സുനന്ദ പുഷ്‌ക്കറുടെ മരണത്തില്‍ കോണ്‍ഗ്രസ് നേതൃത്വത്തിനെതിരെ ബിജെപി നേതാവ് സുബ്രഹ്മണ്യം സ്വാമി. സുനന്ദയുടെ മരണം കൊലപാതകം തന്നെ യാണെന്ന്‌ സുബ്രഹ്മണ്യം സ്വാമി പറഞ്ഞു ഐപിഎല്‍ വിവാദവുമായി ബന്ധപ്പെട്ടാണ് കൊലപാതകം നടന്നിരിക്കുന്നത്. കൊലയ്ക്കു പിന്നില്‍ പ്രൊഫഷണല്‍ സംഘമാണ്. ഇതിന്റെ ഗൂഢാലോചനയ്ക്കു പിന്നില്‍ റോബര്‍ട്ട്‌വധേരയാണെന്നും ഒരു സ്വകാര്യ വാര്‍ത്താചാനലിന് നല്‍കിയ അഭിമുഖത്തില്‍ സ്വാമി ആരോപിച്ചു.

ഐപിഎല്‍ ഇടപാടുമായി ബന്ധപ്പെട്ട് വാര്‍ത്താസമ്മേളനം നടത്താന്‍ സുനന്ദ നിശ്ചയിച്ചതിന്റെ തലേന്നാണ് കൊല്ലപ്പെടുന്നത്. സുനന്ദയുടെ വെളിപ്പെടുത്തലിനെ കോണ്‍ഗ്രസിലെയും വ്യവസായ മേഖലയിലെയും പ്രമുഖര്‍ ഭയപ്പെട്ടിരുന്നു. സുനന്ദയെ നിശബ്ദമാക്കേണ്ടത് ഇവരുടെ ആവശ്യമായിരുന്നു.

പ്രൊഫഷണല്‍ സംഘത്തെ ഉപയോഗിച്ച് ഇവര്‍ സുനന്ദയെ ഇല്ലാതാക്കുകയായിരുന്നു. കൊലപാതകത്തില്‍ തരൂരിന് നേരിട്ട് പങ്കുണ്ടെന്ന് താന്‍ വിശ്വസിക്കുന്നില്ല. എന്നാല്‍ കൊല നടത്തിയത് ആരാണെന്ന് തരൂരിനറിയാം. അതു തുറന്നുപറയാന്‍ തരൂര്‍ തയ്യാറാകണമെന്നും സ്വാമി ആവശ്യപ്പെട്ടു. സുനന്ദയുടെ ശരീരത്തില്‍ പന്ത്രണ്ടോളം മാരക മുറിവുകള്‍ ഉണ്ടായിരുന്നു. ശരീരത്തില്‍ വിഷത്തിന്റെ അംശമുണ്ടായിരുന്നുവെന്നും സുബ്രഹ്മണ്യം സ്വാമി ചൂണ്ടിക്കാട്ടി.

സുനന്ദയെ റഷ്യന്‍ വിഷം ഉപയോഗിച്ച് കൊലപ്പെടുത്തിയതാണെന്നും അതിന്റെ തെളിവ് തന്റെ പക്കലുണ്ടെന്നുമായിരുന്നു സ്വാമിയുടെ മുമ്പ്‌ വെളിപ്പെടുത്തിയിരുന്നു.

കേസ് തെളിയിക്കുന്നതിനുള്ള നിയമനടപടിയുമായി സ്വാമി നീങ്ങുന്നതിനിടെയാണ് എയിംസിലെ ഫോറന്‍സിക് വിഭാഗം മേധാവി ഡോ. സുധീര്‍ ഗുപ്ത തരൂരിനും അന്നത്തെ ആരോഗ്യമന്ത്രിയായിരുന്ന ഗുലാം നബി ആസാദിനും എതിരെ പരാതി നല്‍കിയത്. സുനന്ദയുടെ മരണം സ്വഭാവിക മരണമെന്ന് റിപ്പോര്‍ട്ട് നല്‍കാന്‍ ഇവര്‍ സമ്മര്‍ദ്ദം ചെലുത്തിയെന്നായിരുന്നു ഡോ.ഗുപ്തയുടെ ആരോപണം. തന്റെ നിലപാടുകള്‍ ശരിവയ്ക്കുന്നതാണ് ഡോ.ഗുപ്തയുടെ പരാതി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha