ഹരിയാനയിലെ ജിന്ദ് ജില്ലയില്‍ കനാല്‍ ശുചീകരണത്തിനിടെ കിട്ടിയത് 11 മൃതദേഹങ്ങളും നാല് തലയോട്ടിയും. ഭക്രാനംഗല്‍ കനാലില്‍ വാര്‍ഷിക ശുചീകരണം നടത്തിയപ്പോഴാണ് മൃതദേഹങ്ങള്‍ കണ്ടെടുത്തത്. 

കനാലില്‍ നിന്ന് ലഭിച്ച മൃതദേഹങ്ങള്‍ക്ക് ഒന്ന് മുതല്‍ പത്ത് മാസം വരെ പഴക്കമുണ്ടെന്നാണ് റിപ്പോര്‍ട്ട്. ഇതിലൊന്ന് പഞ്ചാബിലെ പട്യാല സ്വദേശി സത്‌നാം സിങ്ങാണെന്ന് തിരിച്ചറിഞ്ഞിട്ടുണ്ട്.

നര്‍വാണ ഭാഗത്തുനിന്ന് എട്ട് മൃതദേഹങ്ങള്‍ ലഭിച്ചപ്പോള്‍ മൂന്ന് മൃതദേഹങ്ങളും തലയോട്ടികളും ഗാര്‍ഹി മേഖലയില്‍നിന്ന് കണ്ടെത്തി. പഞ്ചാബില്‍നിന്ന് ഹരിയാനയിലേക്ക് കനാല്‍ പ്രവേശിക്കുന്ന സ്ഥലമാണിത്. ശുചീകരണത്തിനായി കനാലിലെ വെള്ളം ഗണ്യമായി കുറച്ചിരുന്നു. 

ഇതോടെയാണ് മൃതദേഹങ്ങള്‍ കണ്ടെത്തിയത്. എങ്ങനെ ഇത്രയധികം മൃതദേഹങ്ങള്‍ കനാലിലെത്തിയെന്ന കാര്യം വ്യക്തമല്ല. പലപ്പോഴും കുളിക്കുന്നതിനിടെ ആളുകള്‍ മുങ്ങിമരിച്ചതായി റിപ്പോര്‍ട്ടുണ്ടായിരുന്നു.