വനിതാ ദിനം: ഇന്നു വിമാനങ്ങള് പറത്തുക വനിതകള്
ലോക വനിതാ ദിനമായ ഇന്ന് എയര് ഇന്ത്യ എക്സ്പ്രസിന്റെ വിമാനങ്ങള് പറത്തുക വനിതകള്. എയര് ഇന്ത്യ എക്സ്പ്രസിന്റെ ഒന്പതു സര്വീസുകളാണ് മുഴുവന് വനിതാ ജീവനക്കാരുമായി യാത്ര ചെയ്യുന്നത്. കൊച്ചി, തിരുവനന്തപുരം, കോഴിക്കോട്, ചെന്നൈ, മുംബൈ, ഡല്ഹി, ദുബായ്, ഷാര്ജ, ദമാം എന്നീ നഗരങ്ങളില് നിന്നുള്ള വിമാനങ്ങളാണിവ. പൈലറ്റ്, കാബിന്ക്രൂ എന്നിവര്ക്കു പുറമെ വിമാനത്താവളങ്ങളില് ഈ വിമാനങ്ങളുടെ അറ്റകുറ്റപ്പണികളും അനുബന്ധ ജോലികളും നിര്വഹിക്കുന്നതും വനിതാ ജീവനക്കാര് തന്നെ.
ടാനിയ ആനന്ദ്, മാര്ട്ടിന, കവിത രാജ്കുമാര്, നാന്സി നയ്യാര്, ജി.കെ. സാന്തു, സലോണി റാവല്, കനക് ചക്രവര്ത്തി, സൃഷ്ടി സിങ്, ആമി സാങ്വി, മസൂദ്, ബിന്ദു സെബാസ്റ്റ്യന്, കാഞ്ചനാ തലങ്, സാക്ഷി കുമാര്, കോമള് ഭാരതി എന്നിവരാണു പൈലറ്റുമാരായി കോക്പിറ്റിലെത്തുക.
34 വനിതകള് കാബിന് ക്രൂ അംഗങ്ങളായി വിവിധ വിമാനങ്ങളില് പറക്കും. എയര് ഇന്ത്യ എക്സ്പ്രസിലെ 40 ശതമാനം ജീവനക്കാരും വനിതകളാണ്. ദമാം കോഴിക്കോട്, ചെന്നൈ സിംഗപ്പൂര് തിരുച്ചിറപ്പള്ളി, മുംബൈദുബായ്, ദുബായ് മുംബൈ, തിരുവനന്തപുരം അബുദാബിതിരുവനന്തപുരം, കോഴിക്കോട് ഷാര്ജ, ഷാര്ജ കോഴിക്കോട്, കൊച്ചി അബുദാബി, ഡല്ഹി ദുബായ് എന്നീ റൂട്ടുകളിലെ വിമാനങ്ങളിലാണ് വനിതാ ജീവനക്കാരെത്തുക.
കൊച്ചിയിലെ വ്യോമഗതാഗത നിയന്ത്രണവും വനിതകള്ക്ക്
നെടുമ്പാശേരി ന്മ രാജ്യാന്തര വനിതാ ദിനാചരണത്തിന്റെ ഭാഗമായി കൊച്ചി രാജ്യാന്തര വിമാനത്താവളത്തിലെ വ്യോമ ഗതാഗത നിയന്ത്രണം ഇന്നലെ വനിതകള് ഏറ്റെടുത്തു. മാനസിക പിരിമുറുക്കം കൂടുതലുള്ള ജോലിയാണു വ്യോമഗതാഗത നിയന്ത്രണം. ആകാശത്ത് തലങ്ങും വിലങ്ങും പറക്കുന്ന വിമാനങ്ങള്ക്കു നിര്ദേശങ്ങള് നല്കി സുരക്ഷിതമായി ലക്ഷ്യസ്ഥാനത്തെത്തിക്കുന്നവരാണു വ്യോമഗതാഗത നിയന്ത്രകര്.
സാഹചര്യങ്ങള് വിശകലനം ചെയ്യാനും പെട്ടെന്നുള്ള തീരുമാനങ്ങളെടുക്കാനും കൃത്യതയോടെ നടപ്പിലാക്കാനും കഴിയണം. റഡാറുകളുടെ സഹായത്തോടെ ദിശയും ഉയരവും വേഗവും കണക്കാക്കിയാണു വിമാനങ്ങളെ ഇവര് സുരക്ഷിതമായി ലക്ഷ്യസ്ഥാനത്തെത്തിക്കുന്നത്.
കൊച്ചി വിമാനത്താവളത്തിലേക്കു വന്നുപോകുന്ന ഇരുന്നൂറോളം വിമാനങ്ങള് പൂര്ണമായും കോഴിക്കോട്, കോയമ്പത്തൂര്, കൊച്ചി നാവിക വിമാനത്താവളം എന്നിവിടങ്ങളിലേക്കുള്ള വിമാനങ്ങള് ഭാഗികമായും നിയന്ത്രിക്കുന്നതു കൊച്ചി രാജ്യാന്തര വിമാനത്താവളത്തില് നിന്നാണ്. എയര്പോര്ട്ട് അതോറിറ്റിയാണ് ഇവിടെ വ്യോമഗതാഗതം നിയന്ത്രിക്കുന്നത്. അറുപതോളം വരുന്ന വ്യോമഗതാഗത നിയന്ത്രകരില് പതിനാറു പേരാണു വനിതകള്.
https://www.facebook.com/Malayalivartha
