എല്ലാം കര്‍ഷകരുടെ ക്ഷേമത്തിന് വേണ്ടിയാണല്ലോ എന്നോര്‍ക്കുമ്പോഴാ ഒരാശ്വാസം. അഞ്ച് വര്‍ഷത്തെ കൊടിയ വളര്‍ച്ചയില്‍ വലയുന്ന മഹാരാഷ്ട്രയിലെ ജനങ്ങളുടെ ദുരിതം പരിഹരിക്കാന്‍ വിദേശ യാത്ര നടത്തുകയാണ് സംസ്ഥാന കൃഷി മന്ത്രിയും 15 എംഎല്‍എമാരും. കര്‍ഷകുടെ കടങ്ങളും വായ്പകളും എങ്ങനെ കൈകാര്യം ചെയ്യണമെന്ന് പഠിക്കുന്നതിന് വേണ്ടിയാണ് മന്ത്രിയും കൂട്ടരും ആസ്‌ത്രേലിയ ന്യൂസിലാന്‍ഡ് എന്നീ രാജ്യങ്ങളിലേക്ക് പറന്നിരിക്കുന്നത്. ഇടയ്‌ക്കൊന്ന് സിഗംപ്പൂരിലും തങ്ങിയ സംഘത്തിന് ആളൊന്നിന് ചെലവാകുക ആറ് ലക്ഷം രൂപ. ഈ തുകയുടെ പകുതിയാണ് സര്‍ക്കാര്‍ നല്‍കുന്നത്. സംഘത്തില്‍ കോണ്‍ഗ്രസ് ഉള്‍പ്പടെയുള്ള പ്രതിപക്ഷ പാര്‍ട്ടികളുടെ പ്രതിനിധികളെയും ഉള്‍പ്പെടുത്തിയിട്ടുണ്ട്. രണ്ടാഴ്ച്ച കാലയളവിലെ സന്ദര്‍ശനത്തിനാണ് സംഘം പോയിരിക്കുന്നത്.
കഴിഞ്ഞ ചൊവ്വാഴ്ച്ചയാണ് മന്ത്രിയും എംഎല്‍എമാരും യാത്ര പുറപ്പെട്ടത്. മറ്റ് രാജ്യങ്ങളില്‍ കര്‍ഷകരുടെ കടങ്ങള്‍ എങ്ങനെ കൈകാര്യം ചെയ്യുന്നെന്ന് പഠിക്കേണ്ടത് അനിവാര്യമാണെന്നാണ് ധനകാര്യ മന്ത്രി സുധീര്‍ മുന്‍ഗാന്ദിവാര്‍ മാധ്യമങ്ങളോട് പറഞ്ഞത്.
ഉത്തര്‍ പ്രദേശില്‍ യോഗി ആദിത്യനാഥ് കര്‍ഷകരുടെ കടങ്ങള്‍ എഴുതി തള്ളിയത് പോലെ മഹാരാഷ്ട്രയിലെ കര്‍ഷകരുടെ കടങ്ങളും എഴുതി തള്ളണമെന്ന് കര്‍ഷകര്‍ ആവശ്യപ്പെട്ടിരുന്നു. 30,000 കോടി രൂപയാണ് മഹാരാഷ്ട്രയിലെ കര്‍ഷകുടെ മൊത്തം കടം. ഈ ആവശ്യം അനുഭാവ പൂര്‍വ്വം പരിഗണിക്കാമെന്നും മുഖ്യമന്ത്രി ദേവേന്ദ്ര ഫഡ്‌നാവിസ് ഉറപ്പ് നല്‍കിയിരിക്കുന്നു.
ഏഴുന്നൂറിലധികം കര്‍ഷകരാണ് കഴിഞ്ഞ വര്‍ഷം മഹാരാഷ്ട്രയിലെ വരള്‍ച്ചാ ബാധിത പ്രദേശങ്ങളായ വിദര്‍ഭയിലും മറാത്തവാഡയിലുമായി ആത്മഹത്യ ചെയ്തത്.
കാര്‍ഷിക കടങ്ങള്‍ എഴുതി തള്ളുന്നതിന് പുറമേ ഉത്പന്നങ്ങള്‍ക്ക് ഉയര്‍ന്ന വില ഉറപ്പാക്കണമെന്നും കര്‍ഷകര്‍ ആവശ്യപ്പെട്ടിരുന്നു. നടപടിയിയുണ്ടാവത്തില്‍ പ്രതിഷേധിച്ച് ഇന്നലെ കര്‍ഷകര്‍ വിളയിച്ച വിളകള്‍ സര്‍ക്കാരിന്റെ മുഖ്യകര്യാലയത്തിന് മുന്നില്‍ ഉപേക്ഷിച്ചിരുന്നു.
2009ല്‍ കോണ്‍ഗ്രസ് സര്‍ക്കാരിന്റെ നേതൃത്വത്തില്‍ പ്രശ്‌ന പരിഹാരത്തിനായി വിദേശ യാത്രയ്ക്ക് ശ്രമിച്ചിരുന്നു. എന്നാല്‍ വിമര്‍ശനങ്ങളെ തുടര്‍ന്ന് പദ്ധതി ഉപേക്ഷിച്ചു. വിദേശയാത്ര പദ്ധതി കൃഷി മന്ത്രി ഉപേക്ഷിക്കണമായിരുന്നെന്ന് പ്രതിപക്ഷ നേതാവും കോണ്‍ഗ്രസ് നേതാവുമായ രാധാ കൃഷ്ണ പാട്ടില്‍ അഭിപ്രായപ്പെട്ടു. പക്ഷേ വിദേശ യാത്ര നടത്തുന്ന സംഘത്തില്‍ ഒരു കോണ്‍ഗ്രസ് എംഎല്‍എയും ഉള്‍പ്പെട്ടിട്ടുണ്ട്.