തമിഴ്‌നാട്ടില്‍ 50 തെരുവ് നായ്ക്കളെ ചുട്ടുകൊന്നു. ചെന്നൈയില്‍ നിന്ന് 50 കിലോമീറ്റര്‍ അകലെ മേല്‍മറവത്തൂരിന് സമീപം കീഴമൂര്‍ ഗ്രമത്തിലാണ് സംഭവം. ഭക്ഷണത്തില്‍ കീടനാശിനി ചേര്‍ത്ത് മയക്കിയ ശേഷമാണ് നായ്ക്കളെ ചുട്ടുകൊന്നത്. വളര്‍ത്തുമൃഗങ്ങളെ ഉപദ്രപിച്ചതാണ് നായ്ക്കളെക്കൊല്ലാന്‍ കാരണമെന്ന് പോലീസ് പറഞ്ഞു.

ഗ്രാമീണരില്‍ ഒരാള്‍ അറിയിച്ചതില്‍ പ്രകാരം മൃഗസംരക്ഷണ പ്രവര്‍ത്തകനായ പി. അശ്വിന്താണ് ജൂണ്‍ 5ന് നടന്ന സംഭവം പുറത്തുകൊണ്ടുവന്നത്. അശ്വിന്തിന്റെ പരാതിയിന്‍ പ്രകാരം മുരളി, മുത്തു, മുരുഗദേസ്, ജീവ എന്നീ പ്രദേശവാസികള്‍ക്കെതിരെ മേല്‍മറവത്തൂര്‍ പോലീസ് കേസെടുത്തിട്ടുണ്ട്.

മേഞ്ഞുനടന്നിരുന്ന ആടുകളേയും പശുക്കളേയും തെരുവുനായ്ക്കള്‍ ആക്രമിച്ചതായി നാട്ടുകാര്‍ അറിയിച്ചതായി പോലീസ് പറഞ്ഞു. തെരുവ് നായകളുടെ ആക്രമണത്തില്‍ ചില കന്നുകാലികള്‍ കൊല്ലപ്പെടുകയും ചെയ്തു.

എന്നാല്‍ നായ്ക്കളുടെ ആക്രമണത്തില്‍ പ്രദേശത്തെ കന്നുകാലികള്‍ കൊല്ലപ്പെട്ടുവെന്ന വാദം തെറ്റാണെന്ന് അശ്വിന്ത് പറഞ്ഞു. പ്രശ്‌നം ചൂണ്ടിക്കാട്ടി ഗ്രാമപഞ്ചായത്ത് പ്രസിഡന്റിനേയും വൈസ് പ്രസിഡന്റിനേയും സമീപിച്ചെങ്കിലും അങ്ങനെ ഒരു സംഭവം ഉണ്ടായിട്ടില്ലെന്നാണ് അവര്‍ പറയുന്നത്.

എന്നാല്‍ വിഷം കൊടുത്തശേഷം മണ്ണെണ്ണ ഒഴിച്ച് കത്തിച്ചതിന്റെ തെളിവുകള്‍ തന്റെ പക്കലുണ്ടെന്നും അശ്വിന്ത് പറഞ്ഞു. പകുതി കത്തിയതും പൂര്‍ണ്ണമായി കത്തിയതുമായ നായ്ക്കളുടെ ശരീരവശിഷ്ടങ്ങള്‍ താന്‍ തെളിവായി ശേഖരിച്ചിട്ടുണ്ടെന്നും അദ്ദേഹം പറഞ്ഞു. മേല്‍മറവത്തൂര്‍ പോലീസ് പ്രശ്‌നത്തെ ഗൗരവമായി കണ്ടില്ലെന്നും ഗ്രാമവാസികളുടെ പക്ഷത്ത് നില്‍ക്കാനാണ് അവര്‍ ശ്രമിച്ചതെന്നും അശ്വിന്ത് ആരോപിക്കുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha