ഐഎസ്ഐഎസ് ലൈംഗിക അടിമയായി 5 പ്രാവശ്യം വില്ക്കപ്പെട്ടു; 20 മാസം നീണ്ട യാതനയുടെ കഥ
20 മാസം അനുഭവിച്ച നരക യാതനകള് വീണ്ടും ഓര്ത്തപ്പോള് അവളുടെ കണ്ണുകള് നിറഞ്ഞൊഴുകി. ജീവനുള്ള ഒന്നിനു സഹിക്കാന് കഴിയുന്നതിനപ്പുറമുള്ള പീഡനമായിരുന്നു. ഇസ്ലാമിക് സ്റ്റേറ്റിന്റെ പിടിയില്നിന്നു രക്ഷപെട്ടെത്തിയ ലാമിയ അജി ബാഷര് ദുരന്തകഥ വിവരിക്കുമ്പോള് കേട്ടിരുന്നവരുടെ കണ്ണുകളും നിറഞ്ഞു. ഇത്ര പീഡനങ്ങള്ക്കിടയില്പ്പെട്ട ഒരു യുവതി ജീവിച്ചിരിക്കുന്നുവെന്നതുപോലും അത്ഭുതം.
ഐഎസ്ഐഎസ് ലൈംഗിക അടിമകളാക്കിവച്ചിരുന്ന സ്ത്രീകളിലൊരാളാണ് ലാമിയ. യസീദി മതവിഭാഗത്തില്പ്പെട്ട ലാമിയയെ അഞ്ചു തവണ ഐഎസ് ഭീകരര് ലൈംഗിക അടിമയായി വിറ്റു. പല തവണ രക്ഷപ്പെട്ടോടാന് ശ്രമം നടത്തി. അപ്പോഴൊക്കെ കുടങ്ങി. അനുഭവിച്ചു കൂട്ടിയതിന്റെ ഇരട്ടിയിലേറെ പീഡനങ്ങളായിരുന്നു പിന്നീട് ഡല്ഹിയില് ഇന്സ്റ്റിറ്റിയൂട്ട് ഓഫ് ഡിഫന്സ് സ്റ്റഡീസ് ആന്ഡ് അനാലിസിസ് സംഘടിപ്പിച്ച ഏഷ്യന് സെക്യൂരിറ്റി കോണ്ഫറന്സില് സംസാരിക്കുകായയിരുന്നു ലാമിയ.
വടക്കന് ഇറാഖിലെ സിന്ജാര് എന്ന ഗ്രാമത്തിലായിരുന്നു ലാമിയയുടെ വീട്. 2014 ഓഗസ്റ്റ് മൂന്നിനാണ് ഐഎസ് ഇവിടം ആക്രമിച്ച് ലാമിയയടക്കമുള്ളവരെ പിടികൂടി കൊണ്ടുപോകുന്നത്. അന്ന് അവള്ക്കു പ്രായം 15 വയസ്. ആക്രമണത്തില് ആ ഗ്രാമത്തിലുള്ള പുരുഷന്മാരെയൊക്കെ ഭീകരര് കൊന്നു. 400 പുരുഷന്മാരും 18 വൃദ്ധ സ്ത്രീകളുമാണ് അന്നു കൊല്ലപ്പെട്ടത്. അവളുടെ പിതാവും അതില് ഉള്പ്പെടും. സ്ത്രീകളെയും കുട്ടികളെയും ഭീകരര് പിടികൂടി അവരുടെ താവളത്തിലേക്കു കൊണ്ടുപോയി. തനിക്കൊപ്പം സഹോദരിയെയും അവര് പിടികൂടിയിരുന്നു. മൊസൂളില് വച്ച് അവര് തങ്ങളെ ലൈംഗിക അടിമകളായി ഒരാള്ക്കു വിറ്റു. അയാള് തങ്ങളെ ലൈംഗികമായി പീഡിപ്പിച്ചശേഷം വില്പ്പന നടത്തിയ സ്ഥലത്തുതന്നെ കൊണ്ടുവന്നു. അവിടെവച്ച് വീണ്ടും വില്പ്പന. താനും സഹോദരിയും വേര്പിരിഞ്ഞു. ആദ്യ തവണ രക്ഷപ്പെടാന് ശ്രമം നടത്തിയപ്പോള് അവര് പിടികൂടി ക്രൂരമായ ലൈംഗിക പീഡനത്തിനു വിധേയയാക്കി. രാത്രിപകലില്ലാതെ ഒരാഴ്ച തുടര്ച്ചയായി പീഡിപ്പിച്ചു. നിവൃത്തിയില്ലാതെ കൈ ഞരമ്പു മുറിച്ചു മരിക്കാന് താന് ശ്രമിച്ചു.
തുടര്ന്ന് അഞ്ചു തവണയോളം പലര്ക്കുമായി വില്ക്കപ്പെട്ടു. പീഡനങ്ങളുടെ കാലമായിരുന്നു അതും. ഒടുവില് കഴിഞ്ഞ ഏപ്രിലിലാണ് ഐഎസ് പാളയത്തില്നിന്നു താന് രക്ഷപ്പെട്ടത്. കള്ളക്കടത്തുകാര്ക്ക് തന്റെ അങ്കിള് 7500 ഡോളര് നല്കിയാണു തന്നെ രക്ഷപ്പെടുത്തിയതെന്നും അവള് പറയുന്നു. ഭീകരര് ബോംബുകളും ചാവേറുകള്ക്കുള്ള വസ്ത്രങ്ങളും നിര്മിക്കുന്നതിനിടയില് താന് ഒരു ഇന്ത്യക്കാരനെ കണ്ടു. അയാള് പിന്നീടു ചാവേറായതായും ലാമിയ ഓര്ക്കുന്നു.
https://www.facebook.com/Malayalivartha
