ഇതിലും വലുത് ചാടിക്കടന്നതാ പിന്നാണ് ഇത്. ഗര്‍ഭപാത്രത്തില്‍ ഗര്‍ഭനിരോധനത്തിനായി നിക്ഷേപിച്ച ഹോര്‍മോണല്‍ കോയിലും കയ്യില്‍ പിടിച്ചു പുറത്തേക്കു വന്ന കുഞ്ഞിന്റെ ചിത്രമാണ് ഇപ്പോള്‍ സോഷ്യല്‍ മീഡിയയില്‍ വൈറല്‍ ആയിക്കൊണ്ടിരിക്കുന്നത്.ഏക്കാലത്തെയും ഐതിഹാസിക ചിത്രമെന്നാണ് ഇതിനെ വിലയിരുത്തുന്നത്. 99 ശതമാനവും വിജയകരമാകുമെന്ന് ശാസ്ത്രം വിലയിരുത്തിയ ഗര്‍ഭനിരോധന മാര്‍ഗത്തിന്റെ ഭാവിയും ഇതോടെ ചോദ്യംചെയ്യപ്പെടുന്നു.

ഗര്‍ഭപാത്രത്തില്‍ നിക്ഷേപിക്കുന്ന മിറേനയെന്ന കോയിലാണ് ഗര്‍ഭനിരോധനത്തിനായി ഉപയോഗിക്കുന്നത്. അലബാമക്കാരിയായ യുവതി കഴിഞ്ഞ സെപ്റ്റംബറിലാണ് ഇത് നിക്ഷേപിച്ചത്. എന്നാല്‍, അസ്വസ്ഥതയെത്തുടര്‍ന്ന് ഡിസംബറില്‍ പരിശോധിക്കുമ്പോള്‍ അവര്‍ ഗര്‍ഭിണിയാണെന്ന് തിരിച്ചറിയുകയായിരുന്നു. ഗര്‍ഭഛിദ്രം നടത്താനാവുന്ന 18 ആഴ്ചയും അപ്പോഴേക്കും പിന്നിട്ടിരുന്നു.

അലബാമക്കാരിയായ ഹെല്ലെയിനാണ് കഥയിലെ നായിക. സെപ്റ്റംബറില്‍ ഗര്‍ഭനിരോധന മാര്‍ഗം ഗര്‍ഭപാത്രത്തില്‍ നിക്ഷേപിച്ചെങ്കിലും ഏതാനും ദിവസത്തിനുശേഷം അവര്‍ ഗര്‍ഭം ധരിച്ചുവെന്നാണ് കരുതുന്നത്. തുടക്കത്തില്‍ സ്‌കാനിങ്ങിലും ഇത് കണ്ടെത്തിയിരുന്നില്ല. പിന്നീടിത് പ്ലാസന്റയ്ക്ക് പുറകിലായി കണ്ടെത്തി.
ഒടുവില്‍ കുഞ്ഞ് പുറത്തേയ്ക്ക് വന്നപ്പോഴാണ് സംഗതിയാകെ മാറിയത്. ചുരുട്ടിപ്പിടിച്ച കൈയില്‍ കോയിലുമായാണ് ഡെക്സ്റ്റര്‍ എന്ന് പേരിട്ട ആണ്‍കുട്ടിയുടെ വരവ്. ശാസ്ത്രത്തെപ്പോലും തോല്‍പിച്ചുകൊണ്ടുള്ള മകന്റെ വരവ് ചരിത്രമാക്കാന്‍ അവരും തീരുമാനിച്ചു. കൈയില്‍ കോയിലുമായുള്ള ആ ചിത്രം ഹെല്ലെയ്ന്‍ സോഷ്യല്‍ മീഡിയയിലിട്ടു.

ഇതിനകം 71,000 പേരാണ് ഈ ചിത്രം ഷെയര്‍ ചെയ്തത്. കുഞ്ഞ് വേണമെന്ന് ആദ്യം കരുതിയിരുന്നില്ലെങ്കിലും ഡെക്സ്റ്ററുടെ വരവ് അനുഗ്രഹമായാണ് ഇപ്പോള്‍ കുടുംബം കാണുന്നതെന്ന് ഹെല്ലെയ്ന്‍ പറഞ്ഞു. സിസേറിയനിലൂടെയാണ് കഴിഞ്ഞയാഴ്ച ഹെല്ലെയ്ന്‍ ഡെക്സ്റ്ററിന് ജന്മം നല്‍കിയത്.
മൂന്നാം തവണയാണ് താന്‍ ഗര്‍ഭനിരോധന മാര്‍ഗം ഉപയോഗിക്കുന്നതെന്ന് ഹെല്ലെയ്ന്‍ പറഞ്ഞു. അഞ്ചുവര്‍ഷത്തോളം കാലാവധിയുള്ളതാണ് ഈ കോയില്‍. ഏറ്റവും സുരക്ഷിതമായ ഗര്‍ഭനിരോധന മാര്‍ഗങ്ങളിലൊന്നായാണ് ഇത് വിലയിരുത്തപ്പെടുന്നത്.