ഇന്ത്യയുടെ ബഹിരാകാശ ദൗത്യങ്ങളില്‍ നാഴികക്കല്ലായി ജി സാറ്റ് 9 (സൗത്ത് ഏഷ്യന്‍ സാറ്റലൈറ്റ്) ഭ്രമണപഥത്തിലേക്കു കുതിച്ചുയര്‍ന്നു. ആന്ധ്രാപ്രദേശിലെ ശ്രീഹരിക്കോട്ടയിലുള്ള സതീഷ് ധവാന്‍ ബഹിരാകാശ കേന്ദ്രത്തിലെ വിക്ഷേപണത്തറയില്‍നിന്ന് ഇന്നലെ വൈകിട്ട് 4.57 നായിരുന്നു വിക്ഷേപണം. ജി.എസ്.എല്‍.വി. എഫ്. 09 റോക്കറ്റാണ് ജി സാറ്റ് 9 ഉപഗ്രഹത്തെ ബഹിരാകാശത്തെത്തിച്ചത്.

സാര്‍ക്ക് രാജ്യങ്ങളുടെ സാമ്പത്തിക, വികസന കാര്യങ്ങള്‍ക്കു മുന്‍തൂക്കം നല്‍കുന്ന വാര്‍ത്താ വിനിമയ ഉപഗ്രഹമാണു ജി സാറ്റ് 9. 49 മീറ്റര്‍ നീളമുള്ള ഉപഗ്രഹത്തിന് 2,230 കിലോഗ്രാം ഭാരമുണ്ട്. വാര്‍ത്താ വിനിമയം, ടെലിവിഷന്‍ സംപ്രേഷണം, ഡി.ടി.എച്ച്., വിദ്യഭ്യാസം, ടെലി മെഡിസിന്‍, ദുരന്തനിവാരണം തുടങ്ങിയ വിവിധ ആവശ്യങ്ങള്‍ക്ക് ഉപകരിക്കുന്നതാണു ജി സാറ്റ് 9. ഇത് 12 വര്‍ഷം പ്രവര്‍ത്തിക്കുമെന്നാണു കണക്ക്.
2014 ല്‍ നേപ്പാള്‍ തലസ്ഥാനമായ കാഠ്മണ്ഡുവില്‍ നടന്ന സാര്‍ക്ക് ഉച്ചകോടിയിലാണ് ഇന്ത്യന്‍ പ്രധാനമന്ത്രി നരേന്ദ്ര മോഡി അയല്‍ക്കാര്‍ക്കുള്ള ഇന്ത്യയുടെ സമ്മാനമെന്ന പേരില്‍ ജി സാറ്റ് 9 റോക്കറ്റ് പ്രഖ്യാപിച്ചത്. സാര്‍ക്ക് സാറ്റലൈറ്റ് എന്ന് പേരിട്ടെങ്കിലും പാകിസ്താന്‍ പിന്മാറിയതിനാല്‍ സൗത്ത് ഏഷ്യന്‍ സാറ്റലൈറ്റ് എന്നു മാറ്റുകയായിരുന്നു. ശ്രീലങ്ക, ബംഗ്ലാദേശ്, നേപ്പാള്‍, ഭൂട്ടാന്‍, അഫ്ഗാനിസ്ഥാന്‍, മാലദ്വീപ് തുടങ്ങിയ സാര്‍ക്ക് അംഗരാജ്യങ്ങള്‍ക്ക് ജി സാറ്റ് 9 ന്റെ സേവനം ലഭിക്കും.

ഉപഗ്രഹം പ്രവര്‍ത്തിപ്പിക്കാന്‍ പരീക്ഷണാടിസ്ഥാനത്തില്‍ വൈദ്യുതോര്‍ജവും ഉപയോഗിക്കുന്നുണ്ടെന്ന് ഐ.എസ്.ആര്‍.ഒ. വ്യക്തമാക്കി. ഭാവിയില്‍ വൈദ്യുതോര്‍ജം ഉപയോഗിച്ചുള്ള ഉപഗ്രഹ വിക്ഷേപണങ്ങള്‍ക്കുള്ള മുന്നോടിയാണിതെന്നും ഐ.എസ്.ആര്‍.ഒ. അറിയിച്ചു. അടുത്ത വിക്ഷേപിക്കാനിരിക്കുന്ന ജി സാറ്റ് 20 വൈദ്യുതോര്‍ജം ഉപയോഗിച്ചു പ്രവര്‍ത്തിപ്പിക്കാനാണ് ഉദ്ദേശിക്കുന്നത്‌