ഗാന്ധിജിയുടെ പേരില് വ്യാജ പത്ര പരസ്യവുമായി ബിജെപി സര്ക്കാര്
മഹാത്മാഗാന്ധിയുടെ പേരില് വ്യാജ പത്ര പരസ്യവുമായി ജാര്ഖണ്ഡിലെ ബിജെപി സര്ക്കാര്. മതപരിവര്ത്തന വിരുദ്ധ പ്രചരണത്തിന്റെ ഭാഗമായി ക്രിസ്ത്യാനികള്ക്കെതിരെ അധിക്ഷേപസ്വരം ഉയര്ത്താനാണ് ഗാന്ധിജിയുടെ ചിത്രവും അദ്ദേഹത്തിന്റേതെന്ന തരത്തിലുള്ള വാചകങ്ങളും കൂട്ടിച്ചേര്ത്ത് പത്രങ്ങളില് മുഴുപേജ് പരസ്യം പ്രസിദ്ധീകരിച്ചിരിക്കുന്നത്.
കേന്ദ്ര സര്ക്കാരിന്റെ സ്വച്ഛ് ഭാരത് അഭിയാന്റെ ബ്രാന്ഡ് അംബാസഡറായി നിയമിച്ച് മൂന്നു വര്ഷത്തിന് പിന്നാലെയാണ് ബിജെപി സര്ക്കാര് പുതിയ നിയോഗം ഗാന്ധിജിയുടെ ചുമലില് വെച്ചുകെട്ടിയിരിക്കുന്നത്. ഗാന്ധിജി ഒരിക്കലും പറയാത്ത വാചകങ്ങളാണ് അദ്ദേഹത്തിന്റേതെന്ന പേരില് പത്ര പരസ്യത്തില് നല്കിയിരിക്കുന്നത്. ആദിവാസികള്ക്കും ദലിതുകള്ക്കുമിടയില് നടക്കുന്ന മതപരിവര്ത്തനത്തില് ക്രിസ്ത്യന് മിഷിനറിമാരെ അധിക്ഷേപിക്കാനാണ് ഗാന്ധിയുടേതെന്ന തരത്തിലുള്ള വാചകങ്ങള് ഉള്ക്കൊള്ളിച്ചിരിക്കുന്നത്. ക്രിസ്ത്യന് മിഷിനറിമാര് നടത്തുന്ന മതപരിവര്ത്തനത്തെ ഗാന്ധിജി എക്കാലവും എതിര്ത്തിരുന്നുവെന്നും ആദിവാസികളെയും ദലിതുകളെയും മതപരിവര്ത്തനം നടത്തുന്നതിനെതിരെ രാഷ്ട്രപിതാവ് നിലപാട് എടുത്തിരുന്നുവെന്നുമാണ് പരസ്യത്തിന്റെ ഉള്ളടക്കം.
''പാപമോചനം ക്രിസ്തുമതത്തിലൂടെ മാത്രമേ സാധ്യമാകൂവെങ്കില് എന്തുകൊണ്ട് ക്രിസ്ത്യന് മിഷിനറിമാര്ക്ക് എന്നില് നിന്നോ മഹാദേവ് ദേശായിയില് നിന്നോ തുടങ്ങിക്കൂടാ ? നിരക്ഷരരും പാവപ്പെട്ടവരും ആദിവാസികളുമായവരെ എന്തിനാണ് മതപരിവര്ത്തനത്തിന് സമ്മര്ദം ചെലുത്തുന്നത്. അവര്ക്ക് യേശുവും മുഹമ്മദും തമ്മിലുള്ള വ്യത്യാസമൊന്നും അറിയില്ല. നിങ്ങളുടെ പ്രസംഗം ഗ്രഹിക്കാനുള്ള അറിവും അവര്ക്കില്ല. അവര് പശുക്കളെ പോലെ ഊമകളും പാവങ്ങളുമാണ്. അവരൊക്കെ പാവപ്പെട്ടവരും ദലിതരും ആദിവാസികളുമാണ്. അവരെ ക്രിസ്ത്യാനികളാക്കുന്നത് യേശുവിന് വേണ്ടിയല്ല. മറിച്ച് അരിക്കും വയറിനും വേണ്ടിയാണ്'' ഇതായിരുന്നു ഗാന്ധിയുടേതെന്ന തരത്തില് പരസ്യത്തിലുണ്ടായിരുന്ന വാചകങ്ങള്. കയ്യിലൊരു വടിയും ചുണ്ടില് പുഞ്ചിരിയുമായി നില്ക്കുന്ന ഗാന്ധിജിയുടെ ചിത്രമാണ് ഇതിനൊപ്പം ചേര്ത്തിരുന്നത്. പരസ്യത്തില് ജാര്ഖണ്ഡ് മുഖ്യമന്ത്രിയുടെ ചിത്രവുമുണ്ട്.
https://www.facebook.com/Malayalivartha
