കൂട്ടമാനഭംഗത്തില്‍ പ്രതിഷേധിച്ച്‌ ജനങ്ങള്‍ വീണ്ടും ഡല്‍ഹിയിലും പരിസരത്തും ഒത്തു കൂടി. പോലീസ്‌ വല്ലാത്തൊരവസ്ഥയിലുമായി. ജനങ്ങള്‍ക്കെതിരെ ബലം പ്രയോഗിച്ചാല്‍ ഉണ്ടാകുന്ന രാഷ്‌ട്രീയ പ്രത്യാഘാതം വളരെ വലുതാണ്‌. അതു കൊണ്ടാണ്‌ തുടക്കത്തില്‍ ആഭ്യന്തര മന്ത്രി തന്നെ ഇടപെട്ടത്‌. ജനങ്ങള്‍ കൂടുതല്‍ ഇളകിയതോടെ ഡല്‍ഹിയില്‍ നിരോധനാജ്ഞയും പ്രഖ്യാപിച്ചു. അതിനിടെ, മുംബൈ, ഹൈദരാബാദ്, ചെന്നൈ തുടങ്ങിയ മറ്റ് നഗരങ്ങളിലേക്കും പ്രക്ഷോഭം വ്യാപിക്കുകയാണ്. പ്രക്ഷോഭത്തില്‍ പങ്കെടുക്കുന്നവരെ അനുനയിപ്പിക്കാനും പ്രശ്‌നപരിഹാരത്തിനുമായി, സരമത്തില്‍ പങ്കെടുക്കുന്നവരുടെ അഞ്ചു പ്രതിനിധികളുമായി കോണ്‍ഗ്രസ് പ്രസിഡന്റ് സോണിയ ഗാന്ധി ചര്‍ച്ചയാരംഭിച്ചു.
അതേസമയം, ഭരണകൂടം ജനങ്ങള്‍ക്കെതിരെ യുദ്ധം പ്രഖ്യാപിച്ചിരിക്കുകയാണ് ന്യൂഡല്‍ഹിയില്‍ 144 നടപ്പിലാക്കുക വഴി ചെയ്തിരിക്കുന്നതെന്ന്, ആം ആദ്മി പാര്‍ട്ടി നേതാവും പ്രമുഖ അഴിമതി വിരുദ്ധ പ്രവര്‍ത്തകനുമായ അരവിന്ദ് കെജരിവാള്‍ കുറ്റപ്പെടുത്തി. ഇത് ഇതുവരെയില്ലാത്ത നടപടിയാണെന്നും, സര്‍ക്കാര്‍ ജനങ്ങളെ ഭയക്കുകയാണെന്നും കെജരിവാള്‍ ട്വിറ്ററില്‍ പ്രസിദ്ധീകരിച്ച അപ്‌ഡേറ്റില്‍ പറഞ്ഞു. 
ഡല്‍ഹിയിലെ കൊടുംതണുപ്പ് വകവെയ്ക്കാതെയാണ് ഞായറാഴ്ചയും യുവാക്കള്‍ പ്രതിഷേധവുമായി അണിനിരക്കുന്നത്. പ്രതിഷേധം തുടരുന്ന സാഹചര്യത്തില്‍ തലസ്ഥാനത്ത് ഭാഗികമായി നിരോധനാജ്ഞ പ്രഖ്യാപിക്കുകയായിരുന്നു. സമരത്തില്‍ പങ്കെടുക്കാന്‍ ആളുകള്‍ കൂട്ടമായി എത്തുന്നത് തടയാന്‍ വിജയ് ചൗക്കിന് സമീപത്തെ ഏഴ് മെട്രോ സ്‌റ്റേഷനുകള്‍ അടച്ചിട്ടിരിക്കുകയാണ്. പട്ടേല്‍ ചൗക്ക്, ഉദ്യോഗ്ഭവന്‍, റേസ്‌കോഴ്‌സ്, ബരകാമ്പ, മാന്‍ഡി ഹൗസ്, ഖാന്‍മാര്‍ക്കറ്റ്, സെന്‍ട്രല്‍ സെക്രട്ടേറിയറ്റ് എന്നീ മെട്രോ സ്‌റ്റേഷനുകളാണ് അടച്ചത്. 
ഈ സ്‌റ്റേഷനുകളുടെ പ്രവേശനകവാടവും യാത്രക്കാര്‍ പുറത്തേക്കിറങ്ങുന്ന കവാടവും അടച്ചതിനാല്‍ ഇവിടെയിറങ്ങുന്ന യാത്രക്കാര്‍ക്ക് ട്രെയിന്‍ മാറിക്കയറാന്‍ മാത്രമേ അനുവാദമുള്ളൂ. വിജയ് ചൗക്കില്‍ നിന്നും സമരക്കാരെ ഇന്നലെ രാത്രി ബസ്സില്‍ അവിടെനിന്ന് മാറ്റിയിരുന്നു. വിജയ് ചൗക്കിലേക്ക് മാധ്യമപ്രവര്‍ത്തകര്‍ക്കും പ്രവേശനം നിഷേധിച്ചിരിക്കുകയാണ്. റെയിസിന കുന്നില്‍ തമ്പടിച്ചവരെ ഞായറാഴ്ച രാവിലെ ഒഴിപ്പിച്ചു. 10 ജന്‍പഥ് വസതിക്ക് സമീപം അണിനിരന്ന പ്രതിഷേധക്കാരെയും നീക്കി.