ഇരുന്നൂറ് കോടിയിലേറെ നികുതി നഷ്ടമുണ്ടാക്കി വിലസുന്ന വാഹനങ്ങള്ക്ക് എട്ടിന്റെ പണി; പുതുച്ചേരി രജിസ്ട്രേഷന് വാഹനങ്ങള് ഇന്ന് മുതല് പിടിച്ചെടുക്കും
പുതുച്ചേരിയില് വാഹന രജിസ്ട്രേഷന് നടത്തി, കേരളത്തിന് ഇരുന്നൂറ് കോടിയിലേറെ നികുതി നഷ്ടമുണ്ടാക്കി വിലസുന്ന വാഹനങ്ങള് നിരത്തില് കണ്ടാല് പിടിച്ചെടുക്കാന് ട്രാന്സ് പോര്ട്ട് കമ്മിഷണര് കെ. പത്മകുമാര് ആര്.ടി.ഒമാര്ക്ക് നിര്ദേശം നല്കി. കേസെടുക്കാനായി ഈ വാഹനങ്ങളുടെ വിവരങ്ങള് ക്രൈംബ്രാഞ്ചിനും കൈമാറിയിട്ടുണ്ട്. ഇന്നുമുതല് നടപടി തുടങ്ങുമെന്ന് ട്രാന്സ് പോര്ട്ട് കമ്മിഷണര്.
ഇവ നിരത്തിലോടുന്നുണ്ടോ എന്നറിയാന് സി.സി ടി.വി ദൃശ്യങ്ങളും പരിശോധിക്കും. ഇത്തരത്തില് 1200 ഓളം വാഹനങ്ങളുണ്ട്. സംസ്ഥാനത്ത് നിയമാനുസൃത നികുതി ഒടുക്കി, രജിസ്ട്രേഷന് ഇവിടേക്ക് മാറ്റി തുടര്നടപടികളില് നിന്ന് ഒഴിവാകാന് മോട്ടോര് വാഹന വകുപ്പ് നിശ്ചിത സമയം അനുവദിച്ചിരുന്നു. എന്നിട്ടും ഇവ രംഗത്തുവരാത്തതിനെ തുടര്ന്നാണ് നടപടി കര്ശനമാക്കാനുള്ള തീരുമാനം.
പുതുച്ചേരിയില് വ്യാജ വിലാസത്തില് രജിസ്ട്രേഷന് നടത്തി നികുതി വെട്ടിപ്പ് നടത്തിയെന്ന് കണ്ടെത്തിയ വാഹനങ്ങള്ക്ക് നേരത്തെ നോട്ടീസ് നല്കിയിരുന്നു. എന്നാല്, ഈ വാഹനങ്ങളില് ഭൂരിഭാഗവും നോട്ടീസിനോട് പ്രതികരിച്ചിട്ടില്ല. മുന്നൂറ് വാഹനങ്ങള് മാത്രമാണ് നിര്ദേശം പാലിച്ചത്. ശേഷിക്കുന്ന വാഹനങ്ങള് നിരത്തിലിറങ്ങിയാല് പിടികൂടി നിയമ നടപടിക്ക് വിധേയമാക്കാനാണ് തീരുമാനം.
ലക്ഷങ്ങള് വിലയുള്ള ആഡംബര കാറുകള് ഉള്പ്പെടെ പുതുച്ചേരിയില് രജിസ്റ്റര് ചെയ്തതിലൂടെ സംസ്ഥാനത്തിന് കിട്ടേണ്ട കോടിക്കണക്കിന് രൂപയുടെ നികുതിയാണ് നഷ്ടമായത്. കേരളത്തില് വില്പ്പന നടത്തിയതും ഇറക്കുമതി ചെയ്തതുമായ ആഡംബര വാഹനങ്ങളാണ് കുറഞ്ഞ നികുതിയുള്ള പുതുച്ചേരിയില് രജിസ്റ്റര് ചെയ്തത്. ഉടമകള് അവിടെ താമസിക്കുന്നു എന്ന വ്യാജ വിലാസം തരപ്പെടുത്തിയായിരുന്നു രജിസ്ട്രേഷന്. ചില സിനിമാ താരങ്ങള് ഉള്പ്പെടെയുള്ളവരുടെ ആഡംബര കാറുകള് പുതുച്ചേരി രജിസ്ട്രേഷനിലൂടെ നികുതി വെട്ടിപ്പ് നടത്തിയത് കണ്ടെത്തി നിയമ നടപടിക്ക് വിധേയമാക്കിയിരുന്നു.
അതിന് പിന്നാലെയാണ് ഇത്തരം ഒട്ടേറെ വാഹനങ്ങളുണ്ടെന്ന് കണ്ടെത്തിയത്. തുടര്ന്നാണ് വാഹന ഉടമകള്ക്ക് മോട്ടോര് വാഹന വകുപ്പ് നോട്ടീസ് അയച്ചത്. എന്നാല്, മിക്ക വാഹനങ്ങളും രംഗത്തുവരാന് വിസമ്മതിച്ചു. പ്രതീക്ഷിച്ചതിനെക്കാള് വളരെക്കുറച്ച് 20 കോടി മാത്രമാണ് കിട്ടിയത്. നികുതി വെട്ടിപ്പിനായി പുതുച്ചേരിയില് രജിസ്ട്രേഷന് നടത്തിയ വാഹനങ്ങള് ഏറെയും ഉള്ളത് എറണാകുളത്തും കോഴിക്കോട്ടുമാണ്.
അന്വേഷണത്തിനിടെ എറണാകുളത്ത് ഒരു വാഹന ഡീലറുടെ ഡീലര്ഷിപ്പ് റദ്ദാക്കിയിരുന്നു. അന്വേഷണ വല മുറുക്കിയതു കൊണ്ട് കേരളത്തിന് മറ്റൊരു നേട്ടമുണ്ടായി. നികുതി വെട്ടിപ്പിന് പുതുച്ചേരിയില്, പുതുതായി രജിസ്റ്റര് ചെയ്യുന്ന കേരളത്തിലെ വാഹനങ്ങളുടെ എണ്ണം ക്രമാതീതമായി കുറഞ്ഞു. കഴിഞ്ഞ മൂന്നുമാസത്തിനിടെ കേരളത്തില് അമ്ബതോളം ആഡംബര വാഹനങ്ങള് രജിസ്റ്റര് ചെയ്തു.
https://www.facebook.com/Malayalivartha
