സ്‌റ്റൈല്‍ മന്നന്‍ രാഷ്ട്രീയത്തിലിറങ്ങിയാല്‍ ഒപ്പം ചേരുമെന്ന് കമല്‍ഹാസന്‍
സ്‌റ്റൈല്‍ മന്നന്‍ രജനീകാന്ത് രാഷ്ട്രീയത്തിലിറങ്ങുമോയെന്ന ചര്‍ച്ച ചൂടു പിടിക്കവേ തമിഴ്‌നാട് രാഷ്ട്രീയത്തിന്റെ മുഖച്ഛായ മാറ്റിയേക്കാവുന്ന പ്രഖ്യാപനവുമായി നടന്‍ കമല്‍ഹാസന്‍. രജനീകാന്ത് എന്നെങ്കിലും രാഷ്ട്രീയത്തിലേക്കിറങ്ങുകയാണെങ്കില്‍ താന്‍ ഒപ്പം ചേരുമെന്നാണ് 'ഉലകനായകന്റെ' പ്രഖ്യാപനം. സ്വന്തം രാഷ്ട്രീയ പാര്‍ട്ടി പ്രഖ്യാപിക്കുന്നതിന്റെ സൂചനകള്‍ നല്‍കിയതിനു പിന്നാലെയാണ് പുതിയ നീക്കവുമായി കമല്‍ രംഗത്തു വന്നിരിക്കുന്നത്.
ചലച്ചിത്രമേഖലയില്‍ തന്റെ എതിരാളിയാണെങ്കിലും നിര്‍ണായകമായ പല വിഷയങ്ങളിലും തങ്ങള്‍ പരസ്പരം അഭിപ്രായം തേടാറുണ്ടെന്നും രജനീകാന്തുമായുള്ള ബന്ധത്തെപ്പറ്റി കമല്‍ പറഞ്ഞു. രാഷ്ട്രീയ പ്രവേശനത്തെപ്പറ്റി രജനീകാന്ത് ഇതുവരെ വ്യക്തമായ സൂചന നല്‍കിയിട്ടില്ല. എന്നാല്‍ അടുത്തിടെയുണ്ടായ പല സംഭവങ്ങളും അദ്ദേഹം ബിജെപിയോടൊപ്പം ചേരുകയാണെന്ന സൂചനയാണു നല്‍കിയത്. ബിജെപി യുവജനവിഭാഗം അധ്യക്ഷ പൂനം മഹാജന്‍ കഴിഞ്ഞ മാസം രജനീകാന്തിന്റെ ചെന്നൈയിലെ വസതിയിലെത്തി കൂടിക്കാഴ്ച നടത്തിയിരുന്നു.
രാഷ്ട്രീയ പ്രവേശനവുമായി ബന്ധപ്പെട്ട ചോദ്യങ്ങള്‍ക്കു ദൈവം ആഗ്രഹിക്കുകയാണെങ്കില്‍ താന്‍ തീര്‍ച്ചയായും രാഷ്ട്രീയത്തില്‍ ഉണ്ടാകും എന്നാണു രജനീകാന്ത് നേരത്തേ പറഞ്ഞത്. രജനീകാന്ത് ഈ വര്‍ഷം സ്വന്തമായി രാഷ്ട്രീയ പാര്‍ട്ടി പ്രഖ്യാപിക്കുമെന്നു സഹോദരന്‍ സത്യനാരായണ റാവു ഗെയ്ക്കവാദ് വെളിപ്പെടുത്തിയിരുന്നു. പാര്‍ട്ടിയുടെ പേരും ചിഹ്നവും ഉള്‍പ്പെടെയുള്ള കാര്യങ്ങള്‍ തീരുമാനിക്കുന്നതിനായി ചര്‍ച്ചകള്‍ നടക്കുകയാണ്. പദ്ധതികള്‍ക്ക് അന്തിമരൂപം നല്‍കുന്നതിനു മുന്‍പു പരമാവധി ആരാധകരെ നേരില്‍ക്കാണാനാണു താരം ശ്രമിക്കുന്നതെന്നും സഹോദരന്‍ പറഞ്ഞു. കാര്‍ഷികവൃത്തി നഷ്ടത്തിലായ കര്‍ഷകര്‍ക്ക് ഒരു കോടി രൂപ സഹായധനം നല്‍കിയതും രജനീകാന്തിന്റെ രാഷ്ട്രീയ പ്രവേശത്തിനു മുന്നോടിയായുള്ള നീക്കമാണെന്നും നിരീക്ഷണമുണ്ടായി. 
രജനീകാന്ത് സ്വന്തമായി പാര്‍ട്ടിയുണ്ടാക്കുമോ അതോ ബിജെപിയില്‍ ചേരുമോ എന്ന ചര്‍ച്ച സമൂഹമാധ്യമങ്ങളിലും ശക്തമാണ്. ഡിസംബര്‍ 12ന് ആണു രജനിയുടെ ജന്മദിനം. അന്ന് അദ്ദേഹം തന്റെ രാഷ്ട്രീയപ്രവേശനം ഔദ്യോഗികമായി പ്രഖ്യാപിക്കുമെന്ന അഭ്യൂഹവും ശക്തമാണ്. കമല്‍ ആകട്ടെ അടുത്തിടെ കേരളത്തിലെത്തി മുഖ്യമന്ത്രി പിണറായി വിജയനെ കണ്ടിരുന്നു. തന്റെ നിലപാട് ഒരിക്കലും 'കാവി'യെ അനുകൂലിക്കുന്നതല്ല എന്നും അദ്ദേഹം സന്ദര്‍ശനത്തെപ്പറ്റി വ്യക്തമാക്കി.
ഇപ്പോള്‍ പ്രവര്‍ത്തിക്കുന്ന 'ബിഗ് ബോസ്' ചാനല്‍ പരിപാടി കഴിഞ്ഞാല്‍ കമലിന്റെ പാര്‍ട്ടി പ്രഖ്യാപനമുണ്ടാകുമെന്നാണ് അറിയുന്നത്. ബിഗ്‌ബോസ് അടുത്ത മാസം അവസാനിക്കുകയും ചെയ്യും. അണ്ണാഡിഎംകെയെ വിമര്‍ശിച്ച് തുടര്‍ച്ചയായി ട്വീറ്റുകളും നടത്തുന്നുണ്ട് കമല്‍. ഡിഎംകെയുടെ ചടങ്ങില്‍ കമല്‍ഹാസനും രജനീകാന്തും ഒരുമിച്ച് അടുത്തിടെ പങ്കെടുത്തതും ഏറെ അഭ്യൂഹങ്ങള്‍ക്കിടയാക്കി. ഡിഎംകെ മുഖപത്രമായ മുരശൊലിയുടെ എഴുപത്തിയഞ്ചാം വാര്‍ഷികാഘോഷച്ചടങ്ങിലാണു രജനീകാന്തും കമല്‍ ഹാസനും വേദി പങ്കിട്ടത്.
https://www.facebook.com/Malayalivartha
