സഹാറാ ഗ്രൂപ്പിന്റെ 34,000 കോടി രൂപ മൂല്യമുള്ള ആംബി വാലി ലേലത്തിനൊരുങ്ങുന്നു. ബോംബെ ഹൈക്കോടതിയുടെ ഔദ്യോഗിക ലിക്വിഡേറ്ററാണ് ലേല നടപടികള്‍ സ്വീകരിക്കുന്നത്. പൂനെയിലെ ആംബി വാലി പ്രോജക്ട് ലേലം ചെയ്യുന്ന നടപടി നിര്‍ത്തിവയ്ക്കാനുള്ള സഹാറാ മേധാവി സുബ്രതാ റോയിയുടെ ഹര്‍ജി സുപ്രീംകോടതി തള്ളിയതിനെ തുടര്‍ന്നാണിത്.

നിക്ഷേപകരില്‍ നിന്ന് 24,000 കോടി തട്ടിയ കേസിലാണ് സഹാറ ഗ്രൂപ്പ് ചെയര്‍മാന്‍ സുബ്രതാ റോയ് നടപടികള്‍ നേരിടുന്നത്. ഏപ്രില്‍17ന് മുമ്പ് അയ്യായിരം കോടിയോളം തിരിച്ചടച്ചില്ലെങ്കില്‍ ആംബി വാലി ലേലം ചെയ്യാന്‍ ഉത്തരവിടുമെന്ന് കോടതി സഹാറ മേധാവി സുബ്രതോ റോയിക്ക് മുന്നറിയിപ്പ് നല്‍കിയിരുന്നു.

സഹാറ റിയല്‍ എസ്‌റ്റേറ്റ്, സഹാറ ഹൗസിംഗ് എന്നീ കമ്പനികള്‍ മൂന്ന് കോടി നിക്ഷേപകരില്‍ നിന്നും അനധികൃതമായി 25,000 കോടിയോളാം രൂപ ഈടാക്കിയെന്ന് കണ്ടെത്തിയിരുന്നു. ഇതുവരെ 11,000 കോടിയോളം സഹാറ തിരിച്ചടച്ചിട്ടുണ്ട്. 2014 മാര്‍ച്ച് 4നാണ് സുബ്രതാ റോയിയെയും കമ്പനിയുടെ രണ്ട് ഡയറക്ടര്‍മാരെയും സുപ്രീം കോടതി ജയിലില്‍ അടച്ചത്.