സ്ത്രീകളെ അപമാനിച്ചാല് കടുത്ത നടപടിയെന്ന് തമിഴ്നാട് മുഖ്യമന്ത്രി
സ്ത്രീകളെ മോശമായി ചിത്രീകരിക്കുകയോ അപമാനിക്കുകയോ ചെയ്താല് ശക്തമായ നടപടിയുണ്ടാകുമെന്ന് തമിഴ്നാട് മുഖ്യമന്ത്രി വിജയ് നിയമസഭയില് വ്യക്തമാക്കി. പ്രതിപക്ഷ നേതാവ് ഉദയനിധി സ്റ്റാലിന് നടി തൃഷയ്ക്കെതിരെ നടത്തിയ വിവാദ ദ്വയാര്ഥ പരാമര്ശങ്ങളുടെ പശ്ചാത്തലത്തിലായിരുന്നു മുഖ്യമന്ത്രിയുടെ പ്രതികരണം. സഭയില് ആരുടെയും പേരെടുത്ത് പറയാതെയായിരുന്നു വിജയ്യുടെ വിമര്ശനം.
ഭരണഘടന നല്കുന്ന ആവിഷ്കാര സ്വാതന്ത്ര്യം എങ്ങനെയാണ് ഉപയോഗിക്കേണ്ടതെന്ന് നാമെല്ലാവരും ആത്മപരിശോധന നടത്തണമെന്നും അദ്ദേഹം പറഞ്ഞു. നമ്മുടെയെല്ലാം വീടുകളില് അമ്മമാരും സഹോദരിമാരുമുണ്ടെന്നും പൊതുവേദിയില് ഇത്തരം ദ്വയാര്ഥ വാക്കുകള് ഉപയോഗിക്കുന്നത് ജനങ്ങള് കാണുന്നുണ്ടെന്നും വിജയ് പറഞ്ഞു. സംസ്ഥാനത്തിന്റെ വികസനത്തിന് ക്രമസമാധാനപാലനം അത്യാവശ്യമാണെന്നും പോലീസ് സേനയെ വെറും അറസ്റ്റ് ചെയ്യാനുള്ള ഒരു ഏജന്സിയായി മാത്രം കാണരുതെന്നും മുഖ്യമന്ത്രി സഭയില് കൂട്ടിച്ചേര്ത്തു. നിയമം പാലിക്കുന്നവര്ക്ക് പോലീസ് സുഹൃത്തും അല്ലാത്തവര്ക്ക് ശത്രുവുമായിരിക്കും.
പോലീസിന്റെ ഔദ്യോഗിക കാര്യങ്ങളില് മുഖ്യമന്ത്രിയോ മന്ത്രിമാരോ മറ്റ് ഉദ്യോഗസ്ഥരോ ഇടപെടാന് പാടില്ലെന്ന നിലപാടാണ് തനിക്കുള്ളതെന്നും വിജയ് വ്യക്തമാക്കി. നടിയും വിജയ്യുടെ അടുത്ത സുഹൃത്തുമായ തൃഷയെ ലക്ഷ്യംവെച്ച് ഉദയനിധി സ്റ്റാലിന് ദ്വയാര്ഥ പരാമര്ശം നടത്തിയെന്ന കേസില് കഴിഞ്ഞമാസം ഉദയനിധി സ്റ്റാലിനെ പോലീസ് അറസ്റ്റ് ചെയ്തിരുന്നു. പിന്നീട് സ്റ്റേഷന് ജാമ്യത്തില് വിട്ടയച്ചെങ്കിലും വിജയ് സര്ക്കാരിന്റേത് രാഷ്ട്രീയ പ്രതികാരമാണെന്നായിരുന്നു ഉദയനിധിയുടെ പ്രതികരണം.
https://www.facebook.com/Malayalivartha
