രാഷ്ട്രീയ അനിശ്ചിതാവസ്ഥ തുടരുന്ന അരുണാചല്‍ പ്രദേശില്‍ ഇന്ന് വിശ്വാസവോട്ടെടുപ്പ്. കൂടുതല്‍ സമയം വേണമെന്ന മുഖ്യമന്ത്രി നബാം തുകിയുടെ അപേക്ഷ ഗവര്‍ണര്‍ തഥാഗത റോയ് നിരസിച്ചതോടെയാണ് ഇന്ന് വോട്ടെടുപ്പ് ഉറപ്പായത്. അറുപതംഗ നിയമസഭയില്‍ കോണ്‍ഗ്രസിന് 47 പേരുടെ പിന്തുണയുണ്ടായിരുന്നു. എന്നാല്‍ 21 വിമതര്‍ പ്രതിപക്ഷത്തിനൊപ്പം നില്‍ക്കുന്നതിനാല്‍ സര്‍ക്കാരിന് ഭൂരിപക്ഷം ഇല്ലാത്ത സ്ഥിതിയിലാണ്. 
വിമതനേതാവ് കലികോ പുല്‍ 41 എംഎല്‍എമാരെ അണിനിരത്തി കഴിഞ്ഞദിവസം ശക്തിപ്രകടനം നടത്തുകയും ചെയ്തിരുന്നു. ഭരണം നിലനിര്‍ത്താന്‍ 30 എംഎല്‍എമാരുടെ പിന്തുണ വേണമെന്നിരിക്കേ നബാം തുകി സര്‍ക്കാര്‍ താഴെ വീഴാനുള്ള സാധ്യത ഏറുകയാണ്. അരുണാചല്‍ സര്‍ക്കാരിനെ പിരിച്ചുവിട്ട കേന്ദ്രനടപടി സുപ്രീംകോടതി റദ്ദാക്കിയതിലൂടെ നേരിട്ട തിരിച്ചടി വിശ്വാസവോട്ടെടുപ്പിലൂടെ മറികടക്കാന്‍ ബിജെപിയും കച്ചമുറുക്കിയിട്ടുണ്ട്. രാഷ്ട്രീയ സാഹചര്യം കണക്കിലെടുത്ത് തലസ്ഥാനമായ ഇറ്റാനഗറിലും മറ്റ് പ്രധാനകേന്ദ്രങ്ങളിലും നിരോധനാജ്ഞ പ്രഖ്യാപിച്ചിട്ടുണ്ട്.