അരവിന്ദ് കേജ്രിവാളിന്റെ അറസ്റ്റില് പ്രതികരിച്ച് അദ്ദേഹത്തിന്റെ ഭാര്യ സുനിത കെജ്രിവാള്... കെജ്രിവാളിന്റെ ജീവിതം രാജ്യത്തിനായിട്ടാണ്; ഇത് ഡല്ഹിയിലെ ജനങ്ങളോടുള്ള വഞ്ചനയാണ്; അധികാരത്തിന്റെ അഹങ്കാരത്തിലാണ് മോദി അറസ്റ്റ് ചെയ്തത്
അരവിന്ദ് കേജ്രിവാളിന്റെ അറസ്റ്റില് ആദ്യമായി പ്രതികരിച്ച് അദ്ദേഹത്തിന്റെ ഭാര്യ സുനിത കെജ്രിവാള്. ഇത് ഡല്ഹിയിലെ ജനങ്ങളോടുള്ള വഞ്ചനയാണെന്നാണ് സുനിത പ്രതികരിച്ചത്. തന്റെ എക്സ് പേജിലൂടെയായിരുന്നു പ്രതികരണം. മദ്യനയ അഴിമതിക്കേസില് കെജ്രിവാള് അറസ്റ്റിലായ ശേഷമുള്ള സുനിതയുടെ ആദ്യപ്രതികരണമാണ് ഇത്. കെജ്രിവാളിന്റെ ജീവിതം രാജ്യത്തിന് വേണ്ടിയാണെന്നും മോദിക്ക് അധികാരത്തിന്റെ അഹങ്കാരമാണെന്നും സുനിത കുറിച്ചു.
അറസ്റ്റിന്റെ അനിവാര്യത ഇഡി കോടതിയെ അറിയിച്ചു. വാട്സ്ആപ്പ് ചാറ്റുകള് അടക്കമുള്ള തെളിവുകളുണ്ട്. നയരൂപീകരണത്തില് കേജ്രിവാളിന് നേരിട്ട് പങ്കുണ്ട്. പി എം എല് എ പ്രകാരമുള്ള നടപടി പാലിച്ചാണ് അറസ്റ്റ്. നയരൂപീകരണത്തിലും ലൈസന്സിലും കോഴ വാങ്ങി. അഴിമതിയില് മലയാളിയായ വിജയ് നായരാണ് ഇടനിലക്കാരന്. കെ കവിതക്കായി സൗജന്യങ്ങള് നല്കി. അഴിമതിപ്പണം പഞ്ചാബ്, ഗോവ തിരഞ്ഞെടുപ്പുകള്ക്കായി ഉപയോഗിച്ചെന്നും ഇഡി കോടതിയില് പറഞ്ഞു.
'കെജ്രിവാളിന്റെ ജീവിതം രാജ്യത്തിനായിട്ടാണ്. മൂന്നുതവണ നിങ്ങള് തിരഞ്ഞെടുത്ത മുഖ്യമന്ത്രിയെ അധികാരത്തിന്റെ അഹങ്കാരത്തിലാണ് മോദി അറസ്റ്റ് ചെയ്തത്. എല്ലാം തകര്ക്കാനാണ് മോദിയുടെ ശ്രമം. ഇത് ഡല്ഹിയിലെ ജനങ്ങളോടുള്ള വഞ്ചനയാണ്. നിങ്ങളുടെ മുഖ്യമന്ത്രി എപ്പോഴും നിങ്ങള്ക്കൊപ്പം നിന്നിട്ടുണ്ട്. അകത്തായാലും പുറത്തായാലും അദ്ദേഹത്തിന്റെ ജീവിതം രാജ്യത്തിന് വേണ്ടി സമര്പ്പിക്കപ്പെട്ടതാണ്. പൊതുസമൂഹത്തിന് ഇത് എല്ലാം അറിയാം. 'ജയ്ഹിന്ദ്'.- സുനിത എക്സില് കുറിച്ചു.
അതേസമയം, അരവിന്ദ് കേജ്രിവാളിനെ ഡല്ഹി റോസ് അവന്യൂ കോടതിയിലാണ് ഹാജരാക്കിയത്. ഇഡി ഓഫീസിലെ ചോദ്യം ചെയ്യലിന് ശേഷമാണ് കേജ്രിവാളിനെ കോടതിയില് എത്തിച്ചത്. കോടതി ഉടനെ ഉത്തരവ് പറയും. പത്ത് ദിവസത്തെ കസ്റ്റഡി ആവശ്യപ്പെട്ടിരിക്കുകയാണ് ഇഡി. അഡീഷണല് സോളിസിറ്റര് ജനറല് എസ് വി രാജുവാണ് ഇഡിക്ക് വേണ്ടി ഹാജരായത്. കേജ്രിവാളിന് വേണ്ടി മുതിര്ന്ന അഭിഭാഷകന് മനു അഭിഷേക് സിംഗ്വിയും ഹാജരായി.
https://www.facebook.com/Malayalivartha
