തിരഞ്ഞെടുപ്പിനായി രാഷ്ട്രീയ പാര്‍ട്ടികള്‍ക്കുള്ള ഫണ്ടിംഗ് ടൂളായ ഇലക്ടറല്‍ ബോണ്ടുകള്‍ ഏറ്റവും കൂടുതല്‍ വാങ്ങുന്ന ഫ്യൂച്ചര്‍ ഗെയിമിംഗ് ആന്‍ഡ് ഹോട്ടല്‍ സര്‍വീസസ് തമിഴ്നാട് ഭരണകക്ഷിയായ ദ്രാവിഡ മുന്നേറ്റ കഴകത്തിന് (ഡിഎംകെ) 509 കോടി രൂപ സംഭാവന നല്‍കി. മുദ്രവച്ച കവറില്‍ സുപ്രീം കോടതിയില്‍ സമര്‍പ്പിച്ച ഇലക്ടറല്‍ ബോണ്ടുകളുടെ കണക്കുകള്‍ തിരഞ്ഞെടുപ്പ് കമ്മീഷന്‍ പുറത്തുവിട്ടതിന് പിന്നാലെയാണ് ഇക്കാര്യം വെളിപ്പെടുത്തിയത്.

ഇലക്ടറല്‍ ബോണ്ടുകള്‍ വഴി ഡിഎംകെയ്ക്ക് ആകെ 656.5 കോടി രൂപ ലഭിച്ചു. അതില്‍ 77 ശതമാനവും (509 കോടി രൂപ) ലോട്ടറി രാജാവ് സാന്റിയാഗോ മാര്‍ട്ടിന്റെ ഫ്യൂച്ചര്‍ ഗെയിമിംഗില്‍ നിന്നാണ്.
തിരെഞ്ഞെടുപ്പ് കമ്മീഷന്‍ പങ്കിട്ട ഡാറ്റ അനുസരിച്ച് ഇലക്ടറല്‍ ബോണ്ടുകളുടെ ഏറ്റവും കൂടുതല്‍ വാങ്ങുന്നയാളാണ് ഫ്യൂച്ചര്‍ ഗെയിമിംഗ്. 1,368 കോടി രൂപയുടെ ഇലക്ടറല്‍ ബോണ്ടുകള്‍ വാങ്ങിയതില്‍ 37 ശതമാനവും തമിഴ്നാട് മുഖ്യമന്ത്രി എംകെ സ്റ്റാലിന്റെ പാര്‍ട്ടിക്കായിരുന്നു.
ഡിഎംകെയുടെ മറ്റ് പ്രധാന സംഭാവനകളില്‍ മേഘ എഞ്ചിനീയറിംഗ് (105 കോടി രൂപ), ഇന്ത്യ സിമന്റ്സ് (14 കോടി രൂപ), സണ്‍ ടിവി (100 കോടി രൂപ) എന്നിവ ഉള്‍പ്പെടുന്നുവെന്ന് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു.

സംഭാവന നല്‍കുന്നവരുടെ വ്യക്തിവിവരങ്ങള്‍ വെളിപ്പെടുത്താന്‍ തീരുമാനിച്ച ചുരുക്കം ചില രാഷ്ട്രീയ പാര്‍ട്ടികളില്‍ ഒന്നായി ഡിഎംകെ വേറിട്ടു നിന്നു. ഇതിനു വിപരീതമായി, ബിജെപി, കോണ്‍ഗ്രസ്, ടിഎംസി, എഎപി തുടങ്ങിയ പ്രമുഖ പാര്‍ട്ടികള്‍ അത്തരം വിവരങ്ങള്‍ തിരഞ്ഞെടുപ്പ് കമ്മീഷനോട് വെളിപ്പെടുത്തുന്നതില്‍ നിന്ന് വിട്ടുനിന്നു. എന്നാല്‍, സുപ്രീം കോടതി ഉത്തരവിനെ തുടര്‍ന്ന് തിരഞ്ഞെടുപ്പ് കമ്മീഷന്‍ ഈ ഫയലുകള്‍ പരസ്യമാക്കിയിരിക്കുകയാണ്.

2018 മുതല്‍ ബോണ്ടുകള്‍ വഴി ധനസഹായം സ്വീകരിക്കുന്ന പാര്‍ട്ടികളുടെ പട്ടികയില്‍ 6,986.5 കോടി രൂപയുമായി ബിജെപിയാണ് മുന്നില്‍. 1,397 കോടിയുമായി മമതാ ബാനര്‍ജിയുടെ തൃണമൂല്‍ കോണ്‍ഗ്രസ് രണ്ടാമതും കോണ്‍ഗ്രസ് (1,334 കോടി രൂപ), ബിആര്‍എസ് (1,322 കോടി രൂപ) എന്നിവരും തൊട്ടുപിന്നിലുണ്ട്.