ഇന്ത്യയില് ലൈംഗിക വിദ്യാഭ്യാസം നിരോധിക്കും
ലൈംഗിക വിദ്യാഭ്യാസം എന്നു കേട്ടാല് ഹാലിളകുന്ന കേന്ദ്രമന്ത്രിയാണ് ഡോ.ഹര്ഷവര്ദ്ധന്. ഗര്ഭനിരോധന ഉറകള്ക്ക് ഗര്ഭം തടയാനാകുമെങ്കിലും പങ്കാളിയോടുള്ള വഞ്ചന തടയാനാകില്ലെന്ന കുപ്രസിദ്ധ പ്രഖ്യാപനത്തിനുശേഷമാണ് ലൈംഗിക വിദ്യാഭ്യാസം ഇന്ത്യയില് നിരോധിക്കുമെന്ന വിവാദ പ്രസ്താവനയുമായി മന്ത്രി രംഗത്തെത്തിയത്. ലൈംഗിക വിദ്യാഭ്യാസത്തിനു പകരം ധാര്മ്മിക മൂല്യങ്ങള് ഉയര്ത്തി പിടിക്കുന്ന വിദ്യാഭ്യാസമാണ് വേണ്ടതെന്ന് പറയാനും മന്ത്രി മറന്നില്ല. ഡല്ഹിയിലെ സ്കൂളുകള്ക്ക് നല്കിയ സന്ദേശത്തിലാണ് ലൈംഗിക വിദ്യാഭ്യാസം നിരോധിക്കുമെന്ന് മന്ത്രി പ്രഖ്യാപിച്ചത്. ഇന്ത്യയുടെ സാംസ്കാരിക മൂല്യങ്ങള് തകര്ക്കാന് മാത്രമേ ലൈംഗിക വിദ്യാഭ്യാസം സഹായിക്കുകയുള്ളൂവെന്നും മന്ത്രി പറഞ്ഞു. ഇപ്പോള് യുണൈറ്റഡ് സ്റ്റേറ്റ്സില് ഔദ്യോഗിക യാത്രയിലുള്ള ഡോ.ഹര്ഷവര്ദ്ധനനെ പ്രതികരണത്തിനായി മാധ്യമങ്ങള് സമീപിച്ചെങ്കിലും അദ്ദേഹത്തിന്റെ പ്രതികരണം ലഭ്യമായിട്ടില്ല. ചുരുക്കത്തില് ഹര്ഷവര്ദ്ധന് ഇന്ത്യയില് തിരിച്ചെത്തിയാലുടന് സെക്സ് എഡ്യൂക്കേഷന് നിരോധിക്കാനാണ് സാധ്യത. അതേസമയം മന്ത്രിയുടെ പ്രതികരണത്തോട് ബി.ജെ.പി പ്രതികരിച്ചിട്ടില്ല. ഗര്ഭ നിരോധന ഉറകള് ഉപയോഗിക്കുന്നതിനെ പറഞ്ഞാണ് ഹര്ഷവര്ദ്ധന് വിവാദം തുടങ്ങി വച്ചത്.
അതേസമയം സാമൂഹ്യപ്രവര്ത്തകര് ഹര്ഷവര്ദ്ധനനെതിരെ രംഗത്തെത്തി കഴിഞ്ഞു. ആര്.എസ്.എസ് അജണ്ട നടപ്പിലാക്കാനാണ് ഹര്ഷവര്ദ്ധന് ശ്രമിക്കുന്നതെന്ന് സന്നദ്ധപ്രവര്ത്തകര് ആരോപിക്കുന്നു. വളരെ നേരത്തെ കുട്ടികള് ലൈംഗിക പക്വത നേടുന്ന കാലമാണ് ഇത്. പെണ്കുട്ടികള് വളരെ നേരത്തെ പ്രായപൂര്ത്തിയാവുന്നു. ലൈംഗികത എന്താണെന്ന് പോലും അറിയാത്ത പ്രായത്തില് പ്രായപൂര്ത്തിയാവുന്നത് അപകടകരമാണ്. രക്ഷകര്ത്താക്കള്ക്കൊപ്പം സ്കൂളുകളിലും ലൈംഗികവിദ്യാഭ്യാസം പ്രചരിപ്പിക്കേണ്ട ആവശ്യമുണ്ട്- സന്നദ്ധ പ്രവര്ത്തകര് പറയുന്നു.
നേരത്തെയും ലൈംഗികവിദ്യാഭ്യാസത്തെ രാഷ്ട്രീയകക്ഷികള് എതിര്ത്തിട്ടുണ്ട്. നാഷണല് എയ്ഡ്സ് കണ്ട്രോള് അസോസിയേഷനും ഹ്യൂമന് റിസോഴ്സ് മന്ത്രാലയവും 2007ലാണ് ലൈംഗിക വിദ്യാഭ്യാസം ഇന്ത്യയില് നിര്ബന്ധമാക്കിയത്. ലൈംഗിക വിദ്യാഭ്യാസം സിലബസില് ഉള്പ്പെടുത്തുന്നതിന് ആവശ്യമായ പാഠ്യപദ്ധതിയും തയ്യാറാക്കി. എന്നാല് ഇന്ത്യയുടെ സാംസ്കാരികമൂല്യങ്ങള്ക്ക് ദോഷകരമാകുമെന്ന് കണ്ട് ലൈംഗിക വിദ്യാഭ്യാസം നിര്ബന്ധമാക്കരുതെന്ന് ഹിന്ദു സംഘടനകള് വാദിച്ചിരുന്നു. ഇതിനെ തുടര്ന്ന് ഗുജറാത്ത്, മധ്യപ്രദേശ്, കേരളം, മഹാരാഷ്ട്ര, കര്ണാടക, രാജസ്ഥാന്, ഛത്തീസ്ഗഢ്, ഗോവ തുടങ്ങിയ സംസ്ഥാനങ്ങള് ലൈംഗിക വിദ്യാഭ്യാസം നിരോധിക്കാന് ഉത്തരവായി. മറ്റ് ഇന്ത്യന് സംസ്ഥാനങ്ങള് ലൈംഗിക വിദ്യാഭ്യാസം സിലബസില് ഉള്പ്പെടുത്തി. ഇപ്രകാരം ഉള്പ്പെടുത്തിയ സംസ്ഥാനങ്ങളില് നിന്നും സെക്സ് എഡ്യൂക്കേഷന് പിന്വലിക്കണമെന്നാണ് കേന്ദ്ര ആരോഗ്യ മന്ത്രിയുടെ ആവശ്യം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
