കൊല്‍ക്കത്ത നഗരത്തില്‍ നിന്ന് 50 കിലോമീറ്റര്‍ ദൂരെ ഡയമണ്ട് ഹാര്‍ബറില്‍ ബലാത്സംഗം ചെയ്യപ്പെട്ട നിലയില്‍ 22 കാരിയായ യുവതിയുടെ മൃതദേഹം കണ്ടെത്തി. സൗത്ത് 24 പര്‍ഗാനാസ് മേഖലയിലാണ് ഈ പ്രദേശം. ഹൂഗ്ലി നദിക്കരയില്‍ ഹാര്‍ബറിനോട് ചേര്‍ന്ന് ഒരു എല്‍.പി.ജി. ഗോഡൗണിനോട് സമീപമാണ് മരിച്ചനിലയില്‍ പെണ്‍കുട്ടിയെ കണ്ടെത്തിയത്. പെണ്‍കുട്ടിയെ ബലാത്സംഗം ചെയ്ത ശേഷം കൊന്നതാണെന്നാണ് പ്രാഥമിക നിഗമനം. സംഭവത്തെക്കുറിച്ച് അന്വേഷണം ആരംഭിച്ചതായും ബലാത്സംഗം ചെയ്യപ്പെട്ടതായി സംശയമുണ്ടെന്നും പോസ്റ്റുമോര്‍ട്ടം കഴിഞ്ഞ ശേഷമേ കൂടുതല്‍ വിശദാംശങ്ങള്‍ പറയാന്‍ കഴിയൂവെന്നും അന്വേഷണ ഉദ്യോഗസ്ഥര്‍ പറഞ്ഞു.  അതേസമയം തന്റെ സഹോദരിയെ ബലാത്സംഗം ചെയ്ത ശേഷം കൊന്നുകളഞ്ഞതാണെന്ന് പെണ്‍കുട്ടിയുടെ സഹോദരന്‍ ആരോപിച്ചു. വീട്ടുകാര്‍ നല്‍കിയ പരാതിയില്‍ പെണ്‍കുട്ടി രണ്ട് മാസം ഗര്‍ഭിണിയാണെന്നും കാമുകനാണ് കൊല നടത്തിയെന്നും ആരോപിച്ചിട്ടുണ്ട്. ഫക്കീര്‍ചന്ദ് കോളേജ് കാമ്പസിന് പുറകിലാണ് ഈ സ്ഥലം. കൊല നടന്നതായി സംശയിക്കുന്ന ശനിയാഴ്ച രാത്രി ഹാര്‍ബറിന് സമീപം ബൈക്കില്‍ ഒരു യുവതിയും യുവാവും വന്നത് കണ്ടതായി സമീപവാസികളും മൊഴി നല്‍കിയിട്ടുണ്ട്.