മെയ്ക്ക് ഇന്‍ ഇന്ത്യ വാരാചരണത്തിന്റെ ഭാഗമായി മുംബൈയിലെ ഗിര്‍ഗാവ് ചൗപ്പാട്ടിയില്‍ നടത്തിയ സാംസ്‌കാരിക പരിപാടിക്കിടെ വന്‍തീപിടുത്തം. വേദി പൂര്‍ണമായി കത്തിനശിച്ചു. തിക്കിലും തിരക്കിലുംപെട്ട് നിരവധിപ്പേര്‍ക്കു പരുക്കേറ്റു.
ഗവര്‍ണര്‍ സി. വിദ്യാസാഗര്‍ റാവു, ശിവസേനാ നേതാവ് ഉദ്ധവ് താക്കറേ, ചലച്ചിത്ര താരങ്ങളായ അമിതാഭ് ബച്ചന്‍, ആമിര്‍ ഖാന്‍, ഹേമമാലിനി എന്നിവര്‍ പങ്കെടുത്ത പരിപാടിക്കിടെയാണു തീപിടിത്തമുണ്ടായത്. ചടങ്ങില്‍ പങ്കെടുക്കാനെത്തിയ മുഖ്യമന്ത്രി ദേവേന്ദ്ര ഫഡ്‌നാവിസ് രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കി.
കടല്‍ത്തീരത്താണു മഹാരാഷ്ട്ര സര്‍ക്കാര്‍ പരിപാടിക്കായി വേദി തയാറാക്കിയിരുന്നത്. കവിത അവതരിപ്പിച്ചശേഷം അമിതാഭ് ബച്ചന്‍ വേദിവിട്ടതിനു പിന്നാലെയാണു തീ ഉയര്‍ന്നത്. നൃത്ത പരിപാടിക്കിടെ വേദിയുടെ അടിയില്‍നിന്നാണു തീ ഉയര്‍ന്നതെന്നു ദൃക്‌സാക്ഷികള്‍ പറഞ്ഞു. ഈ സമയം വേദിക്കു സമീപം ഒരു ഫയര്‍ എന്‍ജിന്‍ മാത്രമാണ് ഉണ്ടായിരുന്നത്. കടല്‍ക്കാറ്റേറ്റ് തീപടര്‍ന്നതോടെ നാലായിരത്തോളം വരുന്ന കാണികള്‍ ഓടിരക്ഷപ്പെടാന്‍ ശ്രമിച്ചു. ഇതാണു കൂടുതല്‍പ്പേര്‍ക്കു പരുക്കേല്‍ക്കാന്‍ കാരണമായത്. ഉടന്‍തന്നെ പോലീസ് ഇടപെട്ട് വിദേശനയതന്ത്ര പ്രതിനിധികളെ സുരക്ഷിത കേന്ദ്രങ്ങളിലേക്കു മാറ്റി. 16 ഫയര്‍ എന്‍ജിനുകള്‍ എത്തിയാണു തീ അണച്ചത്. സംഭവത്തെക്കുറിച്ച് അന്വേഷണം നടത്തുമെന്നു മുഖ്യമന്ത്രി ദേവേന്ദ്ര ഫഡ്‌നാവിസ് അറിയിച്ചു.

നേരത്തെ ഗിര്‍ഗാവില്‍ പരിപാടി നടത്തുന്നത് ബോംബെ ഹൈക്കോടതി തടഞ്ഞിരുന്നു. പിന്നീട് സുപ്രീംകോടതി വിധിയുടെ അടിസ്ഥാനത്തിലാണു പരിപാടി നടത്തിയത്.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha