ഹരിയാനയില്‍ സര്‍ക്കാര്‍ സ്‌കൂളിലെ ഒഴിഞ്ഞ ക്ലാസ്മുറിയില്‍ ആറുവയസുകാരിയെ എട്ടുവയസുകാരന്‍ ക്രൂരമായി മര്‍ദിക്കുന്നതിന്റെ ദൃശ്യങ്ങള്‍ പുറത്ത്. ഹരിയാനയിലെ പഞ്ച്ഗുളയിലാണ് സംഭവം. അക്രമം നടത്തിയ കുട്ടി മൊബൈല്‍ ഗെയിമിന് അടിമയാണെന്നാണ് ആറുവയസുകാരിയുടെ അമ്മാവന്‍ ഫാസിലിന്റെ വെളിപ്പെടുത്തല്‍. പബ്ജി ഉള്‍പ്പെടെയുള്ള ഗെയിമുകള്‍ കുട്ടി സ്ഥിരം കളിച്ചിരുന്നതായി പിതാവും പറഞ്ഞിട്ടുണ്ട്.

ആക്രമണത്തിന് പിന്നാലെ ആശുപത്രിയില്‍ പ്രവേശിപ്പിച്ച പെണ്‍കുട്ടിക്ക് ഏകദേശം 40 മണിക്കൂറിന് ശേഷമാണ് ബോധം തിരികെ കിട്ടിയത്. സംഭവത്തില്‍ അന്വേഷണം നടത്താന്‍ ഹരിയാന സര്‍ക്കാര്‍ അഞ്ചംഗ അന്വേഷണ സമിതിയെ നിയോഗിച്ചിട്ടുണ്ട്. സംസ്ഥാനത്തെ സ്‌കൂളുകളില്‍ സമഗ്ര സുരക്ഷാ പരിശോധന നടത്താനും സര്‍ക്കാര്‍ തീരുമാനിച്ചു.

ആറുവയസുകാരിയെ എട്ടുവയസുകാരന്‍ ഇടിക്കുകയും ചവിട്ടുകയും ചെയ്യുന്നതിന്റെ ദൃശ്യങ്ങള്‍ പുറത്തുവന്നതോടെയാണ് സംഭവം ചര്‍ച്ചയായത്. കുട്ടിയുടെ തലയ്ക്ക് പരിക്കേല്‍പ്പിക്കാനായി കല്ലുകളും പൂച്ചട്ടിയും ഉപയോഗിക്കുന്നതും ദൃശ്യങ്ങളില്‍ നിന്ന് വ്യക്തമാണ്. കൊലപാതകശ്രമത്തിന് സമാനമായ രീതിയിലായിരുന്നു ആക്രമണം. ഗുരുതരമായി പരിക്കേറ്റ ആറുവയസുകാരി ആശുപത്രിയില്‍ ചികിത്സയിലാണ്. കുട്ടിയുടെ ആരോഗ്യനിലയില്‍ പുരോഗതിയുണ്ടെന്നാണ് വിവരം.

ആക്രമണം നടത്തിയ ആണ്‍കുട്ടി ആറുവയസുകാരിയെ ഭ്രാന്തിയെന്ന് വിളിച്ച് പരിഹസിക്കാറുണ്ടായിരുന്നു. ഇതിനെ പെണ്‍കുട്ടി ചോദ്യം ചെയ്‌പ്പോഴായിരുന്നു ആക്രമണമെന്ന് ഫാസില്‍ പറഞ്ഞു. ഒഴിഞ്ഞ ക്ലാസ് മുറിയിലേക്ക് തന്ത്രപൂര്‍വം കൂട്ടിക്കൊണ്ടുപോയ ശേഷമായിരുന്നു മര്‍ദനം. കുട്ടികളുടെ സുരക്ഷയില്‍ വീഴ്ച വരുത്തിയെന്നാരോപിച്ച് രണ്ട് ജൂനിയര്‍ ബേസിക് ട്രെയിനിംഗ് അദ്ധ്യാപകരെ ഹരിയാന വിദ്യാഭ്യാസ വകുപ്പ് സസ്‌പെന്‍ഡ് ചെയ്തു. സംസ്ഥാനത്തെ ബാലാവകാശ കമ്മീഷനും വിഷയത്തില്‍ ഇടപെട്ടിട്ടുണ്ട്.