മാധ്യമങ്ങളോടു സംസാരിക്കുമ്പോള്‍ മന്ത്രിമാര്‍ ശ്രദ്ധിക്കണമെന്നു പ്രധാനമന്ത്രി നരേന്ദ്രമോദി ആവശ്യപ്പെട്ടു. വിവാദവിഷയങ്ങളില്‍ മാധ്യമങ്ങളോടു പ്രതികരിക്കരുതെന്നും നിര്‍ദേശം നല്‍കി. വിവാദ പരാമര്‍ശങ്ങള്‍ മന്ത്രിമാര്‍ ഒഴിവാക്കണമെന്നും പ്രധാനമന്ത്രി ആവശ്യപ്പെട്ടു.ബന്ധുക്കളെ പേഴ്‌സണല്‍ സ്റ്റാഫില്‍ ഉള്‍പ്പെടുത്തരുതെന്നും പ്രധാനമന്ത്രി നിര്‍ദ്ദേശിച്ചു.

പാര്‍ലമെന്റ് സമ്മേളന തിയതി നിശ്ചയിക്കുന്നതിനായി കേന്ദ്രമന്ത്രിസഭായോഗം  ഡല്‍ഹിയില്‍  ആരംഭിച്ചു. ജമ്മു കശ്മീരിന് പ്രത്യേക പദവി നല്‍കുന്ന ഭരണഘടനയുടെ 370ാം വകുപ്പ് എടുത്തുകളയുമെന്ന കേന്ദ്രമന്ത്രി ഡോക്ടര്‍ ജിതേന്ദ്ര സിംഗിന്റെ പ്രസ്താവന വിവാദമായ സാഹചര്യത്തിലാണ് മാധ്യമങ്ങളോട് സംസാരിക്കുമ്പോള്‍ കരുതല്‍ വേണമെന്ന് പ്രധാനമന്ത്രി നരേന്ദ്രമോദി മന്ത്രിമാര്‍ക്ക് നിര്‍ദ്ദേശം നല്‍കിയിരിക്കുന്നത്. തങ്ങളുടെ മന്ത്രാലയവുമായി ബന്ധപ്പെട്ട കാര്യങ്ങള്‍ ചിന്തിച്ചുറപ്പിച്ച ശേഷം മാത്രമേ മാധ്യമങ്ങളോട് സംസാരിക്കാവൂ എന്നും വിവാദ പ്രസ്താവനകള്‍ ഒഴിവാക്കണമെന്നും നരേന്ദ്രമോദി നിര്‍ദ്ദേശിച്ചു.

മന്ത്രിമാര്‍ പേഴ്‌സണല്‍ സ്റ്റാഫ് അംഗങ്ങളെ നിയമിക്കുമ്പോള്‍ കുടുംബാംഗങ്ങളെയും ബന്ധുക്കളെയും ഒഴിവാക്കണമെന്നും മോദി മന്ത്രിമാര്‍ക്ക് നിര്‍ദ്ദേശം നല്‍കിയിട്ടുണ്ട്. അതേസമയം മോദി സര്‍ക്കാരിന്റെ രണ്ടാം കേന്ദ്രമന്ത്രിസഭാ യോഗം ആരംഭിച്ചു. പാര്‍ലമെന്റ് സമ്മേളനത്തിന്റെ തീയ്യതി നിശ്ചയിക്കുകയെന്നതാണ് യോഗത്തിന്റെ മുഖ്യ അജണ്ട. സ്പീക്കറെ തെരഞ്ഞെടുക്കുക, രാഷ്ട്രപതിയുടെ നയപ്രഖ്യാപനം എന്നീ കാര്യങ്ങളും മന്ത്രിസഭയുടെ പരിഗണനയിലുണ്ട്. സുമിത്ര മഹാജന്‍ സ്പീക്കറായേക്കുമെന്നാണ് സൂചന. ജൂണ്‍ ആദ്യവാരമായിരിക്കും പാര്‍ലമെന്റ് സമ്മേളനം നടക്കുക. ബജറ്റ് സമ്മേളനം ജുലൈയില്‍ ചേരുമെന്നാണ് സൂചന.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha