ബസിലെ കൂട്ട മാനഭംഗത്തിനിരയായി മരിച്ച യു.പി. സ്വദേശിനി ജ്യോതിയുടെ മൃതദേഹം രഹസ്യമായി സംസ്‌കരിച്ചു. വാര്‍ത്തകള്‍ സൃഷ്‌ടിക്കുന്ന ഇക്കാലത്ത്‌ ഇന്ത്യന്‍ മാധ്യമങ്ങള്‍ സംസ്‌കാരം ചിത്രീകരിക്കാതെ ലോകത്തിന്‌ തന്നെ മാതൃക കാട്ടി. മാധ്യമങ്ങള്‍ക്ക്‌ വിലക്കുണ്ടായിരുന്നെങ്കിലും ബ്രോഡ്‌കാസ്റ്റിംഗ്‌ അസോസിയേഷന്റെ തീരുമാനവും ഇതിനു പിന്നിലുണ്ടായിരുന്നു. ഡല്‍ഹിയിലെ ദ്വാരകയിലെ ശ്‌മശാനത്തില്‍ രാവിലെ 7.30 നായിരുന്നു സംസ്‌കാരം. സിംഗപ്പൂരില്‍ നിന്നും എയര്‍ ഇന്ത്യയുടെ പ്രത്യേകവിമാനത്തില്‍ പുലര്‍ച്ചെ 3.30 ന്‌ ഡല്‍ഹിയിലെ ഇന്ദിരാഗാന്ധി അന്താരാഷ്‌ട്ര വിമാനത്താവളത്തില്‍ മതദേഹം കൊണ്ടുവന്നു. പ്രധാനമന്ത്രി ഡോ. മന്‍മോഹന്‍ സിംഗ്‌, കോണ്‍ഗ്രസ്‌ അധ്യക്ഷ സോണിയ ഗാന്ധി എന്നിവരുടെ സാന്നിദ്ധ്യത്തിലാണ്‌ മൃതദേഹം ഏറ്റുവാങ്ങിയത്‌.  സുരക്ഷാകാരണങ്ങളാല്‍ യുപിയിലേക്ക്‌ കൊണ്ട്‌പോയി സംസ്‌കരിക്കണമെന്ന്‌ പോലീസ്‌ ആവശ്യപ്പെട്ടു. എന്നാല്‍ ബന്ധുക്കളുടെ നിര്‍ബന്ധത്താല്‍ ഡല്‍ഹിയില്‍ തന്നെ സംസ്‌കരിക്കുകയായിരുന്നു. അടുത്ത ബന്ധുക്കളും സര്‍ക്കാര്‍ പ്രതിനിധികളും മാത്രമാണ്‌ ചടങ്ങില്‍ പങ്കെടുത്തത്‌.