ബിജെപി പണികൊടുത്തു നേതാവും മകനും പെട്ടു. മുതിര്‍ന്ന കോണ്‍ഗ്രസ് നേതാവ് വയലാര്‍ രവിയുടെ മകന്‍ രവികൃഷ്ണയുടെ സ്വത്ത് എന്‍ഫോഴ്‌സ്‌മെന്റ് ഡയറക്ടറേറ്റ് കണ്ടുകെട്ടി. രാജസ്ഥാനിലെ ആംബുലന്‍സ് അഴിമതിയുമായി ബന്ധപ്പെട്ടാണ് നടപടി. സിക്വിറ്റ്‌സ ഹെല്‍ത്ത് കെയര്‍ ലിമിറ്റഡ് എന്ന സ്ഥാപനത്തിന്റെ ഡയറക്ടറാണ് രവികൃഷ്ണ.
മറ്റൊരു ഡയറക്ടറായ ശ്വേത മംഗളിന്റെ സ്വത്തുക്കളും കണ്ടുകെട്ടിയിട്ടുണ്ട്. ഇരുവരുടേതുമായി 11.57 കോടി രൂപയുടെ സ്വത്തുക്കളാണ് കള്ളപ്പണം വെളുപ്പിക്കുന്നത് തടയുന്ന നിയമപ്രകാരം പിടിച്ചത്.
2010ലാണ് കേസിനാസ്പദമായ സംഭവം നടന്നത്. അന്ന് രാജസ്ഥാന്‍ ഭരിച്ചിരുന്ന കോണ്‍ഗ്രസ് മന്ത്രിസഭ രവികൃഷ്ണയുടെ കമ്പനിക്ക് ആംബുലന്‍സുകളുടെ കരാര്‍ നല്‍കി. എന്നാല്‍ ആംബുലന്‍സ് പദ്ധതിയുമായി ബന്ധപ്പെട്ട് വന്‍ ക്രമക്കേട് നടന്നതായി എന്‍ഫോഴ്‌സ്‌മെന്റ് കണ്ടെത്തി. ട്രിപ്പുകളുടെ എണ്ണത്തില്‍ ക്രമക്കേട് നടത്തിയെന്നും ജിപിഎസ് സംവിധാനം ഘടിപ്പിക്കാതെയാണ് ട്രിപ്പുകള്‍ നടത്തിയതെന്നും കണ്ടെത്തിയിരുന്നു. സിക്വിറ്റ്‌സയ്ക്ക് യോഗ്യതയില്ലാതെയാണ് കരാര്‍ ലഭിച്ചതെന്നും അന്വേഷണത്തില്‍ കണ്ടെത്തിയിരുന്നു. ഇതിന്റെയെല്ലാം അടിസ്ഥാനത്തിലാണ് സ്വത്തുകള്‍ കണ്ടുകെട്ടാന്‍ എന്‍ഫോഴ്‌സ്‌മെന്റ് തീരുമാനിച്ചത്.
പദ്ധതി ഏറ്റെടുത്ത സികിത്സാ ഹെല്‍ത്ത് കീയര്‍ ലിമിറ്റഡിലെ ഡയറക്ടര്‍മാരായിരുന്നു വയലാര്‍ രവിയുടെ മകന്‍ രവി കൃഷ്ണയും പി ചിദംബരത്തിന്റെ മകന്‍ കാര്‍ത്തി ചിദംബരവും രാജസ്ഥാന്‍ കോണ്‍ഗ്രസ് അധ്യക്ഷന്‍ സച്ചിന്‍ പൈലറ്റും. രാജസ്ഥാന്‍ മുന്‍ ആരോഗ്യമന്ത്രി, സികിത്സാ കമ്പനിയുടെ മുന്‍ ഡയറക്ടറായ ഷാഫി മേത്തര്‍ എന്നിവര്‍ക്കെതിരെയും എഫ്‌ഐആര്‍ രജിസ്റ്റര്‍ ചെയ്തിട്ടുണ്ട്. കരാര്‍ ക്രമവിരുദ്ധമായി നേടിയെന്നും ആംബുലന്‍സുകള്‍ ഓടിയതിനേക്കാള്‍ കൂടുതല്‍ പണം എഴുതി തട്ടിപ്പ് നടത്തിയെന്നുമാണ് ആരോപണം. രാജസ്ഥാന്‍ സര്‍ക്കാരിന്റെ നിര്‍ദ്ദേശാനുസരണമാണ് അഴിമതി കേസ് സിബിഐ ഏറ്റെടുത്തത്.
കമ്പ്‌ട്രോളര്‍ ആന്‍ഡ് ഓഡിറ്റര്‍ ജനറല്‍ ആംബുലന്‍സ് നടത്തിപ്പിലുണ്ടായ ക്രമക്കേടും അഴിമതിയും സംബന്ധിച്ച് റിപ്പോര്‍ട്ടില്‍ പറഞ്ഞിരുന്നു. ഇതിന്റെ അടിസ്ഥാനത്തിലാണ് രാജസ്ഥാനില്‍ മുഖ്യമന്ത്രി അശോക് ഗലോട്ട്, കോണ്‍ഗ്രസ് അധ്യക്ഷന്‍ സച്ചിന്‍ പെയിലറ്റ്, കാര്‍ത്തി ചിദംബരം, വയലാര്‍ രവിയുടെ മകന്‍ രവി കൃഷ്ണ എന്നിവര്‍ക്കെതിരെ സിബിഐ കേസെടുത്തത്. ഇതേ കമ്പനിയുമായി ബന്ധപ്പെട്ടാണ് കേരളത്തിലും ആംബുലന്‍സ് നടത്തിപ്പില്‍ അഴിമതി ഉയര്‍ന്നിട്ടുള്ളത്. മുഖ്യമന്ത്രി ഉമ്മന്‍ ചാണ്ടിയുടെ മുന്‍ സാമ്പത്തിക ഉപദേഷ്ടാവ് ഷാഫി മേത്തറും കേസില്‍ ആരോപണവിധേയനായിരുന്നു.
2009ല്‍ കോണ്‍ഗ്രസ് ഭരണകാലത്താണ് തട്ടിപ്പ് അരങ്ങേറിയത്. ആംബുലന്‍സ് സര്‍വ്വീസ് നടത്തിയതിനേക്കാള്‍ ബില്ല് പെരുപ്പിച്ച് കാണിച്ച് 2.56 കോടിരൂപ തട്ടിക്കുകയായിരുന്നു. സര്‍വ്വീസിനായി കരാര്‍ നേടിയെടുത്തതും ക്രമവിരുദ്ധമായിട്ടായിരുന്നു. വഞ്ചന, തട്ടിപ്പ്, ക്രിമിനല്‍ ഗൂഢാലോചന എന്നീ വകുപ്പുകള്‍ പ്രകാരമാണ് സിബിഐ കേസ് എടുത്തിരിക്കുന്നത്. ദേശീയ ഗ്രാമീണ ആരോഗ്യമിഷന്‍ പദ്ധതി പ്രകാരം പൊതു, സ്വകാര്യ ഉടമസ്ഥതയില്‍ രവി കൃഷ്ണയുടെ കമ്പനി രാജസ്ഥാനില്‍ നടത്തിയ 108 ആംബുലന്‍സ് സര്‍വ്വീസ് നടത്തിപ്പിലാണ് കേസ് എടുത്തിരിക്കുന്നത്.