സുരേഷ് ഗോപിക്കായി കളത്തില്... കേന്ദ്ര തെരഞ്ഞെടുപ്പ് കമ്മിഷണര് അരുണ് ഗോയലിന്റെ രാജിയോടെ വന്ന തിരഞ്ഞെടുപ്പു കമ്മിഷനിലെ രണ്ടൊഴിവുകള് ഇനി സര്ക്കാരിന് നേരിട്ട് നിയമിക്കാം; ആശങ്കയുയര്ത്തി പ്രതിപക്ഷം; മോദി വീണ്ടും പ്രധാനമന്ത്രി ആവണമെന്ന് ശരത് കുമാര്; തൃശൂരില് സുരേഷ് ഗോപിക്കായി പ്രവര്ത്തിക്കും
ഇനി തെരഞ്ഞെടുപ്പ് ഏത് ദിവസവും പ്രഖ്യാപിക്കാം. പ്രധാന പദ്ധതികളുടെ പ്രഖ്യാപനവും ഉദ്ഘാടനവും കഴിഞ്ഞു. കേന്ദ്ര തെരഞ്ഞെടുപ്പ് കമ്മിഷണര് അരുണ് ഗോയലിന്റെ രാജിയോടെ വന്ന തിരഞ്ഞെടുപ്പുകമ്മിഷനിലെ രണ്ടൊഴിവിലേക്കും കേന്ദ്രസര്ക്കാരിന് നേരിട്ട് നിയമനം നടത്താം. ഇതുസംബന്ധിച്ച നിയമം കഴിഞ്ഞ ശീതകാല സമ്മേളനത്തിലാണ് സര്ക്കാര് പാസാക്കിയത്.
പ്രധാനമന്ത്രിയും അദ്ദേഹം നിര്ദേശിക്കുന്ന മന്ത്രിയും ലോക്സഭയിലെ പ്രതിപക്ഷനേതാവ് അല്ലെങ്കില് പ്രതിപക്ഷത്തെ വലിയ പാര്ട്ടിയുടെ നേതാവ് എന്നിവരടങ്ങുന്ന മൂന്നംഗസമിതിയെ കമ്മിഷണര്മാരെ നിയമിക്കാന് അധികാരപ്പെടുത്തുന്നതാണ് നിയമം. ഇപ്പോഴത്തെ രണ്ടൊഴിവിലേക്കും കൂടുതല് വിശ്വസ്തരെ നിയമിക്കാന് സര്ക്കാരിനാകും. നേരത്തേ, തിരഞ്ഞെടുപ്പ് കമ്മിഷണര്മാരുടെ നിയമനത്തിന് സ്വതന്ത്രസംവിധാനം വേണമെന്നാവശ്യപ്പെടുന്ന ഹര്ജികള് പരിഗണിക്കവേ അരുണ് ഗോയലിന്റെ നിയമനക്കാര്യത്തില് സുപ്രീംകോടതി കേന്ദ്രത്തെ വിമര്ശിച്ചിരുന്നു.
തിരഞ്ഞെടുപ്പ് കമ്മിഷണര്മാരുടെ നിയമനത്തിന് മൂന്നംഗസമിതിയെ നിര്ദേശിച്ചുകൊണ്ടുള്ള സുപ്രധാന വിധിയിലും സുപ്രീംകോടതിയുടെ ഭരണഘടനാബെഞ്ച് അരുണ് ഗോയലിനെക്കുറിച്ച് പരാമര്ശിച്ചിരുന്നു. പ്രധാനമന്ത്രി, ലോക്സഭയിലെ പ്രതിപക്ഷനേതാവ് അല്ലെങ്കില് പ്രതിപക്ഷത്തെ വലിയ പാര്ട്ടിയുടെ നേതാവ്, സുപ്രീംകോടതി ചീഫ് ജസ്റ്റിസ് എന്നിവരടങ്ങിയ താത്കാലികസമിതിയായിരുന്നു കോടതി നിര്ദേശിച്ചത്. പിന്നീട് ചീഫ് ജസ്റ്റിനെ ഒഴിവാക്കി പ്രധാനമന്ത്രി നിര്ദേശിക്കുന്ന ഒരു മന്ത്രിയെയും ഉള്പ്പെടുത്തി സമിതി നിര്ണയിച്ച് കേന്ദ്രസര്ക്കാര് നിയമം കൊണ്ടുവരുകയായിരുന്നു.
ഇതിനുമുമ്പ് രണ്ടുതവണ, 1999-ലും 2009-ലും മാത്രമാണ് മൂന്നംഗകമ്മിഷനില് ലോക്സഭാ തിരഞ്ഞെടുപ്പുസമയത്ത് ഒഴിവുണ്ടായിരുന്നത്. തിരഞ്ഞെടുപ്പിന്റെ വേളയില് അംഗങ്ങള് വിരമിച്ചതിനാലാണ് അന്ന് ഒഴിവുവന്നത്. എന്നാല്, ഇത്തവണ സാഹചര്യം വ്യത്യസ്തമാണ്. തിരഞ്ഞെടുപ്പ് പ്രഖ്യാപിക്കുന്നതിനുമുമ്പേയാണ് ഒഴിവുകള് വന്നിരിക്കുന്നത്. ഫെബ്രുവരി 15-നായിരുന്നു മറ്റൊരു കമ്മിഷണര് അനൂപ് പാണ്ഡെ വിരമിച്ചത്.
അതേസമയം തമിഴ്നാട്ടിലെ ത്രികോണ പോരാട്ടം ബിജെപിക്ക് നേട്ടമാകുമെന്ന് സമത്വ മക്കള് കക്ഷി അധ്യക്ഷനും നടനുമായ ശരത് കുമാര്. നരേന്ദ്ര മോദി വീണ്ടും പ്രധാനമന്ത്രി ആകണമെന്ന ബോധ്യം കാരണമാണ് എന്ഡിഎയില് ചേര്ന്നത്. തൃശൂരിലെ എന്ഡിഎ സ്ഥാനാര്ത്ഥി സുരേഷ് ഗോപിക്കായി പ്രവര്ത്തിക്കുമെന്നും ശരത് കുമാര് പറഞ്ഞു. അതേസമയം, തൃശൂരില് മത്സരം കടുക്കുകയാണ്. സുരേഷ് ഗോപി എന്ഡിഎ സ്ഥാനാര്ത്ഥിയാവുന്ന മണ്ഡലത്തില് യുഡിഎഫ് സ്ഥാനാര്ത്ഥിയായി കെ മുരളീധരനുമാണ് എത്തുന്നത്.
അതിനിടെ, തൃശൂരിലെ കോണ്ഗ്രസ് സ്ഥാനാര്ഥി മാറ്റത്തില് അമര്ഷം രേഖപ്പെടുത്തി അഖില കേരള ധീവര സഭ ഇന്നലെ രംഗത്തെത്തി. ധീവര സമുദായകാരനായ പ്രതാപനെ മാറ്റിയിടത്ത് സമുദായത്തിനകത്തെ മറ്റൊരാളെ പരിഗണിക്കാത്തതിലാണ് അഖില കേരള ധീവര സഭക്ക് അതൃപ്തി. സമുദായത്തില് പെട്ട 30 ലക്ഷം ആളുകളെ അവഗണിച്ചെന്ന് ധീവരസഭ ഓര്ഗനൈസിങ് സെക്രട്ടറി ടി വി ജനാര്ദ്ദനന് പറഞ്ഞു. കോണ്ഗ്രസ് പാര്ട്ടിയാണ് സമുദായത്തെ എന്നും പരിഗണിച്ചിരുന്നതെന്നും സമുദായത്തിലെ ഒരാള്ക്ക് സീറ്റ് അനുവദിച്ചതും കോണ്ഗ്രസാണെന്നും അഖില കേരള ധീവര സഭ അഭിപ്രായപ്പെട്ടു.
നിലവില് ഒരു സീറ്റിലും പരിഗണിക്കാത്തത് കടുത്ത അവഗണനയാണ്. ആലപ്പുഴയില് പരിഗണിക്കണമെന്നറിയിച്ചിട്ടും അവഗണിച്ചെന്നും അഖില കേരള ധീവര സഭ നേതാക്കള് പറഞ്ഞു. കോണ്ഗ്രസ് നേതൃത്വവുമായി സംസാരിച്ചെന്നും തൃശൂരില് കെ മുരളീധരനെ പിന്തുണക്കുന്നതില് സംസ്ഥാന നേതൃത്വം തീരുമാനമെടുക്കുമെന്നും ധീവരസഭ ഓര്ഗനൈസിങ് സെക്രട്ടറി ടി വി ജനാര്ദ്ദനന് പറഞ്ഞു.
"
https://www.facebook.com/Malayalivartha