിജയ് പറഞ്ഞു. തമിഴ്നാട്ടില്‍ നിയമം നടപ്പാക്കുന്നില്ലെന്ന് ഉറപ്പുവരുത്തണമെന്നും അദ്ദേഹം തമിഴ്നാട് സര്‍ക്കാരിനോട് അഭ്യര്‍ത്ഥിച്ചു. ഈ നിയമം തമിഴ്നാട്ടില്‍ നടപ്പാക്കുന്നില്ലെന്ന് നേതാക്കള്‍ ഉറപ്പുവരുത്തണമെന്നും പ്രസ്താവനയില്‍ പറയുന്നു.