ലോകമെമ്പാടുമുള്ള ജനങ്ങളുടെ പ്രാര്‍ത്ഥന ദൈവം കേട്ടില്ല. രാജ്യത്തിന്റെ അഭിമാനം ലാന്‍സ് നായ്ക് ഹനുമന്തപ്പ കൊപ്പാഡ് ഈ ലോകത്തോട് വിടവാങ്ങി. സിയാച്ചിനിലെ ഹിമപാതത്തെ അതിജീവിച്ച് ആറു ദിവസത്തോളം മഞ്ഞിനടിയില്‍ 25 അടി താഴ്ചയില്‍ കഴിഞ്ഞ ഹനുമന്തപ്പയെ ജീവിതത്തിലേക്ക് തിരിച്ചുകൊണ്ടുവരാന്‍ തീവ്ര ശ്രമം നടത്തുന്നതിനിടെ വ്യാഴാഴ്ച രാവിലെ 11.45 ന് ഡല്‍ഹിയിലെ ആര്‍.ആര്‍ ആശുപത്രിയിലാണ് മരണമടഞ്ഞത്.

ഇന്നു രാവിലെയോടെ ഹനുമന്തപ്പയുടെ നില വീണ്ടും ഗുരുതരമാകുകയായിരുന്നു. അവയവങ്ങളുടെ പ്രവര്‍ത്തനം പൂര്‍ണ്ണമായും നിലയ്ക്കുകയും ശ്വാസതടസ്സം നേരിടുകയും ചെയ്തതോടെയാണ് മരണത്തിലേക്ക് വഴുതിവീണത്. അന്ത്യസമയത്ത് കുടുംബാംഗങ്ങളും സൈനിക മേധാവികളും അദ്ദേഹത്തിനൊപ്പമുണ്ടായിരുന്നു. കര്‍ണാടക സ്വദേശിയാണ് ഹനുമന്തപ്പ.
19 മദ്രാസ് റെജിമെന്റിലെ ഹനുമന്തപ്പയടക്കം പത്തു പേരാണ് ഫെബ്രുവരി മൂന്നിന് ഹിമപാതത്തില്‍ പെട്ടത്. മലയാളി സൈനികനടക്കം ഒമ്പതുപേരും മഞ്ഞിനടിയില്‍ തന്നെ കിടന്ന് ജീവന്‍വെടിഞ്ഞു. എന്നാല്‍ മഞ്ഞുപാളികള്‍ക്കിടയിലെ കിടങ്ങില്‍ കഴിഞ്ഞിരുന്ന ഹനുമന്തപ്പ ജീവന്‍ പിടിച്ചുനിര്‍ത്താനുള്ള പോരാട്ടത്തിലായിരുന്നു. ആറു ദിവസത്തോളം 45 ഡിഗ്രി സെന്‍ഷ്യസില്‍ കഴിഞ്ഞിരുന്ന ഹനുമന്തപ്പയുടെ അതിജീവനത്തെ 'സിയാച്ചിന്‍ മിറക്കിള്‍'എന്നാണ് വിശേഷിപ്പിച്ചത്.

ജീവന്റെ തുടിപ്പുകള്‍ കണ്ടെത്തിയതോടെയാണ് സൈനിക ആശുപത്രിയിലേക്ക് മാറ്റിയത്. മൂന്നു ദിവസം വൈദ്യശാസ്ത്രം കിണഞ്ഞുപരിശ്രമിച്ചിട്ടും ഹനുമന്തപ്പയെ ജീവിതത്തിലേക്ക് മടക്കികൊണ്ടുവരാന്‍ കഴിഞ്ഞില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha