ഉത്തര്‍പ്രദേശില്‍ നവവധുവിനെ ജീവനോടെ ദഹിപ്പിച്ചതായി റിപ്പോര്‍ട്ട്. മരിച്ചെന്നു കരുതി ഭര്‍ത്താവും സുഹൃത്തുക്കളും ദഹിപ്പിക്കുകയായിരുന്നെന്നാണ് യുവതിയുടെ സഹോദരന്‍ പരാതി നല്‍കിയിരിക്കുന്നത്. ദഹിപ്പിക്കുന്ന സമയം യുവതിക്കു ജീവനുണ്ടായിരുന്നെന്നു പോസ്റ്റുമോര്‍ട്ടം റിപ്പോര്‍ട്ടില്‍ വ്യക്തമാകുകയും ചെയ്തു. നോയിഡ സ്വദേശിനിയായ 21 കാരിയെയാണ് ജീവനോടെ ദഹിപ്പിച്ചത്. സഹോദരന്റെ പരാതി പ്രകാരം പൊലീസ് കത്തിക്കൊണ്ടിരുന്ന ചിതയില്‍ നിന്ന് മൃതദേഹം എടുത്ത് പോസ്റ്റ്മോര്‍ട്ടം ചെയ്തപ്പോഴാണ് ജീവനുണ്ടായിരുന്നെന്നു വ്യക്തമായത്.

ഫെബ്രുവരി 24 മുതല്‍ യുവതിയെ കാണാനില്ലായിരുന്നു. 25നു യുവതി ശ്വാസകോശ അണുബാധയെ തുടര്‍ന്ന് മരിച്ചതായി ഡോക്ടര്‍മാര്‍ വിധിയെഴുതി. മരണസര്‍ട്ടിഫിക്കറ്റും നല്‍കി. ഇതിന്റെ അടിസ്ഥാനത്തില്‍ തിങ്കളാഴ്ച യുവതിയെ ദഹിപ്പിക്കുന്ന സമയത്താണ് സഹോദരന്റെ പരാതി പ്രകാരം അലിഗഢ് പൊലീസ് സ്ഥലത്തെത്തി ദഹിപ്പിക്കല്‍ നിര്‍ത്തിവച്ചത്. തുടര്‍ന്ന് മൃതദേഹം പുറത്തെടുത്ത് പോസ്റ്റ്മോര്‍ട്ടം ചെയ്തു. 70 ശതമാനം മൃതദേഹം തീയില്‍ ദഹിച്ചിരുന്നു. പോസ്റ്റ്മോര്‍ട്ടത്തില്‍ ചിതയില്‍ വെക്കുമ്പോള്‍ യുവതി ശ്വസിച്ചിരുന്നെന്ന് കണ്ടെത്തി. പോസ്റ്റുമോര്‍ട്ടത്തില്‍ യുവതിയുടെ ശ്വാസനാളത്തില്‍ നിന്നും കത്തിയ വസ്തുക്കളും ചാരവും കണ്ടെടുത്തു. ജീവനോടെ കത്തിക്കുമ്പോഴാണ് ഇത്തരം വസ്തുക്കള്‍ ശ്വാസനാളിയില്‍ ഉണ്ടാവുക. ഇതാണ് ജീവനുണ്ടായിരുന്നെന്നു സംശയം ഉയരാന്‍ കാരണം.

ജീവനോടെ കത്തിക്കുമ്പോള്‍ ഉണ്ടായ ഷോക്കിലാണ് യുവതി മരിച്ചിക്കുന്നതെന്നു പോസ്റ്റുമോര്‍ട്ടം ചെയ്ത ഡോക്ടര്‍മാര്‍ സ്ഥിരീകരിച്ചു. യുവതിയുടെ ശരീരം തന്നെയാണ് ഇതെന്ന് ഡിഎന്‍എ പരിശോധനയിലൂടെ സ്ഥിരീകരിച്ചിട്ടുമുണ്ട്. ഇതോടെ യുവതിയുടെ രക്ഷിതാക്കളുടെ പരാതിയില്‍ പൊലീസ് ഭര്‍ത്താവിനും സുഹൃത്തുക്കള്‍ക്കും എതിരെ കേസെടുത്ത് അന്വേഷണം ആരംഭിച്ചു. യുവതി മരിച്ചതായി ആശുപത്രി അധികൃതര്‍ അറിയിച്ചതനുസരിച്ച് ഭര്‍ത്താവും സൃഹൃത്തുക്കളും ചേര്‍ന്ന് യുവതിയുടെ മൃതദേഹം അലിഗഢ് ജില്ലയിലേക്ക് കൊണ്ടുപോയി രാത്രി എട്ടോടെ ദഹിപ്പിക്കുകയായിരുന്നെന്നാണ് പറയപ്പെടുന്നത്.