ഏഷ്യൻ ഗെയിസിൽ ദേശീയ റെക്കോർഡോടെ 400 മീറ്റർ ഹർഡിൽസിൽ വിദ്യ രാംരാജിന് വെങ്കലം. 54.75 സെക്കൻഡിൽ ഓടിയെത്തിയാണ് വിദ്യ ദേശീയ റെക്കോർഡ് സ്വന്തമാക്കിയത്.

ഈ നേട്ടത്തോടെ 1984 ലോസ് ആഞ്ചലെസ് ഒളിംപിക്‌സിൽ പിടി ഉഷയുടെ റെക്കോർഡ് പഴങ്കഥയായി. 55.42 സെക്കൻഡായിരുന്നു പിടി ഉഷയുടെ റെക്കോർഡ്. യുഎഇയുടെ മറിയം കരീം റെക്കോർഡോടെ ചരിത്രനേട്ടം കുറിച്ചാണ് 400 മീറ്റർ ഹർഡിൽസിൽ സ്വർണം നേടിയത്.

പതിനെട്ടുകാരിയായ മറിയം 54.31 സെക്കൻഡ് വേഗത്തിൽ ഫിനിഷിങ് ലൈൻ തൊടുകയും ചെയ്തു. ഇന്ത്യയുടെ തന്നെ അനു രാഘവനാണ് അഞ്ചാമത്. 55.88 സെക്കൻഡ് സമയം. നാഗോയയിൽ 400 മീറ്റർ ഹർഡിൽസ് ഫൈനലിൽ വെങ്കലം നേടി കൊണ്ടാണ് വിദ്യ റെക്കോർഡ് തകർത്തത്.

2023 ഹാങ്ചൗവിലെ ഏഷ്യൻ ഗെയിംസിൽ വിദ്യ പിടി ഉഷയുടെ റെക്കോഡിനൊപ്പമെത്തിയിട്ടുണ്ടായിരുന്നു. അന്ന് ഹീറ്റ്‌സിലാണ് 55.42 സെക്കൻഡിൽ ഫിനിഷ് ചെയ്തത്. ഇക്കുറി അത് മറികടക്കാനായി വിദ്യയ്ക്ക് സാധിച്ചു.