രണ്ടാഴ്ചക്കകം 22 പുതിയ നിര്‍ദേശങ്ങള്‍ ഉള്‍പ്പെട്ട വ്യോമയാന നയം പുറത്തിറക്കാനാണ് ശ്രമം. പ്രാദേശിക വിമാനയാത്രകള്‍ വര്‍ധിപ്പിക്കുന്നതിനായാണ് പുതിയ വ്യോമയാന നയത്തില്‍ സുപ്രധാന വ്യവസ്ഥകള്‍ കൂട്ടിച്ചേര്‍ത്തിട്ടുള്ളത്. ഒരു മണിക്കൂര്‍ വരെ എടുക്കുന്ന യാത്രകളില്‍ 2500 രൂപയിലധികം യാത്രക്കാരോട് എയര്‍ലൈനുകള്‍ ഈടാക്കരുതെന്നാണ് വ്യോമയാന നയത്തിലെ സുപ്രധാന വ്യവസ്ഥകളിലൊന്ന്. മന്ത്രിസഭയുടെ അംഗീകാരം ലഭിക്കുന്നതോടെ നയം പ്രാവര്‍ത്തികമാക്കി തുടങ്ങും. 

ഏവിയേഷന്‍ വ്യവസായ മേഖല പുതിയ നയവുമായി യാത്രക്കാരെ ആകര്‍ഷിക്കാനുള്ള തത്രപ്പാടിലാണ്. സിവില്‍ ഏവിയേഷന്‍ സെക്രട്ടറി രാജീവ് നയന്‍ ചൗബേയാണ് ഇക്കാര്യം അറിയിച്ചത്. വ്യോമയാനമന്ത്രാലയം എയര്‍ലൈനുകളുമായി നടത്തിയ അഭിപ്രായ സമന്വയങ്ങള്‍ക്കൊടുവിലാണ് പുതിയ വ്യവസ്ഥ കൂടി ഉള്‍പ്പെടുത്തിയത്. 

ആഭ്യന്തര എയര്‍ലൈനുകള്‍ക്ക് രാജ്യത്തിന് പുറത്തേക്ക് സര്‍വ്വീസ് നടത്തുന്ന 5/20 നിയമം ഇല്ലാതാക്കാനും തീരുമാനിച്ചിട്ടുണ്ട്. ഡൊമസ്റ്റിക് വിമാന കമ്പനികള്‍ക്ക് 20 എയര്‍ക്രാഫ്റ്റുകളും അഞ്ച് വര്‍ഷം അനുഭവ പരിചയവും ഉണ്ടെങ്കില്‍ മാത്രമേ അന്താരാഷ്ട്ര സര്‍വ്വീസ് അനുവദിക്കൂവെന്നാണ് ഈ നിയമം. 

0/20 എന്ന രീതിയില്‍ മാറ്റമുണ്ടാക്കാനാണ് കരട് നയം ശ്രമിക്കുന്നതെന്നാണ് റിപ്പോര്‍ട്ട്. 20 വിമാനങ്ങള്‍ സ്വന്തമായുണ്ടാവുകയോ ആഭ്യന്തര സര്‍വ്വീസിന്റെ 20ശതമാനം  ഉണ്ടാവുകയോ ചെയ്താല്‍ മതിയെന്നാണ് പുതിയ വ്യോമയാന നയത്തിലെ നിബന്ധന. ഒരു മണിക്കൂറില്‍ താഴെയുള്ള ആഭ്യന്തര യാത്രകള്‍ 2500 രൂപ നിരക്കിന് താഴെ എത്തുന്നതോടെ യാത്രക്കാര്‍ വര്‍ധിക്കുമെന്നാണ് വ്യോമയാന മേഖലയുടെ പ്രതീക്ഷ. വിമാനയാത്ര ഏവര്‍ക്കും സാധ്യമാക്കുക എന്ന ലക്ഷ്യത്തോടെയാണ് ഒരു മണിക്കൂര്‍ യാത്ര 2500 രൂപയ്ക്ക് താഴെയാക്കുക എന്ന നയം സ്വീകരിച്ചത്. പുതിയ വ്യോമയാന നയം വരുന്നതോടെ കേരളത്തിന്റെ എയര്‍ കേരള പദ്ധതിക്കു ചിറകു മുളക്കാന്‍ സഹായകരമായേക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha