കേരളത്തിന്റെ ഏറെക്കാലമായുള്ള ആവശ്യം യാഥാര്‍ഥ്യമാവുകയാണ്‌. കൊച്ചി വല്ലാര്‍പ്പാടം ടെര്‍മിനലില്‍ നിന്ന്‌ ഇനി വിദേശ കപ്പലുകളിലും ചരക്കു ഗതാഗതം നടത്താനാവും. ഇതിനായി കബോട്ടാഷ്‌ നിയമത്തില്‍ ഇളവ്‌ അനുവദിച്ച്‌ കൊണ്ട്‌ കേന്ദ്ര സര്‍ക്കാര്‍ ഉത്തരവിറക്കി. എന്നാല്‍ ടെര്‍മിനലില്‍ വരുന്ന എല്ലാ കപ്പലുകളും സ്‌കാന്‍ ചെയ്യുന്നതാണ്‌. മര്‍ച്ചന്റ്‌ ഷിഫ്‌റ്റിംഗ്‌ ആക്‌ട്‌ പ്രകാരമാണ്‌ ഷിപ്പിംഗ്‌ മന്ത്രാലയം ഉത്തരവിറക്കിയത്‌.വല്ലാര്‍പ്പാടം ടെര്‍മിനലിന്റെ വികസനസാധ്യതകള്‍ വര്‍ധിപ്പിക്കാന്‍ ഇത് സഹായകരമാകും. വല്ലാര്‍പാടത്തെത്തുന്ന ചരക്കുകള്‍ ഇന്ത്യന്‍ കപ്പലുകളില്‍ മാത്രമേ മറ്റു തുറമുഖങ്ങളിലേക്ക് എത്തിക്കാന്‍ കഴിയൂവെന്നായിരുന്നു ഇതുവരെയുള്ള വ്യവസ്ഥ. കബോട്ടാഷ് നിയമത്തില്‍ ഭേദഗതി വരുത്തുന്നതോടെ വിദേശ കപ്പലുകളെ കൂടുതലായി വല്ലാര്‍പാടത്തേക്ക് ആകര്‍ഷിക്കാന്‍ കഴിയും.