വ്യവസായ മേഖലയില്‍ സ്ഥിരം ജോലി എന്നത് അവസാനിക്കുകയാണ്. ഏത്​ തൊഴിലാളിയെയും നിശ്ചിത കാലത്തേക്ക്​ മാത്രം ജോലിക്ക്​ എടുക്കാനും പിരിച്ചുവിടാനും തൊഴില്‍ ഉടമക്ക് അധികാരം നൽകിക്കൊണ്ട് ​1946ലെഇന്‍ഡസ്​ട്രിയല്‍ എംപ്ലോയ്​മന്റ്​ (സ്​റ്റാന്‍ഡിങ്​ ഒാര്‍ഡേഴ്​സ്​) കേന്ദ്ര ചട്ടങ്ങളില്‍ ഭേദഗതി വരുത്തി കേന്ദ്ര സര്‍ക്കാര്‍ പുതിയ വിജ്ഞാപനം പുറത്തിറക്കി. ഈ ഭേദഗതിയനുസരിച്ച് വ്യവസായ മേഖലയിലെ എല്ലാ ജോലികളിലും സ്ഥിരംജോലി നിശ്ചിതകാലത്തേക്ക്​ മാത്രമുള്ള കരാര്‍ ജോലിയായി മാറും. തൊഴിലാളി യൂണിയനുകളുമായി ചര്‍ച്ചയോ കൂടിയാലാചനയോ നടത്താതെയും പാര്‍ലമന്റില്‍ കൊണ്ടുവരാതെയും എക്​സിക്യൂട്ടിവ്​ ഉത്തരവിലൂടെയാണ്​ പുതിയ തീരുമാനം പ്രഖ്യാപിച്ചിരിക്കുന്നത്.

ഇത് പ്രകാരം ഏതൊരു തൊഴിലുടമക്കും തൊഴിലാളികളെ ഒറ്റയടിക്ക്​ ഒഴിവാക്കി യന്ത്രവത്​കരണം നടത്താനും സ്ഥാപനം പെട്ടെന്ന്​ അടച്ചു​പൂട്ടാനും കഴിയും. നിശ്ചിതകാലത്തേക്ക്​ തൊഴില്‍ കരാര്‍ റദ്ദാക്കുന്നതിനുമുമ്പ് തൊഴിലുടമക്ക് രണ്ടാഴ്​ചത്തെ നോട്ടീസ്​ കാലയളവ് നൽകാം. വ്യവസായ ലോബിയില്‍നിന്നുള്ള സമ്മര്‍ദത്തെ തുടര്‍ന്നാണ്​ ഭേദഗതി ഇത്രയും പെട്ടെന്ന് കൊണ്ടുവന്നെന്നാണ് ഒരു വിഭാഗക്കാർ പറയുന്നത്. ഇതിനോടകംതന്നെ വിജ്ഞാപനം പിന്‍വലിക്കണമെന്ന ആവശ്യം പല ഭാഗങ്ങളിൽനിന്നും ഉയരുന്നുണ്ട്.