തമിഴ്‌നാട് മുഖ്യമന്ത്രിയെ വിജയ്‌യെ സന്ദര്‍ശിച്ചതിന്റെയും ചര്‍ച്ച നടത്തിയതിന്റെയും ചിത്രങ്ങള്‍ ഇന്‍സ്റ്റഗ്രാമില്‍ പങ്കുവച്ചിരിക്കുകയാണ് നടി സാമന്ത. ഒപ്പം വിജയ്‌യെ കുറിച്ച് ഹൃദ്യമായൊരു കുറിപ്പും സാമന്ത പങ്കുവച്ചു. വിജയ് സാര്‍ ഒരിക്കലും സിനിമയില്‍ ഒരു ഹീറോയാകാന്‍ വേണ്ടി മാത്രം ജനിച്ചയാളല്ല എന്നാണ് സാമന്ത പറയുന്നത്. അദ്ദേഹത്തിന്റെ ഊര്‍ജ്ജം, സാന്നിദ്ധ്യം, അദ്ദേഹത്തോട് ജനങ്ങള്‍ പ്രതികരിക്കുന്ന വിധം എന്നിവയെല്ലാം കാരണം അദ്ദേഹം വലിയ കാര്യങ്ങള്‍ക്കായി ഉദ്ദേശിച്ചുള്ളയാളാണെന്ന് തോന്നിയിരുന്നെന്ന് സാമന്ത പറയുന്നു.

'ഇന്ന് ചെന്നൈയില്‍ വിമാനമിറങ്ങിയപ്പോള്‍ അപാരമായൊരു സന്തോഷം തോന്നി. ഞാന്‍ നമ്മുടെ മുഖ്യമന്ത്രിയെ കാണാന്‍ പോകുകയായിരുന്നു. എനിക്കെപ്പോഴും തോന്നിയിട്ടുണ്ട്, വിജയ് സാര്‍ ഒരിക്കലും സ്‌ക്രീനിലെ ഒരു ഹീറോയായി മാത്രം ഇരിക്കാന്‍ ഉദ്ദേശിച്ചുള്ള ആളല്ല. അദ്ദേഹത്തിന്റെ ഊര്‍ജ്ജം, അദ്ദേഹത്തിന്റെ സാന്നിദ്ധ്യം, ജനങ്ങള്‍ അദ്ദേഹത്തോട് പ്രതികരിക്കുന്ന രീതി ഇവയെല്ലാം കാരണം അദ്ദേഹം വലിയ കാര്യങ്ങള്‍ക്കായി ഉദ്ദേശിച്ചിട്ടുള്ളയാളാണെന്ന് തോന്നിയിരുന്നു.

തികച്ചും പുതിയൊരു മേഖലയിലേക്ക് കാലെടുത്തുവയ്ക്കാനുള്ള അദ്ദേഹത്തിന്റെ ധൈര്യമാണ് എന്നെ പ്രചോദിപ്പിച്ചത്. ഇതിനകം പ്രാവീണ്യം നേടിയമേഖലയെ ഉപേക്ഷിച്ച് വെല്ലുവിളികള്‍ ഏറ്റെടുക്കുക. ഇത് എളുപ്പമായിട്ടല്ല, പകരം ഒരു മാറ്റം നിങ്ങള്‍ക്കുണ്ടാക്കാനാകും എന്ന് കരുതുന്നതിനാലാണിത്. ജീവിതത്തില്‍ ഒരു ഘട്ടത്തില്‍ കൂടുതല്‍ കാര്യങ്ങള്‍ ചെയ്യാന്‍ നിയോഗിക്കപ്പെട്ടവരാണ് നമ്മളെന്ന് ഞാന്‍ കരുതുന്നു. നമ്മളെത്തന്നെ മറികടന്ന് നമുക്കെങ്ങനെ സംഭാവനചെയ്യാമെന്ന് ചോദിക്കുക. വളരെകുറച്ച് ആളുകള്‍ മാത്രമാണ് ആ വിളിയോട് പ്രതികരിച്ചത്.

പ്രതീക്ഷിച്ചതിലധികം വിജയ്ക്ക് ചെയ്തുകാണിക്കാന്‍ കഴിയുമെന്ന് ഞാന്‍ കരുതുന്നു, അദ്ദേഹം വഹിക്കുന്ന സ്ഥാനംകൊണ്ടല്ല അത്, മറിച്ച് അദ്ദേഹം അതിനെ സമീപിക്കുന്ന ഉദ്ദേശ്യം കൊണ്ടാണ്. ശക്തിയും ജ്ഞാനവും ലക്ഷ്യത്തിലെത്തിച്ചേരാനുള്ള ധൈര്യവും അദ്ദേഹത്തിനുണ്ടാകട്ടെയെന്ന് ആശംസനേരുന്നു. ഇത് കാണുന്ന ഓരോ ചെറുപ്പക്കാര്‍ക്കും നിങ്ങള്‍ ആരംഭിച്ചതിനെക്കാള്‍ എത്രയോ വലുതാകാം സ്വപ്‌നമെന്ന് ഓര്‍മ്മപ്പെടുത്തട്ടെ.' ദീര്‍ഘമായ കുറിപ്പില്‍ സാമന്ത പറയുന്നു.