ഉച്ചഭക്ഷണത്തിന് സ്‌കൂള്‍ കുട്ടികള്‍ക്ക് ആധാര്‍ നിര്‍ബന്ധമാക്കിയതിനു പിന്നാലെ അനാഥാലയങ്ങളിലെ കുട്ടികള്‍ക്കും ഇനി ആധാര്‍ നിര്‍ബന്ധമാക്കും. രാജ്യത്തെ 9,000 അനാഥാലയങ്ങളില്‍ കഴിയുന്ന കുട്ടികള്‍ക്കാണ് ആധാര്‍ നിര്‍ബന്ധമാക്കുന്നത്. കേന്ദ്ര ശിശുക്ഷേമമന്ത്രി മേനക ഗാന്ധിയാണ് ഇക്കാര്യം അറിയിച്ചത്. ഏതു രാജ്യത്തും പൗരന്‍മാര്‍ക്കു തിരിച്ചറിയലിനായി ഒരു രേഖയുണ്ടാവണം. അനാഥാലയങ്ങളില്‍ നിന്നു കുട്ടികളെ പലപ്പോഴും കാണാതാകാറുണ്ട്. ആധാര്‍ ഉണ്ടെങ്കില്‍ അവരെ പെട്ടെന്നു തിരിച്ചറിയാനും കണ്ടെത്താനും കഴിയും. ജുവനൈല്‍ ഹോമുകളെയും ഇതിന്റെ പരിധിയില്‍ കൊണ്ടുവരുമെന്നും മന്ത്രി പറഞ്ഞു.

ശിശുക്ഷേമ മന്ത്രാലയം അടുത്ത കാലത്തു നടത്തിയ സര്‍വേയില്‍ രാജ്യത്ത് ഒന്‍പതിനായിരത്തോളം അനാഥാലയങ്ങളില്‍ ഒരു ലക്ഷത്തോളം കുട്ടികള്‍ കഴിയുന്നതായി കണ്ടെത്തിയിരുന്നു. ഇവരെ എല്ലാവരെയും ആധാറുമായി ബന്ധിപ്പിക്കുകയാണ് ലക്ഷ്യം.

കുട്ടികളുടെ ബയോമെട്രിക്‌സ് അടയാളങ്ങള്‍ രേഖപ്പെടുത്തുകയാണ് ബുദ്ധിമുട്ടുള്ള കാര്യം. പ്രത്യേകിച്ച് മൂന്നു വയസില്‍ താഴെയുള്ള കുഞ്ഞുങ്ങളുടെ വിരലടയാളവും മറ്റും വികസിച്ചിട്ടുണ്ടാവില്ല. മൂന്നു വയസില്‍ താഴെയുള്ളവര്‍ക്ക് ആദ്യഘത്തില്‍ ആധാര്‍ നന്പര്‍ മാത്രം നല്‍കും. മൂന്നു വയസിനു ശേഷം അവരുടെ വിരലടയാളവും മറ്റും ശേഖരിക്കാനാണിപ്പോള്‍ തീരുമാനിച്ചിരിക്കുന്നത്.