ഹോംസ്‌റ്റേയില്‍ ഇരുപത്തിയേഴുകാരിയെ ദുരൂഹ സാഹചര്യത്തില്‍ വിവസ്ത്രയായി മരിച്ച നിലയില്‍ കണ്ടെത്തി. ഗുരുഗ്രാമിലെ ഐടി കമ്പനിയിലെ ജീവനക്കാരി പി. രാധാ ഗായത്രിയാണ് മരിച്ചത്. ഉത്തരാഖണ്ഡിലെ വിനോദസഞ്ചാര കേന്ദ്രമായ മസൂറിയിലാണ് സംഭവം. ഭര്‍ത്താവ് സൗമ്യ ശ്രീചരനൊപ്പം മസൂറിയില്‍ ടൂറിനെത്തിയതായിരുന്നു ഇവര്‍. പുണെയിലുള്ള ഐടി പ്രൊഫഷണലാണ് ഭര്‍ത്താവ് ശ്രീചരണ്‍. ആന്ധ്രാപ്രദേശിലെ വിശാഖപട്ടണം സ്വദേശികളായ ഇരുവരും 2025 നവംബര്‍ എട്ടിനായിരുന്നു വിവാഹിതരായത്.

പൊലീസ് നല്‍കുന്ന വിവരങ്ങള്‍ പ്രകാരം ജൂണ്‍ 13ന് ഡല്‍ഹിയില്‍ നിന്നും ഋഷികേശിലെത്തിയ ദമ്പതികള്‍, പിറ്റേന്ന് (ജൂണ്‍ 14) രാത്രി വൈകിയാണ് മസൂറിയിലെ തിപ്രിധാറിലുള്ള ഹോംസ്‌റ്റേയില്‍ എത്തിയത്. രാത്രി 11.30ഓടെ ഇവര്‍ ഹോംസ്‌റ്റേയിലെ മുറിയില്‍ ചെക്ക്ഇന്‍ ചെയ്തു. ഭര്‍ത്താവിന്റെ മൊഴിയനുസരിച്ച് രാത്രിയില്‍ ഇരുവരും ഒരുമിച്ച് മദ്യപിച്ച ശേഷം പുലര്‍ച്ചെ 3.30ഓടെയാണ് ഉറങ്ങാന്‍ കിടന്നത്. എന്നാല്‍ രാവിലെ ഉണര്‍ന്നപ്പോള്‍ ഭാര്യയെ വിവസ്ത്രയായ നിലയില്‍ മുറിയിലെ തറയില്‍ അബോധാവസ്ഥയില്‍ കണ്ടെത്തുകയായിരുന്നുവെന്ന് ഭര്‍ത്താവ് പൊലീസിനോട് പറഞ്ഞു. മൂക്കില്‍ നിന്ന് ചോര ഒലിച്ച നിലയിലായിരുന്നു മൃതദേഹം.

ഇന്നലെ രാവിലെയാണ് ഹോംസ്‌റ്റേയില്‍ യുവതി അബോധാവസ്ഥയിലാണെന്ന വിവരം മസൂറി പൊലീസിന് ലഭിക്കുന്നത്. ഉടന്‍ തന്നെ ആംബുലന്‍സും പൊലീസും സ്ഥലത്തെത്തി. ആംബുലന്‍സിലുണ്ടായിരുന്ന ഫാര്‍മസിസ്റ്റ് പരിശോധിച്ച ശേഷമാണ് യുവതി മരിച്ചതായി സ്ഥിരീകരിച്ചത്. മൃതദേഹം വസ്ത്രങ്ങളില്ലാതെയായിരുന്നു തറയില്‍ കിടന്നിരുന്നത്. കട്ടിലിലെ വിരിപ്പില്‍ രക്തക്കറകള്‍ കണ്ടെത്തിയിട്ടുണ്ട്. മുറിയില്‍ നിന്നും രണ്ട് ഒഴിഞ്ഞ മദ്യക്കുപ്പികളും ഭക്ഷണാവശിഷ്ടങ്ങളും പൊലീസ് കണ്ടെടുത്തു. മരണത്തില്‍ ദുരൂഹതയുള്ളതിനാല്‍ സംഭവത്തിന്റെ യഥാര്‍ത്ഥ കാരണം കണ്ടെത്താന്‍ പൊലീസ് ഊര്‍ജിതമായ അന്വേഷണമാണ് നടത്തുന്നത്. യുവതിയുടെ മൃതദേഹം ഡെറാഡൂണിലെ കൊറോണേഷന്‍ ആശുപത്രിയിലേക്ക് പോസ്റ്റ്‌മോര്‍ട്ടത്തിനായി മാറ്റി.