നോട്ടു നിരോധനത്തെതുടര്ന്ന് കടക്കെണിയിലായ ബിസിനസ്സുകാരന് മന്ത്രിക്കുമുന്നില് ജീവനൊടുക്കാന് ശ്രമിച്ചു
ഉത്തരാഖണ്ഡില് നോട്ട് നിരോധനത്തെ തുടര്ന്ന് കടക്കെണിയിലായ ബിസിനസുകാരന് ബിജെപി ഓഫീസിലെത്തി മന്ത്രിക്കു മുന്നില് വിഷം കഴിച്ച് ജീവനൊടുക്കാന് ശ്രമിച്ചു. ഡെറാഡൂണിലെ ബിജെപി ഓഫീസില് ഉത്തരാഖണ്ഡ് കൃഷി മന്ത്രി സുഭോധ് ഉനിയല് ജനസമ്പര്ക്ക പരിപാടി നടത്തുന്നതിനിടെയായിരുന്നു സംഭവം നടന്നത്. കാത്ഗോഡം നയി കോളനി സ്വദേശിയായ ബിസിനസുകാരന് പ്രകാശ് പാണ്ഡെയാണ് ജീവനൊടുക്കാന് ശ്രമിച്ചത്. ചരക്കുലോറിയില് സാധനങ്ങള് കടത്തുന്ന ബിസിനസായിരുന്നു പാണ്ഡെയുടേത്.
എന്നാല് പ്രധാനമന്ത്രി നരേന്ദ്ര മോദി നോട്ട് നിരോധനം പ്രഖ്യാപിച്ചതോടെ ബിസിനസ് നഷ്ടത്തിലായെന്ന് ഇദ്ദേഹം പറയുന്നു. കടക്കെണിയിലായ തന്റെ വായ്പകള് എഴുതിത്തള്ളണമെന്ന് ആവശ്യപ്പെട്ട് പ്രധാനമന്ത്രിക്കും ധനമന്ത്രി അരുണ് ജയ്റ്റ്ലിക്കും ബിജെപി ദേശീയ അധ്യക്ഷന് അമിത് ഷായ്ക്കും കത്തെഴുതിയിരുന്നു.
എന്നാല് നടപടിയൊന്നും ഉണ്ടായില്ല ഇദ്ദേഹം മന്ത്രിയോട് വിശദീകരിച്ചു. തന്റെ കഥ മന്ത്രിക്കു മുന്നില് വിവരിക്കുന്നതിനിടെ പാണ്ഡെ കുഴഞ്ഞു വീണു. ഉടന്തന്നെ ബിജെപി പ്രവര്ത്തകര് മന്ത്രിയുടെ കാറില് ഇയാളെ ആശുപത്രിയില് പ്രവേശിപ്പിച്ചു.
പാണ്ഡെ അപകടനില തരണം ചെയ്തിട്ടില്ലെന്ന് ഡോക്ടര്മാര് പറയുന്നു. ബിജെപി ഓഫീസില് എത്തുന്നതിനു മുമ്പായിരിക്കാം പാണ്ഡെ വിഷം കഴിച്ചതെന്നാണ് സംശയിക്കുന്നത്.
https://www.facebook.com/Malayalivartha
