രാജ്യവ്യാപകമായി എന്‍ഫോഴ്‌സ്‌മെന്റ് ഡയറക്ടറേറ്റ് നടത്തിയ റെയ്ഡില്‍ കള്ളപ്പണം വെളുപ്പിക്കാന്‍ കൂട്ടുനിന്ന 2,300 ഓളം ധനകാര്യ സ്ഥാപനങ്ങളെ പിടികൂടി. എന്‍ഫോഴ്‌സ്‌മെന്റ് നടത്തിയിട്ടുള്ള ഏറ്റവും വലിയ റെയ്ഡുകളില്‍ ഒന്നായിരുന്നു ഇത്. 16 സംസ്ഥാനങ്ങളിലെ നൂറോളം പ്രദേശങ്ങളിലാണ് റെയ്ഡ് നടന്നത്.

പ്രധാനമന്ത്രിയുടെ നിര്‍ദ്ദേശ പ്രകാരം കള്ളപ്പണവുമായി ബന്ധപ്പെട്ട കേസുകള്‍ കൈകാര്യം ചെയ്യുന്നതിന് രൂപീകരിച്ച പ്രത്യേക ദൗത്യസേനയാണ് റെയ്ഡ് നടത്തിയത്. കള്ളപ്പണത്തിനെതിരായ യുദ്ധത്തില്‍ പ്രധാനമന്ത്രി നരേന്ദ്ര മോദി പുലര്‍ത്തുന്ന ജാഗ്രതയുടെ ഏറ്റവും മികച്ച ഉദാഹരണമാണ് റെയ്ഡ്.

മഹാരാഷ്ട്ര മുന്‍ ഉപമുഖ്യമന്ത്രിയും എന്‍സിപി നേതാവുമായ ഛഗന്‍ ഭുജ്പല്‍ 46 കോടിരൂപയുടെ കള്ളപ്പണം വെളുപ്പിക്കാന്‍ കൂട്ടുനിന്നതായി റെയ്ഡില്‍ കണ്ടെത്തി. മുംബൈയില്‍ 700 കമ്പനികള്‍ ഒരേമേല്‍വിലാസത്തില്‍ പ്രവര്‍ത്തിക്കുന്നതായും റെയ്ഡില്‍ തെളിഞ്ഞു. കൊല്‍ക്കത്ത, ചെന്നൈ, ദില്ലി, അഹമ്മദാബാദ്, ചണ്ടീഗഢ്, പട്‌ന, ബംഗളുരു എന്നീ നഗരങ്ങളില്‍ റെയ്ഡ് നടന്നു.

കള്ളപ്പണം വെളുപ്പിക്കുന്നതിനും നികുതി വെട്ടിക്കുന്നതിനും സഹായിക്കുന്ന നിരവധി കടലാസ് കമ്പനികളെ കഴിഞ്ഞമാസം പ്രധാനമന്ത്രിയുടെ ഓഫീസ് കണ്ടെത്തിയിരുന്നു. പ്രധാനമന്ത്രിയുടെ കള്ളപ്പണത്തിനെതിരായ പോരാട്ടത്തിന് വെല്ലുവിളി ഉയര്‍ത്തി നിലനില്‍ക്കുകയായിരുന്നു ഈ സ്ഥാപനങ്ങള്‍.

റെയ്ഡിന്റെ പശ്ചാത്തലത്തില്‍ കള്ളപ്പണം വെളുപ്പിക്കുന്നകമ്പനികളുടേയും അതിന്റെ ഡയറക്ടര്‍മാരുടേയും പട്ടിക തയ്യാറാക്കാന്‍ കേന്ദ്രസര്‍ക്കാര്‍ തീരുമാനിച്ചിട്ടുണ്ട്. റവന്യൂ സെക്രട്ടറി, കോര്‍പ്പറേറ്റ്കാര്യ സെക്രട്ടറി എന്നിവരുടെ സംയുക്ത നേതൃത്വത്തിലായിരിക്കും ഇത്തരം കമ്പനികള്‍ക്കെതിരെ നടപടികള്‍ കൈക്കൊള്ളുക.

കഴിഞ്ഞ മൂന്ന് വര്‍ഷത്തിനിടെ കള്ളപ്പണം വെളുപ്പിക്കുന്ന 1,155 കമ്പനികളെ തിരിച്ചറിഞ്ഞിട്ടുണ്ടെന്ന് സര്‍ക്കാര്‍ വൃത്തങ്ങള്‍ വ്യക്തമാക്കി. 22,000 ലേറെ ഉപഭോക്താക്കളാണ് ഇത്തരം കമ്പനികള്‍ വഴി കള്ളപ്പണം വെളുപ്പിക്കുന്നതെന്നും കണ്ടെത്തിയിട്ടുണ്ട്. 13,300 കോടിയോളം രൂപയുടെ സംശയാസ്പദമായ ഇടപാടുകള്‍ നടത്തിയിട്ടുണ്ടെന്നാണ് ഈ കമ്പനികള്‍ക്കെതിരെയുള്ള കേസ്.