മുല്ലപ്പെരിയാറിലെ ജലനിരപ്പ് ഉടന് ഉയര്ത്താന് പുതിയ നീക്കങ്ങളുമായി തമിഴ്നാട് സര്ക്കാര്
മുല്ലപ്പെരിയാര് അണക്കെട്ടിന്റെ ജലനിരപ്പ് ഉടന് ഉയര്ത്താന് പുതിയ നീക്കങ്ങളുമായി തമിഴ്നാട് സര്ക്കാര്. ജലനിരപ്പ് 152 അടിയാക്കി ഉയര്ത്തണമെന്ന ആവശ്യം മുഖ്യമന്ത്രി ജയലളിത പ്രധാനമന്ത്രി നരേന്ദ്രമോഡിയെ നേരില് കണ്ട് ആവശ്യപ്പെടും. അണ്ണാ ഡിഎംകെയെ എന്ഡിഎയില് ചേര്ക്കാനുള്ള നീക്കങ്ങള് സജീവമായിരിക്കെ തമിഴ്നാട് സര്ക്കാരിന്റെ ആവശ്യം കേന്ദ്രസര്ക്കാര് പരിഗണിച്ചേക്കുമെന്നാണ് സൂചന.
ചൊവ്വാഴ്ച്ചയാണ് മുഖ്യമന്ത്രി ജയലളിത പ്രധാനമന്ത്രി നരേന്ദ്രമോഡിയുമായുള്ള ചര്ച്ചയ്ക്കായി ഡല്ഹിയിലേയ്ക്ക് തിരിയ്ക്കുന്നത്. ഈ കൂടിക്കാഴ്ച്ചയില് മുല്ലപ്പെരിയാര് പ്രധാന ചര്ച്ചാ വിഷയമാകുമെന്നാണ് സൂചന. അണക്കെട്ടിന്റെ ജലനിരപ്പ് 152 അടിയാക്കാന് വേണ്ട നടപടികള് സ്വീകരിയ്ക്കണമെന്ന് ജയലളിത പ്രധാനമന്ത്രിയോട് ആവശ്യപ്പെടും. തമിഴ്നാടുമായി സഹകരിച്ചേ മുല്ലപ്പെരിയാറില് പുതിയ അണക്കെട്ട് നിര്മ്മിക്കാനാകൂ എന്ന് മുഖ്യമന്ത്രി പിണറായി വിജയന് കഴിഞ്ഞ ദിവസം വ്യക്തമാക്കിയിരുന്നു.
ഈ പ്രസ്താവന തമിഴ്നാടിന് അനുകൂല സാഹചര്യമുണ്ടാക്കിയെന്നാണ് ജയലളിതയുടെയും അണ്ണാ ഡിഎംകെയുടേയും കണക്കുകൂട്ടല്. അതിനാല് തന്നെ ഈ സാഹചര്യം പരമാവധി മുതലാക്കാനാണ് തമിഴ്നാടിന്റെ ശ്രമം. തമിഴ്നാട്ടിലെ വിവിധ കര്ഷക സംഘടനകളുടെ ഫെഡറേഷനും ഈ ആവശ്യം ഉന്നയിച്ച് സംസ്ഥാന സര്ക്കാരിന് നിവേദനം കൈമാറിയിട്ടുണ്ട്.
രാജ്യസഭയില് ന്യൂനപക്ഷമായ ബിജെപിക്ക് നിര്ണായക വിഷയങ്ങളില് അണ്ണാ ഡിഎംകെയുടെ പിന്തുണ അനിവാര്യമാണ്. ഒപ്പം അണ്ണാ ഡിഎംകെയെ എന്ഡിഎയില് ചേര്ക്കാനുള്ള നീക്കങ്ങളും സജീവമാണ്. അതിനാല് തന്നെ തമിഴ്നാട് സര്ക്കാരിന്റെ ഭൂരിഭാഗം ആവശ്യങ്ങളും കേന്ദ്രസര്ക്കാര് അംഗീകരിച്ചേക്കുമെന്നാണ് സൂചന.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
