കേജരിവാളിനെ ജയിലില്‍ അടച്ച് പ്രധാനമന്ത്രി നരേന്ദ്ര മോദി സ്വയം കുഴിതോണ്ടുകയാണ്...വേട്ടയാടുന്ന ഓരോ മണിക്കൂറിലും മോദിയുടെ ഇമേജും ബിജെപിയുടെ ജനപിന്തുണയും ഇടിയുകയാണ്...
കേജരിവാളിനെ ജയിലില്‍ അടച്ച് പ്രധാനമന്ത്രി നരേന്ദ്ര മോദി സ്വയം കുഴിതോണ്ടുകയാണ്. അരവിന്ദ് കേജരിവാളിനെ വേട്ടയാടുന്ന ഓരോ മണിക്കൂറിലും മോദിയുടെ ഇമേജും ബിജെപിയുടെ ജനപിന്തുണയും ഇടിയുകയാണ്. അമിതാവേശവും അഹന്തയും ആള്‍പ്രമാണിത്വവും മോദിക്കു വിനയാകാന്‍ പോകുന്ന ദിവസങ്ങളാണ് ഇനി വരാനിരിക്കുന്നത്. അടുത്തയാഴ്ച മുതല്‍ ദേശീയതലത്തില്‍ മോദി പ്രചാരണത്തിന് ഇറങ്ങുമ്പോള്‍ മോദിക്കെതിരെയുള്ള ജനവികാരം പരസ്യമായി പുറത്തുവരുമെന്ന് വ്യക്തമാണ്.ദേശീയതലത്തില്‍ 400 സീറ്റ് പിടിക്കുമെന്ന് മോദി ആവേശം പറയുമ്പോഴും ബിജെപി ഓരോ ദിവസവും ഓരോ മണിക്കൂറും പിന്നോട്ടടിക്കുന്നതായാണ് ഒരു വിഭാഗം സര്‍വെകള്‍ വിശദമാക്കുന്നത്.
ഡല്‍ഹിയിലും ഹരിയാനയിലും പഞ്ചാബിലും ആം ആദ്മിയും കോണ്‍ഗ്രസും ഉള്‍പ്പെടുന്ന മുന്നണി ബിജെപിയെ തറപറ്റിക്കുമെന്ന സാഹചര്യമാണ്. ഈ സംസ്ഥാനങ്ങളില്‍ ഒരു സീറ്റുപോലും ബിജെപിക്കു ലഭിക്കില്ലെന്നതാണ് നിലവിലെ സാഹചര്യം. ഡല്‍ഹിയില്‍ ഒരു സീറ്റില്‍ പോലും വിജയിക്കാനാവാത്ത വിധം ബിജെപി ദുര്‍ബലമായി ദുര്‍ബലമായിക്കൊണ്ടിരിക്കുന്നു. തെരഞ്ഞെടുപ്പിന് തൊട്ടുമുന്‍പ് കേജരിവാളിനെ ഇത്തരത്തില്‍ വേട്ടയാടുന്ന സാഹചര്യത്തില്‍ ജനങ്ങളുടെ വെറുപ്പ് മാത്രമാണ് ബിജെപി സമ്പാദിച്ചുകൊണ്ടിരിക്കുന്നത്. നിലവിലെ സാഹചര്യത്തില്‍ ഉത്തര്‍പ്രദേശിലും ഉത്തരാഖണ്ഡിലും മാത്രമാണ് ബിജെപിക്ക് ശക്തമായ ആധിപത്യം നേടാന്‍ സാധ്യത തെളിയുന്നത്. മുന്‍പ് രാഹുല്‍ ഗാന്ധിയെ മോശം പ്രയോഗത്തിന്റെ പേരില്‍ ലോകസഭാംഗത്വം നഷ്ടമാക്കിയതു മുതല്‍ ബിജെപിയുടെ പകപോക്കല്‍ രാഷ്ട്രീയം ദേശീയതലത്തില്‍ ശ്രദ്ധിക്കപ്പെട്ടിരുന്നതാണ്.
അരവിന്ദ് കേജരിവാളിനെ രാഷ്ട്രീയമായി വേട്ടയാടുക മാത്രമല്ല ജയിലില്‍ പാര്‍പ്പിക്കുക വഴി കേജരിവാളിന് ഇന്ത്യാ മുന്നണിക്കുവേണ്ടി പ്രചാരണം നടത്താനുള്ള സാധ്യതയാണ് ഇല്ലാതാക്കിയിരിക്കുന്നത്. ബിജെപിക്ക് പ്രമാണിത്വമുള്ള ആറ് സംസ്ഥാനങ്ങളില്‍ കേജരിവാള്‍ ഇന്ത്യാ മുന്നണിക്കുവേണ്ടി പ്രചാരണം നടത്താനിരിക്കെയാണ് ഡല്‍ഹി മുഖ്യമന്ത്രിയെ ബിജെപി വേട്ടയാടാന്‍ തയാറായിരിക്കുന്നത്. ബംഗാള്‍ മുഖ്യമന്ത്രി മമതാ ബാനര്‍ജിയും നാല് സംസ്ഥാനങ്ങളില്‍ തെരഞ്ഞെടുപ്പ് പ്രചാരണത്തിന് തയാറാവുകയാണ്. ഒരാഴ്ചയ്ക്കുള്ളില്‍ മമതയ്‌ക്കെതിരെയും ബിജെപി ശക്തമായ കരുനീക്കം നടത്തുമെന്ന് വ്യാപകമായ ആശങ്ക ഉയരുന്നുണ്ട്.ഇനിയുമൊരിക്കല്‍ക്കൂടി ഭരണത്തിലെത്തിയാല്‍ ബിജെപി പ്രാദേശിക പാര്‍ട്ടികളെ വേട്ടയാടുകയും നേതാക്കളെ ജയിലില്‍ അടയ്ക്കുകയും ചെയ്യാന്‍ മടിക്കില്ലെന്ന വികാരമാണ് ഓരോ സംസ്ഥാനങ്ങളില്‍ ഉയര്‍ന്നുകൊണ്ടിരിക്കുന്നത്.
മധ്യപ്രദേശിലും അരുണാചല്‍പ്രദേശിലും കോണ്‍ഗ്രസ് സര്‍ക്കാരുകളെ പിളര്‍ത്തി വീഴിച്ച നെറികെട്ട ബിജെപിയുടെ കച്ചവടനീക്കത്തിനെതിരെ വിമര്‍ശനം ശക്തമാണ്. രാജസ്ഥാനില്‍ ഉള്‍പ്പെടെ കോണ്‍ഗ്രസിനെ പിളര്‍ത്താന്‍ നടത്തിയ നീക്കങ്ങളും തരതാഴ്ന്നതായിരുന്നു.മോദിയുടെയും അമിത് ഷായുടെയും സ്വന്തം തട്ടകമായ ഗുജറാത്തിലെ ബിജെപിയില്‍ മൂന്നു ശക്തമായ ഗ്രൂപ്പുകളാണ് നിലവിലുള്ളത്. മധ്യപ്രദേശിലും രാജസ്ഥാനിലും ശക്തമായ ഗ്രൂപ്പുകളി ബിജെപിയെ വലയ്ക്കുന്നുണ്ട്. കോണ്‍ഗ്രസ് വിട്ട് ബിജെപിയില്‍ ചേര്‍ന്നവരും പഴയ ബിജെപിക്കാരും തമ്മില്‍ സീറ്റിനെച്ചൊല്ലിയുള്ള കൂട്ടയടി പാര്‍ട്ടിക്ക് വലിയ തലവേദയുണ്ടാക്കിവരുന്നു.
നിലവിലെ രാഷ്ട്രീയ സാഹചര്യത്തില്‍ തമിഴ് നാട്, കര്‍ണാടക, കേരളം, തെലങ്കാന, ഗോവ സംസ്ഥാനങ്ങളില്‍ ബിജെപി കച്ചിയടിക്കില്ലെന്ന് വ്യക്തമാണ്.
കേജരിവാളിനെതിരെ നടത്തുന്ന നീക്കം വടക്കന്‍ സംസ്ഥാനങ്ങളില്‍ വ്യാപകമായ പ്രതിഷേധം ഉയര്‍ത്തുകയാണ്. മഹാരാഷ്ട്രയിലും ബിജെപിയും വിമത വിഭാഗം ശിവസേനയും എന്‍സിപിയും തമ്മില്‍ ശക്തമായ പോരാണ് നിലനില്‍ക്കുന്നത്.ദേശീയതലത്തില്‍ ബിജെപി 175 സീറ്റുകളിലേക്ക് ഒതുക്കപ്പെടാനുള്ള രാഷ്ട്രീയസാഹചര്യമാണ് ഇന്നു നിലവിലുള്ളത്. ഇന്ത്യാ മുന്നണിയെ മാത്രമല്ല കോണ്‍ഗ്രസിനെ ഓരോ ദിവസവും പിളര്‍ത്തി പ്രതിപക്ഷത്തെ ഇല്ലാതാക്കുന്ന ബിജെപി നയത്തോട് ദേശീയ തലത്തില്‍ എതിര്‍പ്പ് ശക്തമാണ്. രാജ്യത്ത് ശക്തമായ പ്രതിപക്ഷമില്ലെന്ന വികാരം ദേശീയതലത്തില്‍ ഉയരുന്നുണ്ട്. ബിജെപിയുടെ പകപോക്കല്‍ രാഷ്ട്രീയം മോദിക്കും ബിജെപി മുന്നണിക്കും വിനയാകുന്ന സാഹചര്യം അടുത്ത ലോക് സഭാ തെരഞ്ഞെടുപ്പില്‍ വ്യക്തമാകും. അപ്രതീക്ഷിത മണ്ഡലങ്ങലില്‍ ബിജെപി തകരാന്‍ പോകുന്ന സാഹചര്യവും നിലവിലുണ്ട്.
https://www.facebook.com/Malayalivartha
