രാജ്യംവിട്ട വിവാദ വ്യവസായി വിജയ് മല്യയെ എത്രയും പെട്ടെന്ന് കൈമാറണമെന്നു ബ്രിട്ടനോട് ഇന്ത്യ. വായ്പയെടുത്ത് മുങ്ങിയ മല്യയെ തിരികെ എത്തിക്കാനുള്ള നടപടിക്രമങ്ങളെല്ലാം വേഗത്തില്‍ പൂര്‍ത്തിയാക്കണമെന്നു കേന്ദ്ര ആഭ്യന്തര സെക്രട്ടറി രാജീവ് മെഹര്‍ഷി ആവശ്യപ്പെട്ടു. ബ്രിട്ടീഷ് ആഭ്യന്തര മന്ത്രാലയ സെക്കന്‍ഡ് പെര്‍മനന്റ് സെക്രട്ടറി പാറ്റ്‌സി വില്‍കിന്‍സണുമായി ഡല്‍ഹിയില്‍ നടത്തിയ ചര്‍ച്ചയിലാണ് ഇന്ത്യ നിലപാട് വ്യക്തമാക്കിയത്.
തീവ്രവാദം നേരിടാനുള്ള സഹകരണത്തിന്റെ ഭാഗമായി ഡല്‍ഹിയില്‍ നടന്ന കൂടിക്കാഴ്ചയിലാണ് മല്യയുടെ വിഷയം ഇന്ത്യ ഉന്നയിച്ചത്. ബ്രിട്ടനില്‍ ചിലയിടത്തുള്ള സിഖ് തീവ്രവാദം, ഇരു രാജ്യങ്ങളിലെയും ഐഎസ് തീവ്രവാദം എന്നീ വിഷയങ്ങളും ചര്‍ച്ച ചെയ്തു. കൂടിക്കാഴ്ച രണ്ടു മണിക്കൂര്‍ നീണ്ടു. 1992ല്‍ ഇന്ത്യയും ബ്രിട്ടനും കുറ്റവാളികളെ കൈമാറല്‍ കരാറില്‍ ഒപ്പിട്ടിരുന്നു. പക്ഷേ ഇതുവരെ ഒരാളെ മാത്രമേ ബ്രിട്ടന്‍ കൈമാറിയിട്ടുള്ളൂ. ഗോധ്ര കലാപത്തില്‍ പങ്കുള്ള സമിര്‍ബായ് വിനുബായ് പട്ടേലിനെ 2002ല്‍ ബ്രിട്ടന്‍ ഇന്ത്യയിലേക്ക് മടക്കി അയച്ചിരുന്നു.
ഏപ്രില്‍ 18ന് മല്യ ലണ്ടനില്‍ അറസ്റ്റിലായെങ്കിലും മണിക്കൂറുകള്‍ക്കുള്ളില്‍ ജാമ്യത്തില്‍ വിട്ടയച്ചു. ബാങ്കുകളില്‍ നിന്ന് കോടികള്‍ വായ്പയെടുത്ത് മുങ്ങിയ കേസില്‍ വിജയ് മല്യയെ ഇന്ത്യ പിടികിട്ടാപ്പുള്ളിയായി പ്രഖ്യാപിച്ചിരിക്കുകയാണ്. 17 ബാങ്കുകളില്‍നിന്നുള്ള 7000 കോടി രൂപ വായ്പയും പലിശയുമടക്കം 9000 കോടി രൂപ തിരിച്ചടയ്ക്കാത്തതു സംബന്ധിച്ച കേസ് അന്വേഷിക്കുന്ന എന്‍ഫോഴ്‌സ്‌മെന്റ് ഡയറക്ടറേറ്റിന്റെ (ഇഡി) അഭ്യര്‍ഥനയനുസരിച്ചായിരുന്നു നടപടി. കുറ്റവാളികളെ കൈമാറുന്നതിന് ഇരുരാജ്യങ്ങളും തമ്മിലുള്ള കരാര്‍ പ്രകാരം മല്യയെ ഇന്ത്യയിലേക്കു തിരികെ അയയ്ക്കണമെന്ന് ആവശ്യപ്പെട്ട് ഫെബ്രുവരി എട്ടിന് ഇന്ത്യ ബ്രിട്ടന് കത്തു നല്‍കിയിരുന്നു.