കേന്ദ്രമന്ത്രി ഗോപിനാഥ് മുണ്ടെയുടെ മരണകാരണം ഹൃദയാഘാതവും ആന്തരിക രക്തസ്രാവവും
ഇന്ന് രാവിലെ ഡല്ഹിയില് വാഹനാപകടത്തെ തുടര്ന്ന് അന്തരിച്ച കേന്ദ്രമന്ത്രി ഗോപിനാഥ് മുണ്ടെയുടെ മരണകാരണം ഹൃദയാഘാതവും ആന്തരിക രക്തസ്രാവവുമെന്ന് പോസ്റ്റ്മോര്ട്ടം റിപ്പോര്ട്ട്. അപകടം നടന്നു മിനിറ്റുകള്ക്കു ശേഷം അദ്ദേഹത്തിനു ഹൃദയാഘാതമുണ്ടായെന്നും റിപ്പോര്ട്ടില് പറയുന്നു.
പുറമേ വലിയ മുറിവുകളില്ലായിരുന്നെങ്കിലും ഇടിയുടെ ആഘാതത്തില് മുണ്ടെയുടെ വാരിയെല്ലിന് ക്ഷതം സംഭവിച്ചിട്ടുണ്ട്. അദ്ദേഹത്തിന്റെ കരളിനും സാരമായ ക്ഷതമേറ്റിരുന്നു. ഇതേതുടര്ന്നാണ് മരണത്തിനു കാരണമായ ആന്തരിക രക്തസ്രാവവും ഹൃദയാഘാതവും ഉണ്ടായത്.
അപകടത്തെ തുടര്ന്ന് എയിംസിലെ ട്രോമ സെന്ററിലെത്തിക്കുമ്പോള് മുണ്ടെയ്ക്ക് ഹൃദയമിടിപ്പും രക്തസമ്മര്ദവും ശ്വാസോഛ്വാസവും ഉണ്ടായിരുന്നില്ല. തുടര്ന്ന് 15 മിനിറ്റ് നേരം തുടര്ച്ചയായി സിപിആര് നല്കിയെങ്കിലും ജീവന് രക്ഷിക്കാനായില്ലെന്ന് ആശുപത്രി അധികൃതര് അറിയിച്ചു. പ്രമേഹരോഗിയായിരുന്ന അദ്ദേഹം ഹൈപ്പര്ടെന്ഷന് ചികിത്സ തേടിയിരുന്നുവെന്നും ഡോക്ടര്മാര് പറഞ്ഞു.
രാവിലെ 6.20-ന് ഡല്ഹി വിമാനത്താവളത്തിനു സമീപം അരവിന്ദോ മാര്ഗിലാണ് അപകടമുണ്ടായത്. തന്റെ മണ്ഡലമായ മഹാരാഷ്ട്രയിലെ ബീഡില്വച്ച് നടത്താനിരുന്ന വിജയാഘോഷ റാലിയില് പങ്കെടുക്കാനായി ഡല്ഹി വിമാനത്താവളത്തിലേക്കു പോകും വഴിയാണ് സംഭവം. കാറില് മുണ്ടെ ഇരുന്ന വശത്ത് ഒരു ഇന്ഡിക്ക കാര് ഇടിക്കുകയായിരുന്നു. ഇടിയുടെ ആഘാതത്തില് അദ്ദേഹം വാഹനത്തിനുള്ളില് തന്നെ വീണു. പെഴ്സണല് സെക്രട്ടറിയും സുരക്ഷാ ഉദ്യോഗസ്ഥനും അപകടസമയം അദ്ദേഹത്തിനൊപ്പമുണ്ടായിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
