ജമ്മു കശ്മീരില്‍ വീണ്ടുമുണ്ടായ ഭീകരാക്രമണത്തില്‍ പൊലീസുകാരന്‍ ഉള്‍പ്പെടെ നാലു മരണം
കശ്മീര്‍ സ്ഥിതിഗതികള്‍ സ്‌ഫോടനാത്മകമായി തുടരുന്നു. കുല്‍ഗാം ജില്ലയില്‍ ഭീകരാക്രമണത്തില്‍ ഒരു പൊലീസുകാരനും ഭീകരനുമടക്കം നാലുപേര്‍ കൊല്ലപ്പെട്ടു. പൊലീസ് വാഹനത്തിനുനേരെ ഭീകരര്‍ വെടിവയ്ക്കുകയായിരുന്നു. അതിനിടെ, കശ്മീര്‍ സ്ഥിതിഗതികള്‍ സ്‌ഫോടനാത്മകമായി തുടരുകയാണ്. ഇന്നലെ പാക്ക് അധിനിവേശ കശ്മീരില്‍നിന്നു ഭീകരര്‍ അയച്ചതെന്നു സംശയിക്കുന്ന പന്ത്രണ്ടുകാരന്‍ അതിര്‍ത്തി കടന്നു വന്നപ്പോള്‍ ഇന്ത്യന്‍ സൈന്യം പിടികൂടി.
മധ്യകശ്മീരില്‍ കനാലില്‍നിന്നു സ്ത്രീയുടെ മൃതദേഹം കണ്ടെടുത്തതിനെ തുടര്‍ന്ന് കൊലപാതകമാണെന്നാരോപിച്ചു നാട്ടുകാര്‍ വഴി തടഞ്ഞു. ഇതിനിടെ, പൊലീസിന്റെ ചാരന്മാരെന്നാരോപിച്ചു രണ്ടു യുവാക്കളെ ഹിസ്ബുല്‍ മുജാഹിദീന്‍ ഭീകരര്‍ ക്രൂരമായി മര്‍ദിക്കുന്നതിന്റെ വിഡിയോ അധികൃതരുടെ വിലക്കുകള്‍ മറികടന്നും വൈറലായി. പുല്‍വാമ ജില്ലയില്‍ വിദ്യാര്‍ഥികളും സുരക്ഷാസേനയും ഏറ്റുമുട്ടി. സൈനികരുടെ നടപടികള്‍ക്കെതിരെ പ്രതിഷേധിക്കാന്‍ സര്‍ക്കാര്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികള്‍ നടത്തിയ നീക്കമാണു പുല്‍വാമ ജില്ലയില്‍ വിദ്യാര്‍ഥികളും സേനയും തമ്മിലുള്ള ഏറ്റുമുട്ടലായി മാറിയതെന്നു പൊലീസ് അറിയിച്ചു.
ശ്രീനഗറിലും പ്രതിഷേധപ്രകടനം നടത്തിയ വിദ്യാര്‍ഥികളെ അറസ്റ്റ് ചെയ്തിട്ടുണ്ട്. കശ്മീരില്‍ വൈറലായ വിഡിയോയില്‍ മര്‍ദനമേറ്റ യുവാക്കള്‍ തങ്ങള്‍ പൊലീസിന്റെ ചാരന്മാരായി പ്രവര്‍ത്തിച്ചിട്ടുണ്ടെന്ന് ഏറ്റുപറയുന്നതും കരുണയ്ക്കായി യാചിക്കുന്നതും കാണാം. പൊലീസ് ഇതേക്കുറിച്ച് അന്വേഷണം തുടങ്ങി.
രജൗരി ജില്ലയിലെ നിയന്ത്രണരേഖ കടന്നു വന്ന അഷ്ഫാഖ് അലി ചൗഹാന്‍ എന്ന പന്ത്രണ്ടുകാരനെയാണു സൈന്യം പിടികൂടിയത്. ഭീകരര്‍ അയച്ചതാണോ എന്ന് അന്വേഷിക്കാന്‍ സൈനികര്‍ കുട്ടിയെ പൊലീസിനു കൈമാറി.
https://www.facebook.com/Malayalivartha
