ഹൈദരാബാദില്‍ മദ്യപിച്ച എഞ്ചിനിയറിംഗ് വിദ്യാര്‍ത്ഥി ഓടിച്ച കാറിടിച്ച് പരിക്കേറ്റ് ചികിത്സയിലായിരുന്ന പത്തു വയസുകാരി രമ്യ മരണത്തിന് കീഴടങ്ങി. അപകടത്തില്‍ രമ്യയുടെ അച്ഛന്റെ സഹോദരന്‍ രാജഷും മരണപ്പെട്ടിരുന്നു. രമ്യയുടെ അമ്മ രാധിക, മുത്തശി, മറ്റൊരു ബന്ധു എന്നിവര്‍ക്ക് പരിക്കേറ്റിരുന്നു.
ഹൈദരാബാദിലെ പഞ്ചഗുട്ടയ്ക്ക് സമീപം ജൂലായ് ഒന്നിനായിരുന്നു ദാരുണമായ സംഭവം നടന്നത്. പുതിയ അധ്യയന വര്‍ഷം ആരംഭിച്ച ദിവസം സ്‌കൂളില്‍ നിന്ന് മടങ്ങുകയായിരുന്നു രമ്യ. ബഞ്ജാര ഹില്‍സിനു സമീപത്ത് വച്ച് ഇരുപത് വയസുകാരനായ എഞ്ചിനിയറിംഗ് വിദ്യാര്‍ത്ഥിയായ ശ്രാവിള്‍ ഓടിച്ചിരുന്ന കാര്‍ അമിത വേഗത്തില്‍ റോഡിലെ ഡിവൈഡറിലിടിച്ച് സാന്‍ട്രോ കാറിനു മുകളിലേക്ക് മറിയുകയായിരുന്നു. രാജേഷ് സംഭവ സ്ഥലത്ത് വച്ച് തന്നെ മരിച്ചു.
വീഴ്ചയുടെ ആഘാതത്തില്‍ കാറുകള്‍ക്കിടയില്‍ അമര്‍ന്നുപോയ രമ്യ അബോധാവസ്ഥയിലായി. ആശുപത്രിയില്‍ എത്തിച്ചപ്പോള്‍ തന്നെ രമ്യയ്ക്ക് മസ്തിഷ്‌ക മരണം സംഭവിച്ചതായി ഡോക്ടര്‍മാര്‍ വിധിയെഴുതി. തുടര്‍ന്ന് വെന്റിലേറ്ററിന്റെ സഹായത്തോടെയാണ് ജീവന്‍ നിലനിറുത്തി വന്നത്.
ശ്രാവിളിനെ അറസ്റ്റു ചെയ്ത പൊലീസ് കൊലപാതക കുറ്റം ചുമത്തി കേസെടുത്തിട്ടുണ്ട്. ശ്രാവിളിന് െ്രെഡവിംഗ് ലൈസന്‍സ് ഇല്ലെന്ന് കേസ് അന്വേഷിക്കുന്ന പൊലീസ് ഉദ്യോഗസ്ഥന്‍ പറഞ്ഞു. ശ്രാവിളിന്റെ പിതാവിന്റെ സുഹൃത്തിന്റേതാണ് കാര്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫേസ്‌ ബുക്ക്‌ Like ചെയ്യുക

https://www.facebook.com/Malayalivartha