കോണ്‍ഗ്രസ് നേതാവ് അജയ് മാക്കന് മറുപടിയുമായി കേന്ദ്ര മാനവ വിഭവ ശേഷി മന്ത്രി സ്മൃതി ഇറാനി. വിദ്യാഭ്യാസത്തിന്റെ അടിസ്ഥാനത്തിലല്ല, പ്രവൃത്തിയുടെ അടിസ്ഥാനത്തിലാണ് തന്നെ വിലയിരുത്തേണ്ടതെന്ന് സ്മൃതി ഇറാനി പറഞ്ഞു. തന്നെ ജനം വിലയിരുത്തട്ടെയെന്നും ഉത്തരവാദിത്വത്തില്‍ നിന്നും തന്നെ വ്യതിചലിപ്പിക്കുന്നതിനാണ് കോണ്‍ഗ്രസിന്റെ ആക്രമണമെന്നും സ്മൃതി പറഞ്ഞു.

സ്മൃതി ഇറാനിയുടെ വിദ്യാഭ്യാസ യോഗ്യത സംബന്ധിച്ച് കോണ്‍ഗ്രസ് നേതാവ് അജയ് മാക്കന്‍ ട്വിറ്ററിലൂടെ നടത്തിയ പരാമര്‍ശം വിവാദമായിരുന്നു. മാനവ വിഭവ ശേഷി മന്ത്രിക്ക് എത്ര വിദ്യാഭ്യാസം വേണമെന്നും വിദ്യാഭ്യാസ യോഗ്യത സംബന്ധിച്ച് 2014ലെയും 2004ലെയും തെരഞ്ഞെടുപ്പുകളില്‍ സ്മൃതി ഇറാനി നല്‍കിയ സത്യവാങ്മൂലങ്ങളിലെ വൈരുദ്ധ്യവും ചര്‍ച്ച ചെയ്യപ്പെട്ടു. സ്മൃതി ഇറാനിയുടെ വിദ്യഭ്യാസ യോഗ്യത ചോദ്യം ചെയ്യുന്ന കോണ്‍ഗ്രസ് സോണിയ ഗാന്ധിയുടെ യോഗ്യത വ്യക്തമാക്കണമെന്ന് ബിജെപിയും തിരിച്ചടിച്ചു. അതേസമയം അജയ് മാക്കന്റെ വിമര്‍ശനം തെറ്റായിപ്പോയെന്ന് കോണ്‍ഗ്രസില്‍ നിന്നു തന്നെ അഭിപ്രായമുയര്‍ന്നു. വിദ്യാഭ്യാസവും ബുദ്ധിശക്തിയും അക്ഷരജ്ഞാനവും തമ്മില്‍ വ്യത്യാസമുണ്ടെന്നും സര്‍ക്കാരിനെ വിമര്‍ശിക്കേണ്ടത് വിഷയങ്ങളുടെ പുറത്താണെന്നും കോണ്‍ഗ്രസ് നേതാവ് മനീഷ് തിവാരി പ്രതികരിച്ചു.

ലോക്‌സഭ തെരഞ്ഞെടുപ്പില്‍ അമേഠിയില്‍ കോണ്‍ഗ്രസ്‌ ഉപാധ്യക്ഷന്‍ രാഹുല്‍ഗാന്ധിക്കെതിരെ മത്സരിച്ച സ്‌മൃതി ഇറാനിക്കു പരാജയം നേരിടേണ്ടി വന്നിരുന്നു. എന്നാല്‍ കഴിഞ്ഞ തെരഞ്ഞെടുപ്പില്‍ ലക്ഷങ്ങളുടെ ഭൂരിപക്ഷത്തില്‍ ജയിച്ച രാഹുലിന്റെ ഭൂരിപക്ഷം കുറയ്‌ക്കാന്‍ കഴിഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha