ബംഗ്ലദേശ് തലസ്ഥാനമായ ധാക്കയില്‍ കഴിഞ്ഞ ദിവസമുണ്ടായ ഭീകരാക്രമണത്തില്‍ ഐഎസ് ഭീകരര്‍ പതിനെട്ടുകാരിയായ താരിഷി ജയിന്‍ അടക്കം 20 വിദേശികളെ കഴുത്തറുത്തു കൊലപ്പെടുത്തിയിരുന്നു. പത്തുമണിക്കൂറിലേറെ നീണ്ട കമാന്‍ഡോ നടപടിക്കുശേഷം 13 ബന്ദികളെ മോചിപ്പിച്ച സുരക്ഷാസേന ആറു ഭീകരരെ വധിച്ചു.
'പപ്പ, അവര്‍ ഞങ്ങളെ ഒന്നൊന്നായി കൊല്ലും' കൊല്ലപ്പെട്ട താരിഷി ജയിനെന്ന ഇന്ത്യന്‍ വിദ്യാര്‍ഥിനി മരണത്തിന് മുന്‍പ് പിതാവിനെ ഫോണില്‍ വിളിച്ചു പറഞ്ഞ വാക്കുകളാണിത്. ഈ ഫോണ്‍കോളിന് ശേഷം നിമിഷങ്ങള്‍ക്കുള്ളില്‍ ഭീകരര്‍ താരിഷിയെ കഴുത്തറുത്തു കൊലപ്പെടുത്തുകയും ചെയ്തു.
ധാക്കയിലെ നയതന്ത്രമേഖലയിലുള്ള സ്പാനിഷ് കഫേയില്‍ ഭീകരര്‍ സംഹാരതാണ്ഡവമാടുമ്പോള്‍ ടോയ്‌ലറ്റില്‍ കൂട്ടുകാര്‍ക്കൊപ്പം ഒളിച്ചിരിക്കുകയായിരുന്നു അവള്‍. അതിനിടെയാണ് ഫോണിലൂടെ പിതാവ് സഞ്ജീവ് ജയിനെ വിളിച്ച് റസ്റ്ററന്റിനെ ഭീകരാന്തരീക്ഷം താരിഷി വിവരിച്ചത്. 'ഭീകരര്‍ റസ്റ്ററന്റില്‍ പ്രവേശിച്ചുകഴിഞ്ഞു. വല്ലാത്ത ഭയം തോന്നുന്നു. ജീവനോടെ പുറത്തുവരാന്‍ കഴിയുമെന്ന് തോന്നുന്നില്ല. അവര്‍ ഓരോരുത്തരെയായി കൊന്നൊടുക്കുകയാണ്' താരിഷിയുടെ ഫോണ്‍ കട്ടാവുകയും ചെയ്തു.
യുഎസിലെ കലിഫോര്‍ണിയ സര്‍വകലാശാല വിദ്യാര്‍ഥിനിയായിരുന്ന പതിനെട്ടുകാരിയായ താരിഷി, അവധിക്കാലം ചെലവഴിക്കാനായിട്ടാണ് ബംഗ്ലദേശിലെത്തിയത്. ഉത്തര്‍പ്രദേശിലെ ഫിറോസാബാദ് സ്വദേശിയായ താരിഷിയുടെ പിതാവ് സഞ്ജീവ് 20 വര്‍ഷമായി ധാക്കയില്‍ വസ്ത്രവ്യാപാരിയാണ്.
ഒരാളെ ജീവനോടെ പിടികൂടി. ആക്രമണത്തില്‍ കൊല്ലപ്പെട്ടവരിലേറെയും ഇറ്റലിക്കാരും ജപ്പാന്‍കാരുമാണ്. ബംഗ്ലദേശുകാരെ എഴുന്നേല്‍പ്പിച്ചുനിര്‍ത്തിയശേഷം വിദേശികളെ തിരഞ്ഞുപിടിച്ചു വധിക്കുകയായിരുന്നുവെന്നാണ് സൂചന.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha